Kwînyangua kwa Isiraeri
9
1 Ndoona Mwathani arûngi akubî na kîthînjîro. Aathana akiugaga, “Riinga tûthûmbî twa itugî bia Nyomba ya Ngai na inya mwanka nyomba yonthe iinaine. Twarûkie îgûrû rîa biongo bia antû bonthe. Bara bagaatigara nkabaûraga na rûûyiû. Ûra akaugia atiithi kûraaya, gûtirî nwa ûmwe wao ûkaamonyia. 2 Wana kinya bakeenja mwanka kwa bara bakuû i noo njara yakwa îkaabaruta. Wana kinya bageetia îgûrû, i ku nkaabagûrûkia. 3 Wana kinya bakeebitha îgûrû rîa kîrîma gîa Karimeri, nkabacwa na mbarute oogo. Kinya bakeebitha kuuma kîrî niû mwanka ruungu rwa îria, agu noo nkaatha njoka ya îria îbarûmîre, 4 wana kinya bagataîgwa n'anthû baao, bakathi ûkombooni, nkaathana baûragwe na rûûyiû. Mîbango yakwa kîrî bo, n'îmîthûûku na ti mîega.” 5 Mwathani wa Njûûrî yonthe atongithagia nthî, n'yo îkainaina, bonthe bara batwîre ku bakagwatwa i kîeba. Nthî yonthe îkaûyûra na kûbwa ta muuro wa Naero wa Miisiri. 6 Mwathani Mwene Inya aakîîte mûciî wake îgûrû matuuni, na îgûrû rîa nthî akaiga mûthiûrûûko wa matu maayirû. Eetaga rûûyî rwa îria na akarutûûra nthî îmbûmo. Riîtwa rîake i Mwathani! 7 Mwathani ariuga, “Antû ba Isiraeri, ga ntanthûgaanagîria antû ba Ethiopia wa ta bûra mbûthûgaanagîria? Ntaarutire Afirisiti kuuma Kabutori na Asîîria kuuma Kiri, wa ta bûra naabi ndaabûrutire Miisiri? 8 Niû, Mwathani Mwene Inya, i ndaithîîrîîtie ûnene bûbû bwa wîyia na nkabûthiria buume îgûrû ya nthîgûrû. Îndî ntiithiria nciarwa cionthe cia Njakubu. 9 N'ûntû i ka nkaathana na mbinainie antû ba Isiraeri ta mpempe irî gîcunkiini. Nkabainainia wa kunthe kûra barî mîgongooni. Îndî kinya gapindî kara kaniini gûtirî ko gakaûra. 10 Eeyia bonthe gatîgatî ga antû baakwa bakaûragwa na rûûyiû, bonthe bara baugaga, ‘Kînyamaara gîtitûkinyîîra kana gîtûwatagwata.’ ”Gûcookanîrua gwa Isiraeri
11 Mwathani ariuga ata rî, “Ntugû înu ngaacookeeria ûnene bwa Ndaundi bûra bûkari ta nyomba î ngwîthu yatuîka îganjo. Ngaacookeeria nthingo cia bu ira ciomokangîîte na mbucookanîîrie, nkabuaka kaîrî na ntûme bûkare ta bûra bwakari tene. 12 Na kwoogu, antû ba Isiraeri bakeegwatîra kîra gîtigeere nthî ya Endomu wa amwe na mîgongo yonthe îra yeetirwe îtuîka yakwa,” i bu Mwathani ûra akaarûtha mantû mama akuuga.
13 “Ntugû i ciiyîîte,” i bu Mwathani akuuga,
“Rîra mûkethi agaatangîrua i mûrîmi wa mûraaû,
na mwandi ataangîrue i mûbibi wa ncabiibû,
ndibei yaimbia îkaanyûûrûûka kuuma irîmaani,
na înyûûrûûke kuuma tûrîmaani tunthe.
14 “Ngaacookia antû baakwa ba Isiraeri kuuma ûkombooni, mbareete nthîgûrû yao bagaake maganjo ma taûni ciao kaîrî na batûûre ku, bakaanda mînda ya mîcabiibû na banyue ndibei yayo, bakaanda mînda na barîe kîra bakaanda ku. 15 Nkaanda antû baakwa nthîgûrû îra ndaabeere, na batiikûûrwa kuuma ku kaîrî.” Ûgu i bu Mwathani Ngai wenu akuuga.