Kwînyangua wa Isiraeri
6
1 Bûkoona thîîna biû bûtûûraga mûtûûrîre wa gîkeno Sayuuni na biû bara bwîgagua bûrî mayîîga kîrîmaani gîa Samaria. Biû atongoria ba mûgongo ûmûnene wa Isiraeri, antû baayaga kwenu bagîcwaga ûteethio! 2 Tathiini bwone taûni ya Karine, na bûcooke bûthi taûni înene ya Amathi, na bûgûrûke mwanka ntûûra ya Afirisiti ya Ngathi. Ka irî imbega nkûrûki ya moonene ma Njunda na Isiraeri? Ga kûrî na nthî înene nkûrûki ya cienu? 3 Bwaigaga ntugû ya kînyamaara kûraaya naabi, bûkareetanga watho bwa bitina akubî. 4 Bûkoona thîîna biû bûmaamaga ûrîrîîni bûrûthîîtwe na mîguongo, biû bwîtambûrûkagia itîîni bienu biithongi na bûkarîa ng'ondu cia ûrîîthi bwenu, na tûyaû kuuma biugûûni. 5 Biû bwendaga kûringa nyîmbo na wandîndî ya ndigi inyingî ta bûra Ndaundi aarûthaga, na bûgeetungîra nyîmbo na into bia kwina. 6 Biû bûnyuunyaga ndibei na mbakûri ciûyûri na bûgatûmîra maguta manuunkaga bwega mûno, îndî bûtikwîthikîîra n'ûntû bwa kwînyangua gwa Isiraeri 7 Kwoogu, bûkeethîrwa bûrî ba mbere kûthi ûkombooni. Biatho bienu na marîa meenu magîkinya mûthia. 8 Mwathani Ngai n'athiîtîîtie na we wengwa. Mwathani wa Njûûrî n'augîîte, “Inthwîre gwîkumia bwa antû ba Njakubu, imbûthagia gûntû kwao kûra kwirige. Nkaanenkanîra taûni yao na bionthe bira birî ku kîrî anthû baao.” 9 Wegua gûtigeere antû îkûmi ndeeni ya nyomba îmwe, bagaakua. 10 Na muntû wa ba muntû ûyu akuîte, ûra ûgwatîîrîîte mathiko, akaaruta mwîrî nyomba. Na akaûria woora aûmba kwîthîrwa atigeere nyomba, “I ka kûrî muntû ûngî arî gûku naawe?” Kayû gagaacookia, “Arî!” Rîru akauga “Kiraani ki! Na nwa mwanka twîmenyeere tûtikaaye kûgweta riîtwa rîa Mwathani.” 11 Raitha, Mwathani akaaruta watho, na akomborania nyomba inene ituîke tûcuncî tûcuncî, na nyomba i niini îgatuîka marebûrû marebûrû. 12 Aanga mbaraathi ciaugia rwîro rwaraani? Muntû nwa arîme na ncamba cia mîraaû ku? Wa amwe na ûgu bûgarûrîîte mbooti îgatuîka ûrogi, na îtunda rîa wagîru rîgatuîkithua gana. 13 Bwîkumagia bûra bwataire ntûûra ya Rondebari! Bûgeekumia bûkiugaga, “Anga tûtaathûkiirie taûni ya Karinaimu na inya yetû twingwa?” 14 Na Mwathani wa Njûûrî wengwa ariuga “Antû ba Isiraeri, i nthiîte gûtûma njûûrî ya ageni îbwithûkîre na bakabwinyîîria kuuma mwîrîgaani wa Amathi rûteere rwa îgûrû mwanka kîbonde kîa Araba rûteere rwa iti.”