2
1 Ûûgû i bu Mwathani akuuga, “N'ûntû bwa meeyia mathatû, wana mana ma antû ba Moabu, ntiitigana na mûthûûro wakwa, n'ûntû ibaarîrîkîîre maîndî ma mûnene wa Endomu na mwanki mwanka maatuîka muu. 2 Kwoogu, ngaatûma mwanki kîrî Moabu ûra ûkaarûngûria gûntû kûra kwirige na rûthiingo gwa Keriothi. Moabu îkaagwa na gîtuma kîînene n'ûntû bwa nkururo cia ndûa na kayû ga coro. 3 Naani nkeenyangia mwathi wa nthîgûrû ya Endomu, anene baayo bonthe amwe n'yo.” I bu Mwathani akuuga.4 Ûûgû i bu Mwathani akuuga, “N'ûntû bwa meeyia mathatû, wana mana ma antû ba Njunda, ntiitigana na mûthûûro wakwa, n'ûntû i bareganîîte na watho bwa Mwathani na baarega kûmenyeera maathana maake, gîtûmi ibatongoreetue njîraani inthûûku i ngai cia ûrongo ira biûyûûyû biao baathingataga. 5 Ngaatûma mwanki kîrî Njunda ûra ûkaarûngûria gûntû kûra kwirige na rûthiingo Njerusaremu.”
Kûgambithua wa Isiraeri
6 Mwathani ariuga, “N'ûntû bwa meeyia mathatû, wana mana ma antû ba Isiraeri, ntiitigana na mûthûûro wakwa, n'ûntû beendagia antû bara baagîru barî nkombo bakauma fetha, na bara barî na ûbatu bakauma iraatû. 7 Bakinyaangagîra biongo bia bara batarî na inya tîîriini ya nthî na bakaebaebia ûmma kuuma kîrî bara bainyîîrie, mwana na îthe bakamaama na mûka ûmwe ûmwîthî, na kwoogu, bageekîra riîtwa rîakwa mûgiro. 8 Bamaamaga rûteere rwa wa kîra kîthînjîro, antû bamaamagîra nguo ira batuunyîîte nkîa irî gîntû gîa kûrûngamîîra marandû maao. Ndeeni ya nyomba ya ngai yao, i ku banyuunyagîra ndibei îra bathûkîîtie îrî baine kuuma kîrî aîrandû baao. 9 Amwe na ûgu, mbere yenu, indaathiriirie Amori cwe, arûme baarî baaraaya ta Mîthithinda, na barî na inya ta Mîpuru. Ndeenyangiirie matunda maayo mara maarî îgûrû na mîri yayo îra yarî ruungu 10 I niû ndaabûrutire kuuma Miisiri, ndabûtongoria gûkûrûkîîra rwanda antû a mîanka mîrongo îna, kaingo bwîgwatîra nthîgûrû ya Amori. 11 Ndaathuura bamwe ba aana beenu batuîka iroria, na bamwe ba nthaka cienu baatuîka Anasiri. Anga ûûgû tibu antû ba Isiraeri? I bu Mwathani akuuga. 12 Îndî bwatûma Anasiri banyua ncoobi, na watha iroria wabiîra, ‘Bûtikaarorie.’ 13 Kwoogu, nkabwinyîîria nthî ta nkaarî ya ng'ombe rîra yûûyûri maketha matarî mabûûre. 14 Wana bara barî rwîro mûno batiûmba kuugia baûra, na antû ba inya bakaaga inya yao, wana kinya acikaarî batiûmba kwonokia mîoyo yao. 15 Antû ba ûta batiûmba kûrûngama, bara barî rwîro mûno batiimonyia, wana bara barî mbaraathiini batiûmba kwonokia mîoyo yao. 16 Ntugû înu, wana kinya acikaarî bara ncamba mûno, bakaugia barî njara i ntheri.” I Mwathani ûkuuga.