Mwîto wa kwîrira
5
1 Thikîîriani, biû antû ba Isiraeri, rwîmbo rwa mathiko rûra nkwina îgûrû rîenu, 2 “Isiraeri mwarî bikira n'agwîte na atikooro aûkîîra kaîrî! N'atiganîrîîtue nthîgûrû yake, na gûtirî wa kûmûûkîîria.”3 Mwathani Mwene Inya ariuga atarî, “Taûni îmwe ndeeni ya Isiraeri îtûmaga acikaarî ngiri, îndî nwa îgana rîmwe bacookaga, na taûni îîngî îgatûma îgana, nwa îkûmi rîonka bagaacooka.”
4 Ûûgû i bu Mwathani akwîra antû ba Isiraeri, “Nceriani na bûgatûûra mwoyo. 5 Bûtigaacerie mîbuanaano Betheri, bûtikaathi Girigari, bûtikaathi Beeriseba kûgonga. N'ûntû antû ba Girigari batarîrîîtwe kûthi ûkombooni na Betheri îgaatuîka ya ûtheri.” 6 Ceriani Mwathani, na bûgaatûûra mwoyo. Bwarega kûmûceria agaaciata antû ba Njosebu ta mwanki. Mwanki ûkaarîrîkîra antû ba Betheri, na gûtirî muntû akaûmba gûcuoria. 7 Biû bûgarûraga ûmma bûgatuîka gana na bûgata wagîru nthîgûrû.
8 Mwathani aarûthire nthata, kîrîmîra na Orioni, na agarûraga mwindu ûgatuîka rûkîîrî, na mûthenya ûgatuîka ûtugû. Eetaga rûûyî rwa îria na akarutûûra nthî îmbûmo. Riîtwa rîake i Mwathani. 9 Ageragîra kwînyangua antû bara barî na inya na kwînyangua gûkaayîîra taûni ira mbirige. 10 Biû antû bûthwîre muntû ûra ûreganaga na mantû mara matarî ma mma na akaaria ûmma bunthe îgambaani. 11 I bwinyîîrîîtie nkîa na bûgacituunya irio biacio. I bwakîîte nyomba cia maiga, îndî bûtitûûra ku. I bwandîîte mînda îmîthongi ya mîcabiibû, îndî bûtiinyua ndibei yayo. 12 Imbiyî bûra meeyia meenu maingîîte na bûra mathûûkia mara bûrûthîîte magana. Bwinyagîîria antû bara baagîru bûkathûkia ngukumo, na bûkagiria nkîa itwîrwa îgamba kootiini bûra kûbatîîrue. 13 Na kwoogu, gûkira kii kagiitaani ta gaku ka moothûûku i mantû meega ma kûrûtha! 14 Ceriani kûrûtha bwega, na ti kûrûtha ûthûûku, kaingo bûtûûra mwoyo. Na kwoogu Mwathani wa Njûûrî akeegua arî amwe naabi, wa ta bûra bûkuuga. 15 Menaani ûthûûku, na bwende wega, na bwone atî îgamba irîgûtuîgwa bûra kûbatîîrue kootiini. Waûmba kwîgua Mwathani wa Njûûrî akeegîîrua matigari ma Njosebu kîao. 16 Na kwoogu, Mwathani wa Njûûrî ariuga, “Ûkeegua kûrî na kîeba njîraani cionthe, na antû bakaarîra bakiugaga, ‘Ûi, Ûi, yîîyiaî.’ Wana arîmi bageetwa barîrîre bara bakuîte barî amwe na antû bara barutaga ngûgî ya kûrîrîra akuû. 17 Gûkeegua kûrî na kûminûka mîndaani yonthe ya mîcabiibû. Bûbu bûgaakarîka n'ûntû i mbûyîîte kûbûkaanûkia!” I bu Mwathani akuuga.
Ntugû ya Mwathani
18 Bûkoona thîîna biû bwetagîîra ntugû ya Mwathani. N'ûntû bûrîkû bwega ntugû înu îkaabûrûthîra? Kîrî biû, îgaatuîka ntugû ya mwindu na ti werû. 19 Îkeegua îkari ta muntû akuthûkîîte cimba na agakomana na ndû, kana muntû eenûkîîte mûciî na aigîîra njara rûthingooni akarûmwa i njoka! 20 Anga ntugû ya Mwathani ti mwindu îkareeta na ti werû? Anga itiîgua îrî ntugû ya mwindu wa nthaatû na îtarî na ûkengu?
21 Mwathani ariuga, “Inthwîre biatho bienu bia ndiini, ntiûmba kûbiûmîîria! 22 Wana bwandetera biegwa bienu bia kûbîîthua na biegwa bia irio ntibiîtîgîîria, wana ntiîtîgîra nyamû cienu ira bûnoreetie bûndetera birî biegwa bia ngwatanîro, 23 Tigaani kûndingîra gîtuma na nyîmbo, ntikwenda kûthikîîria wandîndî cienu cia ndigi inyingî. 24 Îndî ga gûtua îgamba bûra kûbatîîrue kwîndame ta mûgwû kaurooni, na wagîru nabu ta muuro ûra ûtabweyaga.
25 “Bwaaro bûûndetera igongwana na biewa mîanka mîrongo îna rîra bwarî rwanda, biû antû ba Isiraeri? 26 I bûkamatîîte mîbuanaano îra bwîrûthîrîte bwingwa, Sakuthi, mûnene ngai yenu, na nthata Kaiwani ngai yenu. 27 Kwoogu, nkaabwira ûkombooni nthîgûrû îra îrî mbere ya Ndamasiki.” I bu Mwathani akuuga, ûra riîtwa rîake i Ngai wa Njûûrî.