Îkaanûkia, ûrûrû na kwaga wîrîgîîro
3
1 Ndî muntû woneete kînyamaarakuumania na mûthanju wa mûthûûro wa Ngai.
2 N'ambîngatîîtie na aatûma nthiîra
mwinduuni bantû a werûûni,
3 na mma n'angarûkîîte
kaîrî na kaîrî mûthenya unthe.
4 N'atûmîîte nyama cia mwîrî wakwa na gîkonde kîa mwîrî wakwa bithirania,
na n'aunangîîte maîndî maakwa.
5 N'ankîmbîîte na aancîgîîria
na ûrûrû na kînyamaara.
6 N'atûmîîte ntûûra mwinduuni
ta antû bara baakwire tene mûno.
7 Aanthiûrûkîîrîîtie na nthingo kaingo ntaûmba gûtoorooka,
na anthaîka na nyororo indito.
8 Wana rîra ndeetana na ndaarîra nkîenda ûteethio
we n'arigagîîria maromba maakwa.
9 Aingîîte njîra ciakwa na maiga maacae,
na aakoombia njîra ciakwa.
10 Kîrî niû akari ta ndûba îgiitîrîte
kana cimba yîîbithîîte,
11 n'ankururîîtie ndauma njîraani na antembûranga na nkunyû ciake
na antiganîria naagu ntarî na ûteethio.
12 Aakuuyiirie ûta bwake
amberekereetie mîgwî yake.
13 N'andathire nkoro
na mîgwî yake.
14 Ndaatuîkire wa kûthekagîîrwa na antû baakwa bonthe,
bakîmbinaga na nyîmbo mûthenya unthe.
15 N'ambûyûrîîtie mîri ya gana
na ankuundia ndûrio.
16 N'ambunangîîte magego na maiga
na ankinyangîra mûthetuuni.
17 I ntunyîîtwe ûkiri
na ndaariganîrua bûra gîkeno gîkari.
18 Kwoogu ndauga, “Mwago wakwa n'ûthirîîte
amwe na wîrîgîîro bwakwa kîrî Mwathani.”
Gwîtîgîka, kîao na inya ya Mwathani
19 Ndaaririkana kûnyamaara na kwereera gwakwa
kûra kûrî na gana ta ndûrio.
20 Rîonthe i ndiririkanaga mantû mama,
nkaûyûrwa i kîîthikîîro ndeeni yakwa.
21 Îndî i ndirikanaga ûûgû,
na kwoogu nkagîa na wîrîgîîro.
22 N'ûntû bwa wendo bwa Mwathani bûra bûtathiraga tûtaathirua,
n'ûntû kîao gîake gîtithiraga.
23 Kîîgagua kîrî kîyerû wa kîra rûkîîrî
gwîtîgîka gwake i kûûnene.
24 Ndîbîîraga na nkoro, “Mwathani n'we rûgai rwakwa, n'eranîîte akaammenyeera,a
kwoogu nkamwîrîgagîîra.”
25 Mwathani n'ûmwega kîrî bara bamwetagîîra,
kîrî bara bamûceragia,
26 I bwega gweteera ûkirîîrîîtie
wonokio kuuma kîrî Mwathani.
27 I bwega muntû gûkamata îcoki
rîra arî mwana ûmwîthî.
28 Ga akare nthî arî wenka na akire
n'ûntû Mwathani n'we ûmûnenkereete mûrigo ûyu.
29 Ka eenîke ûthiû bwake enyiîtie
nwa wîgue kûrî na wîrîgîîro.
30 Ka aneenkanîre rûthea rwake kîrî mûmûriingi
na aûyûrwe n'îgi.
31 N'ûntû Mwathani atiitiganîria antû
baake tene na tene.
32 Wana wegua n'areetaga kîeba, akoonania kîao
kûringana na bûra wendo bwake bûra bûtathiraga bûrî bûnene.
