51
1 Ûûgû i bu Mwathani akuuga,“Cûûbaani, ndî akubî gûûkîîria kîrundu kîa wînyangia
kîînyangie Mbabironi na antû ba Rebukamai.a
2 Ngaatûma ageni kîrî Mbabironi bamîere
na batige nthîgûrû yake îrî ntheri,
bamiinyîke mbarî cionthe
ntugû înu ya kînyamaara.
3 Gûtikaagîte muntû agaatuma ûta,
kana eeboga mathaga ma ndûa.
Bûtigaatigarie nthaka ciao
bûthirie cwe njûûrî yake yonthe ya ndûa.
4 Ka bagwe nthîgûrû barî bakuû Mbabironi,
na bara bagurarie mûno bagwe barabaraani.
5 N'ûntû Njunda na Isiraeri ititiganîrîîtue
i Ngai wao, Mwathani Mwene Inya,
kinya wegua nthîgûrû yao nîûyûri mabîtia,
mbere ya Ûra Mûtheru wa Isiraeri.
6 Ugiani buume Mbabironi!
Bwonokie mîoyo yenu!
Bûtikaaye kûûragwa n'ûntû bwa wîyia bwake.
I kagiita ka Mwathani ga kwîrîîria,
akamûrîa wa bûra kûbatîîrue.
7 Mbabironi yarî ta gîkombe kîa thaabu njaraani ya Mwathani,
aatûma nthîgûrû yonthe îtogoona.
Mîgongo yaanyua ndibei yake,
na n'ûntû bwa ûgu bauma nkoma.
8 Nthûti îmwe Mbabironi yagwa nthî yaaragana,
mîrîrîreeni!
Ceriani mûtheega
n'ûntû bwa maronda maake mara arî namo,
aûmba kwora.”
9 “I twageriirie mûno kworia Mbabironi,
îndî n'yo îtikîoreka.
Tuumeeni ku woora muntû athi bwa nthîgûrû yao,
n'ûntû îgamba rîake irîreeteetwe i Mwathani,
ûra atûûraga îgûrû.
10 Mwathani n'atûrwîrîîrîîte,
ncûûni tûkeerane Sayuuni
bûra Mwathani Ngai wetû arûthîîte.
11 Noorani mîgwî,
na bûthûkie rong'o!
Mwathani n'aûkîîrîîtie irundu bia anene ba Mendia,
n'ûntû n'akwenda kûthiria Mbabironi.
Mwathani akaarîia,
eerîîrie n'ûntû bwa nyomba yake îra ntheru.
12 Ûkîîriani bendeera îgûrû rîa nthingo cia Mbabironi rûrî rwano rwa kwithûkîra Mbabironi!
Ongeeraani akaria na bwaige antû bûcîgîîrie taûni!
Mwathani akaûyûria mûbango wake,
na arûthe bûra augire n'ûntû bwa antû ba Mbabironi.
13 Woû ûtûûraga ndûûyîîni inyingî
na ûrî na ûtonga bwingî mûno,
mûthia waku ûgûkinya,
kagiita gaaku ga gûkua.
14 Mwathani Mwene Inya wengwa auga,
‘Na mma ngakûûyûria antû baingî ta mûrumbî wa ngige,
nabo bagaûkia nkururo bagûcinda.’
15 Aûmbire nthîgûrû na inya yake wengwa,
na amîanjîîria na ûûme bwake,
na ataambûrûkia îgûrû gûkûrûkîîra kwerewa wake.
16 Rîra agondokaga, rûûyî rûra rûrî îgûrû i rwinainaga,
na agatûmaga matu mauma mîthia ya nthî.
Agatûma rweni na mbura
na akareeta ruuo kuuma makûmbîîni maake.
17 Muntû wonthe n'ûmûriitu,
na atirî na ûmenyo,
aturi ba thaabu i bagîîte îgi
n'ûntû bwa mîbuanaano yao.
N'ûntû mîbuanaano yao n'ya ûrongo
na îtirî mîruke ndeeni yaayo.
18 I cia ûtheri, gîntû gîa kûmeneerua,
rîra kagiita ka îgamba gagaakinya, îkeenyangua.
19 Ûra we arî Ngai wa Njakubu atikari ta ino,
n'ûntû n'we mûûmbi wa into bionthe,
wana kinya antû bara eetaga baake,
Mwathani Mwene Inya i rîo riîtwa rîake.”
20 “Mbabironi, i woû ncûgûma yakwa ya ndûa,
i woû ndaatûmîîre kwaragania mîgongo
na kwînyangia moonene,
21 i woû ndaagûtûmîîre
kûthiria mbaraathi na athiithia baacio,
na i woû ndaagûtûmîîre,
kwînyangia nkaarî cia mbaraathi na athiithia baacio
22 i woû ndaatûmîîre gûkanyakanya arûme na aka,
antû baakûrû na baîthî
nthaka na aarî
23 i woû ndaatûmîîre gûkanyakanya arîîthi na nyamû ciao cia ndîîthia,
arîmi na ng'ombe,
mangabana na atongoria bara bangî.”
