Îbîtia na îkaanûkia rîa Isiraeri
3
1 Antû ba Isiraeri, thikîîriani ntûmwa îno, îra Mwathani aarîîtie kîînyume naabi, mûgongo unthe ûra aarutire kuuma Miisiri, 2 Mwathani ariuga, “Kîrî mîgongo yonthe îra îrî nthîgûrû, nwa biû bwinka mbiyî na mmenyagîîra. Na gîku i kîo gîtûmi nwa mwanka mbûkaanûkie n'ûntû bwa meeyia meenu monthe.” 3 Anga antû baîrî baûmba kûthiiyania tatiga barîîkanîîtie? 4 Anga cimba yaûmba kûruruma kiunguuni tatiga îgwete gîntû? Anga kiunga kîayo kîaûmba kûruruma kîburioni kîayo gîtagwete gantû? 5 Anga nyoni yaûmba kûrîîkîrua gûtarî na mûtego? Anga mûtego waûmba gûkubûka ûtakubûrîtue i gîntû? 6 Anga rûgoci rwaûmba kûringwa ntûûra na antû bakarega kûmaka? Anga ûthûûku bwaûmba kuumîîra ntûûra tatiga Mwathani abutûmîîte? 7 N'ûntû gûtirî bu Mwathani Ngai arûthaga atamenyithîîtie aruti ngûgî baake, tabo iroria. 8 Rîra cimba yaaruruma n'ûû aûmba kûrega kûmaka? Rîra Mwathani Mwene Inya aaria, n'ûû we aûmba kûrega gûtûmîîria ntûmwa yake? 9 Ugîîriani kîrî atûûri ba gûntû kûra kwirige kwa Asindondi na Miisiri. “Îthîranaani irîmaani bira bithiûrûkîîte Samaria na bwone irigicano biinene na mabîtia mara marûthagwa ku.” 10 Mwathani ariuga, “Îndî batiiyî kûrûtha bûra kûbatîîrue, bo bara beebaigagîra ûtonga bwa bitina na ûtuunyani gûntû kwao kûra kwirige. 11 Kwoogu, Mwathani Mwene Inya ariuga ûûgû, ‘Mûnthû agagûkîria inya, na atae into bia gûntû kûra kwirige.’ ”12 Mwathani ariuga, “Wa ta bûra mûrîîthi atatharaga gantû kûrî kuuma kanyuani ga cimba, tatiga magûrû maîrî kana kagucî ga gûtû kwa ng'ondu îndîe i cimba, nwa ta bu ûkeegua gûkari kîrî antû ba Isiraeri bara batwîre Samaria gûtirî kîo gîgaatuunyûkua kîrî thau. 13 Îîndî thikîîria, na ûkaanie nciarwa cia Njakubu.” I bu Mwathani wa Njûûrî akuuga.
14 “Mûthenya ûyu, rîra nkaa antû ba Isiraeri îkaanûkia n'ûntû bwa meeyia maao, i rîo nkaathiria ithînjîro bia Betheri. Ngoci cia kîra kîthînjîro îkaunangwa. 15 Nkoomborania nyomba cia îgiita rîa mpîo na ria thaano. Nyomba ira igemeetue na mîguongo ikeenyangua na nyomba inene ikoomboranua,” i bu Mwathani akuuga.