KÎRÎRO
Kîeba kîa Njerusaremu
1
1 N'ata taûni înu îrî na îbooru,na n'wabu yaûyûri antû!
Îîndî îkari ta mûk'wantigwa,
na yarî îgweta mîgongooni.
Yaarî ta mûnene wa mûka wa nthîgûrû,
îîndî îtuîkîîte ta nkombo.
2 Araaraga kûminûka ûtugû,
meethori marî mpouni ciake.
Gatîgatî ka anyaanya baake,
gûtirî na wa kûmûkirakiria.
Acoore baake bonthe i bamûkunyanîrîîte,
baatuîka anthû baake.
3 Nyuma ya kînyamaara na ngûgî imbûmo,
antû ba Njunda bagûtaîwa.
Batwîre gatîgatî ka mîgongo,
bationaga bantû a kûnogoka.
Bonthe bara beengeene nabo i baabagwatagwatire
barî thînaani înene.
4 Barabara cia kûthi Sayuunia irî na kîeba,
n'ûntû gûtirî bo bathiiyaga biathooni biathûre.
Mîîrîga yayo yonthe n'îmîtheri,
athînjîrî ba Ngai baayo i bagûkaya.
Aarî baayo barî na kîeba,
Sayuuni îrî kînyamaaraani.
5 Anthû baayo i batuîkîîte arûngamîîri baayo,
bara bamîmeneete i baaganîre.
Mwathani n'we ûreeterete Sayuuni kîeba,
n'ûntû bwa meeyia maayo maingî.
Aana baayo i bataîtwe baatuîkithua mîgwate,
i mîgwate mbere ya anthû baao.
6 Mwago unthe n'ûthaamîîte
kuuma kîrî Njerusaremu, mwarî wa Sayuuni.b
Atongoria baake bakari ta nkûrûngû
itakûrî kwona ndîîthia,
baugagia batakwîbûmbîra
mbere ya bara beengeene nabo.
7 Îgiitaani rîake rîa kûnyamaara na kwereera,
Njerusaremu n'akûririkana ûtonga bunthe bûra aarî nabu agu mberec
Rîra antû baayo baagwîre njaraani cia anthû
gûtirî we amûteethia.
Anthû baayo bamîraithagîîria
bakamîthekeera îkîînyangua.
8 Njerusaremu n'eyiirie mûno,
yaakara ta mûka ûrî na mûgiro.
Bara bonthe baamûtîîyaga i bamûbûthagia,
n'ûntû i boonire ûtheri bwake.
We wengwa nwaka akayaga
akîûndûkaga n'îgi.
9 Rûko rwake rûrûmîîrîîte nguoni ciake,
îndî ataamakîra ûtûûro bwake bwa nyumaani.
Kûgwa gwake kwarî gwa kûmakania,
gûtaarî na muntû wa kûmûkirakiria.
Augaga, “Raitha Mwathani wone kînyamaara gîakwa
n'ûntû mûnthû wakwa n'ancindîîte.”
10 Mûnthû ataambûrûkiirie njara
aathûkia ûtonga bwake.
N'onire antû ba mîgongo
bakîthûngîra nyomba yake ya Ngai,
antû bara waugire batikaathûûngîre
ngwatanîrooni ya antû baaku, woû Ngai.
11 Njerusaremu nîgûkaya
îgîceria biakûrîa,
yaakûûraniirie ûtonga bwa yoo na biakûrîa,
kaingo îgîa na inya.d
Yuugaga, “Raitha Mwathani wone
bûra nkûbûthîîrua.”
12 Gûtirî bu bûkwona biû athii na njîra?
Ta raithaani bwone.
Kûrî kûnyamaara kûngî gûkari ta gûkû gwakwa
kûra ndeetereetwe,
kûra Mwathani aandeetere
ntugû ya mûthûûro wake ûmûnene?
13 Eendamiirie mwanki kuuma îgûrû,
acutûma maîndîîni maakwa.
Aara neeti angwata n'yo mbayo
ancookia nyuma.
Aambîkîra îbooru
ndaakara nkîîgagua naaî mûthenya unthe.
14 Meeyia maakwa i matumanîîtue maatuîka îcoki,
amatumania na njara ciake.
Ambîkîrîîte mo nkingo,
na nanthirîîtie inya.
Mwathani n'anenkanîrîîte njaraani
cia bara ntaûmba kûûmîîria.
15 Mwathani n'areganîîte
na ncamba ciakwa cionthe cia ndûa gatîgatîîni gaakwa
na aatua kîatho gîa kûmbithûkîra
athithira nthaka ciakwa.
Kîbibiini gîake kîa ndibei n'athithirîîte,
Njerusaremu, mwarî wa Njunda.
16 Gîku i kîo gîgûtûma ndîra
na meetho maakwa maûyûra meethori,
n'ûntû gûtirî we arî akubi wa gûûnkirakiria
na wa kûmbîkîra mwoyo.
Aana baakwa barî na îbooru,
n'ûntû anthû baakwa i bankîrîîtie inya.
17 Sayuuni ataambûrûkîîtie njara ciake,
na gûtirî we wa kûmûkirakiria.
Mwathani aathanîîte ûûgû îgûrû rîa Njakubu,e
atûûri ba Njakubu bagaatuîka anthû baake,
Njerusaremu atuîkîîte ta gîntû kîrî na mûgiro
gatîgatî kaao.
18 “Mwathani n'ûmwagîru,
îndî niû imbagaarîîte biugo biake.
Thikîîriani biû mîgongo yonthe,
eneeni mînyamaaro yakwa.
Aarî baakwa na nthaka ciakwa
i bataîtwe baatuîka mîgwate.
19 Ndeetire anyaanya baakwa
îndî nabo bankunyanîra.
Athînjîri ba Ngai na akûrû baakwa
bakûthirîra taûni
bagîîcereria irio
giria bagaakua n'yûûra.
20 Mwathani raitha wone bûra nyamaarîîte nkoro,
i nkûthirîra ndeeni,
na nkoro yakwa n'întangîku
n'ûntû i ndegeete gûkwathîkîra.
Naagu ome antû i bakûûragwa na mpiû
ndeeni n'yo i gîkuû kîûyûri ku.
21 Antû i beegîîtue ngîkaya
ntarî na muntû wa kûmbûmîîria.
Anthû baakwa bonthe i beegîîtue bûra nyamaarîîte
na bagakeneera bûra ûndûthîîte.
Ûrootûma ntugû îra waugire îkinya,
nabo baroonyamaara wa ta niû.
22 Raithîîria ûthûûku bwao bunthe Mwathani.
Naawe ûbarûthe
wa ta bûra wandûthire
n'ûntû bwa meeyia maakwa maingî mûno.
I nkayîîte mûno
na nkoro yakwa n'îthirîîte inya.”