24 Mwathani ariuga ata rî, “Nkaarîia Mbabironi na bonthe bara batwîre Mbabironi bwinthe bûkîonaga, n'ûntû bwa ûthûûku bûra barûthîîte Sayuuni.
25 Ndî na ûthû naawe,
woû kîrîma kîra kîînyangagia,
woû wînyangagia nthîgûrû yonthe.
Ngagûtambûrûkîria njara yakwa
nkwingiritie uume maigaani îgûrû
nkûrûthe ta kîrîma gîtakîbîa kaîrî,”
i bu Mwathani akuuga.
26 “Gûtirî muntû akaathûkia iiga nwa rîmwe rîaku arîtuîkithia rîa koona,
kana arîtuîkithia rîa mûcingi
n'ûntû ûgaatuîka îganjo tene na tene,”
i bu Mwathani akuuga.
27 “Ûkîîriani kîbendeera kîa ndûa nthîgûrû!
Ringaani rûgoci rwa ndûa kîrî mîgongo yonthe!
Thuuranîraani mîgongo îkarûe n'we,
îtaani moonene ma Ararati, Mini, na Asikenasi.
Bûthuure mûtongoria wa ndûa ûra akaarûa n'we.
Bûtûme mbaraathi cia ndûa imbiingî ta mûrumbî wa ngige.
28 Thuuranîraani mîgongo îkarûe n'we,
anene ba Amende,
mangabana na atongoria bara bangî baao,
na nthîgûrû cionthe ira baathaga.
29 Nthîgûrû n'îkwinaina na kwînyoora n'ûrûrû,
n'ûntû mûbango wa Mwathani kîrî Mbabironi ûtiragarûka
wa gûtuîkithia Mbabironi îganjo
kaingo gûtagîta nwa ûmwe agaatûûra ku.
30 Ncamba cia ndûa cia Mbabironi i ciratigire kûrûa
barîkara wîbithooni bwao
bathirîîte inya cwe
baakara ta aka.
Nyomba ciake n'imbîîthie
na ikongoro bia kwinga mwîrîga biaunangwa.
31 Mûtûmwa ariugia agakomana na ûra ûngî
bonthe bathiîte kwîra mûnene wa Mbabironi
atî taûni yake n'îthûkiirue yonthe kwanjîîria
mwanjîîrio mwanka mûthia.
32 Mariûko ma kûringîra miuro makûgwatwa,
n'yo nyaki îra ndaaya,
na acikaarî baaguayua.”
33 Ûûgû i bu Mwathani Mwene Inya, Ngai wa Isiraeri akuuga,
“Mwarî wa Mbabironi akari ta rwara rwa kûbûûrîra
kagiita kara rûraangîîtwe,
kagiita ga gûkethwa wake gakaaya rua.”
34 “Nebukandinesa mûnene wa Mbabironi n'atûthirîîtie,
n'atûmîîte twarigicana,
atûtuîkithia ta gîntû kîîtheri.
Atûmeria ta njoka îra nene,
aûyûria nda yake into bietû bira bithongi
aacooka atûtaîka.
35 Bara batûûraga Sayuuni bakauga,
‘Kûthîîna kûra twathîîniirueb kûroorîithua Mbabironi.
Nabo bara batwîre Njerusaremu bauge,
Nthakame yetû îroorîua bara batûûraga Mbabironi.’ ”
36 Kwoogu ûûgû i bu Mwathani akuuga:
“Niû nkabûtheteera
na mbûrîîrie
nkaabwethia îria rîake
na ntûme ithima biake bibwa.
37 Mbabironi îgaatuîka îganjo,
ara ncûûgi ciîbithaga,
îtuîke gîntû gîa kûmakanithia,
bantû gûtarî we atûûraga ku.
38 Antû baayo bonthe bakaaruruma ta cimba,
na banyinyire ta biana bia cimba.
39 Îndî rîra baagwatwa n'ûrûme,
nkabarûthîra kîatho
mbatogoonie
kaingo bakurura bakîthekaga
bacooke bamaame batagîûka,”
i bu Mwathani akuuga.
40 “Nkaabareeta
ta tûgondu twirîîtwe kîthînjîrooni
ta ntûrûme na nthenge.
41 N'ata Sesaki aithûkîrwa,
ûra nthîgûrû yonthe yîîkumagîria,
ataîgwa!
N'ata Mbabironi îtuîkîîte gîntû gîa kûmakanithia
kîrî mîgongo yonthe.
42 Îria rîgûkunîkîra Mbabironi,
yakunîkîrwa i mûrurumo warîo wa mîkumbîîrî.
43 Taûni ciake i gûtuîka maganjo,
nthî îmbûmo na ng'aarû.
Nthîgûrû gûtarî we atûûraga ku,
kana muntû nwa ûrîkû akûrûkîîra ku.
44 Ngaakaanûkia Beri ngai ya Mbabironi,
na ntûme ataîka bira aameriirie.
Gûtirî mîgongo igaatongorokana îthiîte kîrî we kaîrî
na rûthingo rwa Mbabironi rûkoomoka.
