Kîrîro 2

Ngai agiitîra Njerusaremu îgamba

1 N'ata Ngai aguîkîrîîte Njerusaremu, mwarî wa Sayuuni

na îtu rîa mûthûûro wake!

N'akanyanîîtie mwago wa Isiraeri nthî

kuuma îgûrû mwanka nthîgûrû,

ataaririkana nyomba yake,

ûkinyithio bwake bwa magûrû

ntugû ya mûthûûro wake.

2 Atakwonania kîao Mwathani n'amereetie,

ikaro bionthe bia Njakubu,

arî na mûthûûro aaragania

into bionthe bira antû ba Njerusaremu baakîîte beerigarîîria nabio.

N'agwîthîîtie wathani na aathani babu

abariinga nthî na baagîa îgi.

3 Athuurîîte mûno n'athirîîtie

inya yonthe ya Isiraeri.

Aarutaruta njara yake ya ûrîo gatîgatîîni kaao

îra yabarigagîîria kuuma kîrî mûnthû wao.

N'ankanîîte ndeeni ya Njakubu ta rûrîrîîmbî rwa mwanki

rûra rûbîîthagia kîonthe kîra kîrî akubî naru.

4 N'atumîîte ûta bwake ta mûnthû

na njara yake ya ûrîo n'îthuuranîrîîte.

Wa ta maitha n'aûragîîte

bonthe bara twendeete mûno.

Eetûûra mûthûûro wake ûkari ta mwanki

îremaani rîa Njerusaremu, mwarî wa Sayuuni.

5 Mwathani n'atuîkîîte ta mûnthû,

n'amereetie Isiraeri.

N'amereetie nyomba cia ûnene cionthe cia Isiraeri

na eenyangia gûntû kunthe kûra beebithaga.

Aingîia kîeba na irîro

bia Njerusaremu, mwarî wa Njunda.

6 N'arangîîte gîkaro gîake wengwa ta mûnda

na eenyangia bantû aake a kûrîîkanaga.

Mwathani n'atûmîîte Sayuuni ariganîrua

i biatho biao bithuure na Sabatû ciao.

N'ûntû bwa mûthûûro wake n'atiganîrîîtie

mûnene na athînjîri ba Ngai.

7 Mwathani n'aregeete kîthînjîro gîake

na aatiganîria nyomba yake.

Nanenkanîrîîte kîrî anthû

nthingo cia nyomba cia ûnene cia Isiraeri,

anthû baûkiirie nkururo Nyomba ya Ngai

bûra ciugagwa ntugû cia gûkûngwîra biatho bithuure.

8 Mwathani n'erutanîrîîtie kwomborania

nthingo ira ciirigîrîîte Njerusaremu, mwarî wa Sayuuni.

N'atambûrûkîîtie kîthimi gîake

na atatîîria njara yake kwînyangia.

N'atûmîîte ngiri na nthingo irîra

cionthe ciagwa mbere yake.

9 Mîîrîga yaayo n'înywîte nthî

aunanga mîrîîgo ya mîîrîga na amîînyangia.

Anene na atongoria babu baangî baayo i baatae bairwa mîgongooni.

Kwao gûtirî ûrutani kuuma kîrî Ngai

wana iroria biao bitionaga

bioneki kuuma kîrî Mwathani.

10 Akûrû ba Njerusaremu, mwarî wa Sayuuni

bakarîîte nthî bakiri ki,

baamincîria biongo biao mûthetu,

na beekîra mathango.

Aarî ba Njerusaremu,

i beenîkîîte îthirî.

11 Meetho maakwa i maanogu i kûrîra,

i nkûbîîra ndeeni,

nkoro yakwa îrî na kîeba mûno,

n'ûntû antû baakwa i baathirie

n'ûntû aana na tûgenke i tûkûgirîkîra

tûyîraani twa taûni.

12 Barîragîra bagina bakiugaga,

“Birîkû irio na biakûnyua?”

Bakîgirîkaga ta antû batoonyange

tûyîraani twa taûni

Bakinyaarûkîra

ibaraani bia bagina.

13 N'ata mbûûmba kuuga îgûrû rîaku?

I mbi mbûûmba gûkûbuanaania n'yo,

woû mwarî wa Njerusaremu?

I mbi yoo nkûbuanania n'yo

ngagûkirakiria

Woû Njerusaremu, mwarî wa Sayuuni?

Ironda biaku biînjûkîîte na biorokera ta îria.

N'ûû ûûmba gûkworia?

14 Bioneki bia iroria bienu

i bia ûrongo na bia waa.

Bitaumbûra meeyia meenu

birigîîria bûtaîgwa.

Ûroria bûra baabwîraga

Bwarî bwa ûrongo bwa kûbûbîtithia.

15 Bara bonthe bakûrûkagîîra kwenu

i babûthekagîîra

bagaciia na bakainainia biongo biao

n'ûntû bwa mwarî wa Njerusaremu.

Bakaûria, “Îîndî îno n'yo taûni îra yeeragwa

n'înthongi mûno,

na n'yo gîkeno kîa nthîgûrû yonthe?”

16 Anthû beenu bonthe baatîkîîtie tûnyua

bakîbûrumanga.

Babûthekagîîra na kînyûrûnto na rûmena,

bakauga, “I tûramûthiriirie

Ntugû îno n'yo tûreetereete

na mûthiani îgûkinya!”

17 Mwathani n'ararûthire bûra aabaangîîte.

N'aûyûrîîtie kiugo gîake

kîra augire tene mûno.

N'enyangîîtie Njerusaremu atarî na kîao

aatûma anthû beenu babûnaanûkîra

aûkîîria inya ya maitha meenu.

18 Nkoro cia antû

icikûrîrîra Mwathani.

Ûi nthingo cia Njerusaremu, mwarî wa Sayuuni,

ka meethori meenu meetîge ta muuro

ûtugû na mûthenya.

Ûtikeende kûnogoka

kana ûtiga kûrîra.

19 Ûkîîra ûrîre ûtugû,

bara bakaragia ûtugû bakîanjîîria ngûgî.

Îtûûra nkoro yaku ta rûûyî

mbere ya Mwathani.

Ûkîîria njara ciaku kîrî we

n'ûntû bwa ûtûûro bwa aana baaku

bara bakûnyaarûka n'yûra

mîthiani ya tûyîra tunthe twa taûni.

20 Raitha Mwathani na ûraithîîrie

kûrî ûngî warorûthîra ûûgû?

Ka eekûrû bakaarîa aana baao

bara baamenyagîîra?

Ka athînjîrî ba Ngai na iroria bakaûragîrwa

Nyomba ya Mwathani?

21 Aana baîthî na akûrû bataambaarîîte nthî amwe

mûthetuuni naagu tûyîraani,

nthaka na aarî

i baûragîîtwe na mpiû.

N'wabaûragire ntugû ya mûthûûro waku

wabang'eera ûtarî na kîao.

22 Wa ta ntugû ya kîatho,

wambîtîîre anthû baakwa baamakia kuuma mbarî cionthe.

Na ntugû ya mûthûûro wa Mwathani

gûtirî we aamonyia

bara ndaaciarire na ndaamenyeera

anthû baakwa i baabaûragire.