AMOSI
Kûgambithua kwa mîgongo îra îtûûranîrîte na Isiraeri
1
1 Biugo bia Amosi, ûmwe wa arîîthi ba Tekoa, bûra oonire îgûrû rîa Isiraeri mîanka îîrî mbere ya kiinaino kîa nthî, rîra Usia aarî mûnene wa Njunda na Njeroboamu mwana wa Njeoasi aarî mûnene wa Isiraeri.2 Auga ata rî, “Mwathani n'akûgoondoka kuuma Sayuuni na akaruruma kuuma Njerusaremu, ndîîthia i ka îkûûma na nyaki îra îrî kîrîmaani gîa Karimeri n'îkûnyaara.” 3 Ûûgû i bu Mwathani akuuga, “N'ûntû bwa meeyia mathatû ma antû ba Ndamasiki, na kinya mana, ntiitigana na mûthûûro wakwa, n'ûntû baabûûrire Ngiriandi ta bûra irio bibûûragwa na mîbûûro îrî na magego ma cuuma, 4 ngaatûma mwanki îgûrû rîa nyomba ya Acaeri, ûra ûkaarûngûria gûntû kûra kwirige na rûthiingo kwa Mbeni-Andandi. 5 Nkaunanga biingîîro bia mîîrîga ya Ndamasiki, nkeenyangia mûnene ûra arî kîbondeeni kîa Abeni na n'we ûgwatîîrîîte mûraagi wa ûnene ndeeni ya Bethi-Endeni. Antû ba Aramu bakaathi ûkombooni taûniini ya Kiri.” I bu Mwathani akuuga.
6 Ûûgû i bu Mwathani akuuga, “N'ûntû bwa meeyia mathatû, wana mana ma antû ba Gasa, ntiitigana na mûthûûro wakwa, n'ûntû baagwatire antû bonthe mîgwate na babeenderia Endomu. 7 Ngaatûma mwanki kîrî nthingo cia Gasa ûra ûkaarûngûria gûntû kwao kûra kwirigîre na rûthiingo. 8 Nkeenyangia atûûri ba Asindondi na ûra ûgwatîîrîîte mûraagi wa ûnene ndeeni ya Asikeroni. Nkaagarûra njara yakwa îrûe na Ekironi mwanka Mûfirisiti wa mûthia akue,” i bu Mwathani Mwene Inya akuuga.
9 Ûûgû i bu Mwathani akuuga, “N'ûntû bwa meeyia mathatû wana mana ma antû ba Turo, ntiitigana na mûthûûro wakwa, n'ûntû beendeerie Endomu ntûûra yonthe barî nkombo, batagûtindanîra na kîrîîkanîro kîa aruagina. 10 Kwoogu, ngaatûma mwanki nthingooni cia Turo ûra ûkaarûngûria gûntû kûra kwirigîre na rûthiingo.”
11 Ûûgû i bu Mwathani akuuga, “N'ûntû bwa meeyia mathatû, wana kinya mana, ma antû ba Endomu ntiitigana na mûthûûro wakwa, n'ûntû baathiingatire aruagina na ndûûyiû, batarî na kîao nwa kîrîkû. N'ûntû marûrû maao maakanaga kîthingatano, nabu ûrûme bwao bwakanaga bûtarî kîthimi. 12 Ngaatûma mwanki kîrî Temani, ûra ûkaarûngûria gûntû kûra kwirigîre na rûthiingo kwa Bosira.”
13 Ûûgû i bu Mwathani akuuga, “N'ûntû bwa meeyia mathatû, na kinya mana ma antû ba Amoni, ntiitigana na mûthûûro wakwa. N'ûntû rîra baithûkîîre Ngiriandi baathiiyangia mwanka wao, i baatûûndûrire nda cia eekûrû ba Ngiriandi bara barito. 14 Ngaatûma mwanki nthingo cia Raba na mbîîthie gûntû kwayo kûra kwirigîre na rûthiingo. Rîru kwîgue kûrî na nkururo ntugû ya ndûa, ta ruuo rûûnene ntugû ya kîbuubani. 15 Mûnene wa noogo akaathi ûkombooni, amwe na anene bara bangî baake bonthe.” I bu Mwathani akuuga.