33 N'ûntû tika akenaga i kûreeta kîeba
kana ûrûrû kîrî nwa ûmwe.
34 Rîra agwate bonthe ba nthîgûrû
baarangîrwa nthî na magûrû,
35 rîra antû baatuunywa aki ciao
mbere ya ûra arî îgûrû mûno,
36 rîra muntû aagiitîrwa îgamba bûra gûtabatîîrue
anga Mwathani atiîgagua akiona mantû ta mama?
37 N'ûû uuga ûntû na bûgakarîka
Mwathani ateetîgîîrîîtie?
38 Anga ti kuuma kanyuani ka Ûra Arî Îgûrû Mûno
mantû mara mathûûku na mara meega maumaga?
39 I mbi îgaatûma muntû nwa ûrîkû ûrî mwoyo anung'una
aakaanûkua n'ûntû bwa meeyia maake?
Kuumbûra na kwîrira meeyia
40 Ga tûraithîîrie na tûcûnkûûne mîthiîre yetû,
na tûcookere Mwathani.
41 Ga tûûkîîrie nkoro cietû amwe na njara cietû
kîrî Ngai arî îgûrû, na tuuge,
42 “Itwîyîîtie na twaûmia biongo
na ûtitûrekereete.”
43 Wîkunîkîrîîte na mûthûûro na wengana naati,
ûgîtûûragaga ûtarî na kîao.
44 Wîkunîkîrîîte na îtu
kaingo maromba matigaagûkinyîre.
45 Ûtûtuîkithîîtie rûko na thogondi
mîgongooni îra îngî.
46 “Anthû beetû bonthe baatîkîîtie tûnyua
bagîtûrumanga.
47 Tûtegeetwe na twacîgîîrua n'ûguaya
mûthiro na kwînyangua.”
48 Miuro ya meethori n'îgwîtîga kuuma meetho maakwa,
n'ûntû antû baakwa i baathirire.
49 Meethori maakwa makaathi na mbere gwîtîga
matagûtiga,
50 Mwanka rîra Mwathani akaaraitha
kuuma îgûrû oone.
51 Mantû mara nkwona i ma kûmbîkîra kîeba
n'ûntû bwa eekûrû bonthe ba taûni yakwa.
52 Bara baarî ûthû naani gûtarî gîtûmi
baangwîmaga ta kanyoni.
53 Baangerire îrinyaani bakîendaga kûûnduta mwoyo,
na baakunîka mûromo wa îrinya na iiga,
54 rûûyî i rwanthiîkire kîongo
na ndeeciiria i mbûrîîte.
Îromba rîa ûteethio na rîa gûkaanûkua kwa anthû
55 I ndeetire riîtwa rîaku, woû Mwathani,
kuuma mborokerooni ya îrinya.
56 N'wegiirue kayû gaakwa, “Ûtikaûrîrie matû maaku
ndakûrîrîra ûnteethia.”
57 N'wayire akubî naani rîra ndaagwîtire,
na wauga, “Ûtikaamake.”
58 Woû Mwathani wîgîîtue ûrî mûngambîîri
n'wonokeetie mwoyo wakwa.
59 N'woneete moothûûku mara ndûthîrîtwe, woû Mwathani.
Ngambîîra Mwathani!
60 N'woneete bûra kwîrîîria kwao kûgana,
njûri cionthe ira baambîndagîra.
61 Mwathani n'wîgîîtue irumi biao,
njûri cionthe ira baambîndagîra.
62 Bûra anthû baakwa bambaragia na bioye bakîînung'unagîra,
mûthenya unthe.
63 Baraithe!
Barûngi kana bakari nthî
i bancaambagia nyîîmbooni ciao.
64 Barîie wa bûra babatîîrue, îî Mwathani
kûringana na ngûgî cia njara ciao.
65 Ûmia nkoro ciao,
na kîrumi gîaku kîbagwate.
66 Îngana nabo na mûthûûro na ûbathirie
baume nthîgûrû ya Mwathani.