Îkaanûkia rîa Njerusaremu
4
1 N'ata thaabu îteete ûthongi bwa yo,thaabu îra ntheru yaatuga.
Maiga ma Nyomba ya Ngaia i manyageere
mîthiani ya tûyîra twa taûni tuunthe.
2 N'ata aana ba goro ba Sayuuni
bara baarî na baita ta thaabu,
îîndî barîoneegwa ta nyûngû cia yûûmba
ta ngûgî ya njara cia mûûmbi.
3 Wana mbwe icinenkanagîra nyonto cia cio,
na igoonkia twana twacio,
îndî aarî ba antû baakwa bathirîîte kîao,
ta nyaga rwanda.
4 N'ûntû bwa bûûta rûrîme rwa kagenke
rûrûmanîîrîîte kanyuani gaako,
aana barîromba biakûrîa,
îndî gûtirî we ûkûbarûmia nwa mbi.
5 Bara baarîîyaga irio biithongi mûno,
i bo bakûgwîra tûyîraani twa taûni n'yûra.
Bara beekagîra nguo cia goro
îîndî bamaamaga muuni.
6 Îkaanûkia rîa antû baakwa
i rînene nkûrûki ya rîa Sondomu,
îra yaayîîrwe i mûthiro gwa kagiita gaakai
na gûtirî muntû akîmîteethia. b
7 Atongoria baao bathararaga nkûrûki ya mbaraabu,c
na barî bayerû nkûrûki ya îria
mîîrî îmîthongi nkûrûki ya maiga ma goro
na baakari ta maiga ma goro meetagwa Cabire.
8 Îndî îîndî bayirûîte nkûrûki ya makara,
Gûtirî we ûbamenyaga barabaraani.
Nkonde yao n'îrûmanîîrîîte na maîndî,
yûmîîte yakara ta nkû.
9 Bara baûragirwe na mpiû i beega
kîrî bara baakuire n'yûûra,
baboobagua i yûûra, bagaceng'a
n'ûntû bwa kwaga biakûrîa mîndaani.
10 Eekûrû bara barî kîao mûno
i baarugire aana baao bongwa,
aana baao baatuîka biakûrîa biao
rîra antû baakwa baathiragua.
11 Mwathani n'onanîtie mûthûûro wake ûmûnene,
eetûûra marûrû maake.
Aakania mwanki Sayuuni
wabîîthia mîcingi yaayo.
12 Anene ba nthî bateetîgia,
kana antû bonthe ba nthîgûrû,
atî aithûki na anthû nwa bathûngîîre
mîîrîgaani ya Njerusaremu.
13 Îndî mantû mamu maakarîkire n'ûntû bwa meeyia ma iroria biayo,
na mathûûkia ma athînjîri ba Ngai baayo,
bara batûûraga nthingooni ciayo,
nthakame ya antû baagîru.
14 Baatarataraga barabaraani
ta antû batakwona,
barî na mathakame
bûra gûtarî we akîenda gûtonga nguo ciao.
15 Antû babaugagîra mbu bakîbeeraga, “Umaani aaga. Bûrî na mûgiro.
Îthiini, îthiini! Bûtigaatûtonge.”
Rîra batoorooka baathi kûriûnga,
antû ba mîgongo baugaga, “Antû baba batiikara gûkû gwetû!”
16 I Mwathani wengwa abanyagaarîîtie,
na atibeeciirîria kaîrî,
gûtirî gîtîîyo kîonanua kîrî athînjîri ba Ngai,
kana eendeera akûrû.
17 I twanogire i gûkûûra meetho,
tûgîceria ûteethio bûtakwonekana.
Irîngooni bietû tûraithîîrîîtie
mûgongo ûra ûtaûmba gûtûteethia.
18 Antû baatûthiingatiire makinya,
kwoogu twaremwa kinya i kûthiîrîîra njîraani cietû.
Mûthia wetû warî akubî, ntugû cietû ciarî i ntare,
n'ûntû mûthia wetû warî ûgûkinya.
19 Bara beengeene naati baarî na mpwî,
nkûrûki ya ndiiû îbuurûûkîrîîte îgûrû,
beenganire naati twaturûka irîma,
na batûkabîra rwanda.
20 Mwîtûûrîrua maguta wa Mwathani,d
ûra wengwa twegwetie
aagwatwa i mîtego yao.
Twathûgaanagia tûrî ûkariani bwake
tûgaatûûra gatîgatî ka mîgongo.
21 Kenaani na bûkûngwîîre biû antû ba Endomu,
biû bûtwîre nthîgûrû ya Usi.
Îndî gîkombe gîa îkaanûkia gîkabûkinyîra,
bûgaatogoona bwanîke ûtheri bwenu.
22 Îkaanûkia rîaku Sayuuni irîûyûru,
Mwathani atiireka bûkara bûrî mîgwate nkûrûki ya ûgu.
Îndî biû antû ba Endomu, agaakaanûkia meeyia meenu,
na aanîke moothûûku meenu.