Kîeba kîa matigari na îromba rîa gûcookanîirua kwa Njerusaremu
5
1 Ririkana woû Mwathani mantû mara matûkarîkîrîîte,Raitha wone îgi rîra tûgîîte.
2 Nthî yetû n'yathûkiirue n'antû ba kuuma kûngî,
na mîciî yetû yathi na ageni.
3 Twatuîkire twana tûkea na tûtarî na beethe,
ba taata baatuîka aka ba ntigwa.
4 Rûûyî rwa kûnyua i tûgûraga,
kinya nkû cietû i twendagîrua.
5 Bara beengeene naati barî akubî gûtûgwatagwataa
tûrî baanogu îndî tûtikwona kînogoko.
6 I tweneenkanîîre kîrî Miisiri na Asîîria
kaingo twona irio bia kûgana.
7 Ba baaba beetû i beeyiirie na batirî oogo,
na îkaanûkia rîao irîtûcookereete.
8 Nkombo i cio itwathaga,
na gûtirî wa gûtûtuunyûkia kuuma inyaani yacio.
9 Twonaga irio na njîra ya gwîkîra ûtûûro bwetû ûgwatiini,
n'ûntû nwa tûûragîrwe na rûûyiû rwanda.
10 Nkonde cia mîîrî yetû ciakanaga mwanki ta riiko,
n'ûntû bwa bûra tûkûnyamaara i yûûra.
11 Eekûrû bagwatagwa kîa inya taûni ya Sayuuni
aarî beetû bakagwatîrwa taûniini cia Njunda.
12 Aana ba atongoria beetû bacuurîîtue na njara ciao,
na akûrû nabo batineenkagîrwa gîtîîyo.
13 Nthaka n'ikaagîîrua kûthia na maiga,
twana twa twîyî tûkaûragithua mîrigo ya nkû.
14 Akûrû i baumire mîîrîgaani ya taûnib
na nthaka nacio ciatiga kwina.
15 Gîkeno gîa nkoro cietû i kîîthiru
nyîmbo cietû cia gîkeno i cituîkîîte cia kîrîro.
16 Kîraûni i kîgwîte kîauma kîongo gîetû.
Tûkoona thîîna n'ûntû itûrûthîîte meeyia.
17 N'ûntû bwa ûgu nkoro cietû i cimbayie,
n'ûntû bwa ûgu, meetho meetû i maarimu.
18 N'ûntû bwa Kîrîma gîa Sayuuni kîra gîtigîîtwe kîrî na îbooru,
i mbwe cianganagîra ku.
19 Îndî woû Mwathani wathanaga tene na tene,
ûnene bwaku i bwa nciarwa cionthe.
20 I mbi îtûmaga ûtûriganîrua tene na tene?
I mbi îtûmaga ûtûtiganîria îgiita rîîraaya ûgu?
21 Tûcookanîîrie Mwathani, kaingo tûcooka kîrî woû,
ûtûcookerie mwago ûra twarî nau agu mbereeni,
22 Nwa kana ingî Mwathani ûkeegua ûtûtiganîrîîtie kûrû,
na wathûûra i tiû nkûrûki ya kîthimi.