4
1 Thikîîriani biû aka, biû bûnoreete ta ng'ombe cia Mbasani, ira îrî karîmaani ka Samaria. Biû bara bûrûthagîra bara nkîa ûthûûku na bûkainyîîria bara barî na ûbatu, na bûkeera arûme beenu tûretereeni ndibei tûnyue! 2 Mwathani Mwene Inya n'athiîtîîtie na ûtheru bwake, “Ntugû îgaakinya rîra bakaabûkururia na ndwano, mwanka muntû wenu wa mûthia akari ta îkûyû ndwanooni. 3 Naabi wa ûmwe wenu akaumîîra mîrinyaani înu yongwa îra îtûrîkîîte rûthingooni, na bûgerwe ome bwerekerete Arimoni.” Ûûgû i bu Mwathani Mwene Inya akuuga.4 “Antû ba Isiraeri, îthiini bantû ara atheru Betheri na bwîyie, îthiini Girigari na bwîyie nkûrûki. Na bûreete nyamû cienu cia igongwana wa kîra rûkîîrî, na icuncî bienu bia îkûmi wa kîra ntugû ya ithatû. 5 Bûrute kîgongwana gîa kûbîîthua gîa nkaatho kîa mîgaate îrî na ndawa ya kwimbithia kîrî Ngai, bûtûmîîrie biewa bienu bia kwîbendera na bûtûme bimenyekana! Bûbû i bu ûntû bûra bwendeete kûrûtha, biû Aisiraeri. Ûûgû i bu Mwathani Mwene Inya akuuga.
6 “I niû ndaareetire yûûra taûniini cienu cionthe na kwaga bia kûrîa ntûûraani cienu cionthe, îndî amwe na ûgu bûtaancookera. Ûûgû i bu Mwathani akuuga.
7 “Kinya ndaarigîîria mbura îtikaure rîra imera bienu biamîendaga mûno. Ndaatûma mbura kîrî ntûûra îmwe ndaatiga îra îngî, mbura mûndaani ûmwe rîra ûra ûngî ûkûûma. 8 Antû batûgûûgaga kuuma taûni îmwe kûthi îra îngî bagîcwa rûûyî, îndî gûtaarî rûûganu rwa kûnyua. Îndî amwe na ûgu bataancookera. I bu Mwathani akuuga.
9 “Ndaatûma ruuo na mûrimo wa kîmuu kûûmia irio bienu. Ngige ciarîa mînda yenu yonthe, na mînda ya mîcabiibû, mîkûyû na mîceituuni. Wanarîo bûtaancookera. Ûûgû i bu Mwathani akuuga.
10 “Ndaatûma kînyamaara kîa mîrimo kwenu ta bûra ndaatûmire Miisiri, na ndaûraga nthaka cienu na rûûyiû amwe na mbaraathi ira ciataîtwe. Ndaûyûria nyiûrû cienu na kîrumba gîa ntuungu kambîîni cienu. Amwe na ûgu bûtaancookera. I bu Mwathani akuuga.
11 “Ndaathiria bamwe beenu ta bûra ndaathiriirie Sondomu na Ngomoora. Bara beenu baatigarire baakari ta gîcinka gîkûûrîîtwe mwankiini, amwe na ûgu bûtaancookera. I bu Mwathani akuuga.
12 “Kwoogu îîndî, antû ba Isiraeri, i ka nkabwaa îkaanûkia. Na n'ûntû ûgu i bu nthiîte kûbûrûthîra, îîthuuranîreeni gûkomana na Ngai wenu biû antû ba Isiraeri n'ûntû n'ayîîte kûbûgambithia!” 13 N'ûntû Ngai n'we aarûthire irîma na aûmba kîbuubani, aatûma mathûgaania maake mamenyeka i muntû, na agarûraga mûthenya ûgatuîka ûtugû. N'akinyaangaga gûntû kûra gûûkîîru kwa nthî, riîtwa rîake eetawa Mwathani wa Njûûrî!