45 Antû baakwa, umaani ku!
Bûkuthûke bûteethie mîoyo yenu!
Kuthûkaani buume kîrî mûthûûro ûmûnene wa Mwathani.
46 Ûtigaakue nkoro kana ûguaya
rîra nguutû cia mantû ikwîguika nthîgûrû,
rûguutû rûmwe rûkaaya mwanka ûyû, rûngî rûkaaya ûyu ûngî,
nguutû cia ntitigano nthîgûrû
na cia mûnene gûûkîîra ûra ûngî.
47 N'ûntû kagiita ûmma gakaaya
rîra ngakaanûkia ngai cia ûrongo cia Mbabironi,
nthîgûrû yake yonthe îkaagîa îgi
na bara baake baûrage bonthe bagaatungumana nthî gûku gwake.
48 Rîru îgûrû na nthîgûrû na bionthe bira birî ku,
bikaugîîria i gîkeno îgûrû rîa Mbabironi,
n'ûntû eenyangia baumîîte bwa îgûrû
bakaaya bamwithûkîre,”
i bu Mwathani akuuga.
49 “Mbabironi n'yaûragire antû baingî ba Isiraeri
na kinya ba mîgongo îîngî îmiingî
kwoogu nwa mwanka yîînyangue.
50 Biû bwamonyokire rûûyiû,
umagaraani bûthi na bûtikaathiûrûûke aaga!
Bûririkane Mwathani bûrî nthî ya kûûraaya,
na bûthûgaanagîrie Njerusaremu.”
51 “Tûkwîgua nthoni na twekîrwa îgi,
n'ûntû ageni i bathûngîrîte gûntû kûra kûtheru
kwa Nyomba ya Mwathani.”
52 Mwathani ariuga, “Kagiita i kaayîîte,
kara ngaakaanûkia ngai cia ûrongo cia Mbabironi,
na nthîgûrûûni yake yonthe
bara bagurarie bagaakaya.
53 Wana kinya ûkeegua Mbabironi ikinyîîte matuuni
na akairiga agu na nthingo iindiku,
nwa ngaatûma eenyangia beenyangie taûni înu,”
i bu Mwathani akuuga.
Mbabironi yenyangua cwe
54 Mwathani ariuga, “Thikîîriani kayû ga kîrîro kuuma Mbabironi,
kayû ga kwînyangua kûûnene
kuuma nthîgûrû ya Ambabironi.
55 Mwathani arî akubî kwînyangia Mbabironi,
agaakiria gîtuma gîake kîîthûûku.
Njûûrî ya ndûa îrîtangîrîkana ku ta makûmbî ma rûûyî îriani,
mûrurumo wa tûyû twao ûkeeguîka.
56 Baayîîte kwînyangia Mbabironi,
bagwata acikaarî baayo na nta ciao baunanga.
N'ûntû Mwathani i Ngai wa kûrîithia
agaakaanûkia Mbabironi bûra kûbatîîrue.
57 Ngaatûma atongoria baake na antû bara baûgî batogoona,
wana kinya mangabana, atongoria ba njûûrî na acikaarî baake,
bakaathi kûmaama
na batikooroûkîîra,”
i bu Mûnene akuuga, ûra riîtwa rîake eetagwa Mwathani Mwene Inya.
58 Ûûgû i bu Mwathani Mwene Inya akuuga,
“Rûthingo rûûriku rwa Mbabironi rûkoomorangwa,
na mîrango ya mîîrîga yao îmînene îbîîthue na mwanki.
Into bionthe bira antû batiiraga muuru bagîceria bionthe bigaatuîka nkû cia kûbîîthua i mwanki.”
59 Îno n'yo ntûmwa îra Njeremia aaneenkeere Seraya mûruti ngûgî wa mûnene Sendekia mwana wa Neria, mwana wa Maaseya, rîra aathiire Mbabironi barî na Sendekia mûnene wa Njunda mwankaani wa îna wa wathani bwake. Ngûgî ya Seraya yarî kûbangania bantû ara mûnene aakaraga ûtugû. 60 Njeremia n'andîkîîte îbukuuni inyamaara bionthe bira biarî bikaayîîra Mbabironi. Mantû mamu monthe maandîkîîtwe îgûrû rîa Mbabironi. 61 Njeremia eera Seraya, “Rîra ûgaakinya Mbabironi wone atî ûkûthooma biugo bibi nainya. 62 Rîru uuge, ‘Îî Mwathani, uugîîte ûkeenyaangia gûntû gûkû, bûra gûtarî muntû kana nyamû yûûmba gûtûûra ku, gûgaatuîka gûûtiganîrie tene na tene.’ 63 Warîîkia kûthooma îbuku rîrî nainya, ûrîogeere iiga na ûrîgere muurooni wa Yufîrîti. 64 Rîru uuge, ‘Ûgu i bu Mbabironi îkaariama na îtiiriamûka kaîrî n'ûntû bwa kînyamaara kîra nkaamîreetera. Na antû baayo bonthe bakaagwa.’ ”
Biugo bia Njeremia bithirîrîîte aaga.