Njeremia 52

Kûgwa kwa Njerusaremu

1 Sendekia aarî na ûkûrû bwa mîanka mîrongo îîrî na ûmwe rîra aatuîkire mûnene wa Njunda. Na aathana mîanka îkûmi na ûmwe arî Njerusaremu. Gina eetagwa Amutari mwarî wa Njeremia wa kuuma taûni ya Ribuna. 2 Sendekia n'arûthire mantû mathûûku mbere ya Mwathani, wa ta bûra Njeoyakimu aarûthire. 3 N'ûntû bwa mûthûûro wa Mwathani mantû mamu i maakarîkire Njerusaremu na Njunda mwanka rîra aabarutarutire mbere ya ûthiû bwake.

Sendekia n'aûmîîrie mûnene wa Mbabironi kîongo. 4 Kwoogu mwankaani wa kenda wa wathani bwa Sendekia, ntugû ya îkûmi ya mweri wa îkûmi, Nebukandinesa mûnene wa Mbabironi auma na njûûrî yake aithûkîra Njerusaremu, na baamba marema maao ome ya taûni na baaka nthingo cia kûmîkîîmba kûmîthiûrûkîîra. 5 Taûni înu yakarire îrî ncîgîîrie mwanka mwanka wa îkûmi na ûmwe wa wathani bwa mûnene Sendekia. 6 Ntugû ya kenda mweriini wa înna, rîra yûûra rîathûûkire mûno taûni înu na antû bonthe batoonaga gantû ga kûrîa, 7 rûthiingo rwa taûni rwomorwa, na njûûrî yonthe yauma na yaûra. Yaumire taûni ûtugû gûkûrûkîîra mwîrîga ûra warî gatîgatî ka nthingo ciîrî akubî na mûnda wa maûa wa mûnene, kinya ûkeegua Ambabironi i baathiûrûkîrîîte taûni. Baathiire batarîîte bwa kîbonde kîa Njorondani. 8 Îndî njûûrî ya Mbabironi yathiingata mûnene Sendekia na yamûgwatagwatîra mîaranthî ya Njeriko. Na njûûrî yake yonthe yathûkana n'we yanyagaara. 9 Rîru baagwata mûnene bamwira kîrî mûnene wa Mbabironi naagu Ribura nthîgûrû ya Amathi, na amûgaambithia amûgiitîra îgamba. 10 Mûnene wa Mbabironi aûragîra nthaka cia Sendekia naagu Ribura Sendekia akîonaga, na aacooka aûraga atongoria bonthe ba Njunda. 11 Rîru aatûra Sendekia meetho, na amwoga na nyororo cia rûthuku kaingo amwira Mbabironi. N'we Sendekia aakarire nceera naagu Mbabironi mwanka ntugû îra aakuire.

12 Tarîki îkûmi mweri wa îtaano, mwankaani wa îkûmi na kenda wa wathani bwa Nebukandinesa mûnene wa Mbabironi, i rîo Nebusarandani mûtongoria wa akaria bara baatûmîkagîra mûnene aakinyire Njerusaremu. 13 Aabîîthia Nyomba ya Mwathani, gîkaro kîa mûnene, na nyomba cionthe cia Njerusaremu, aabîîthia nyomba yonthe îra yonekanaga îrî gîtûmi taûni înu. 14 Rîru njûûrî yonthe ya Mbabironi bara baarî nwe, boomoranga nthingo cionthe ira ciathiûrûkîrîîte Njerusaremu. 15 Nebusarandani mûtongoria wa akaria ba mûnene aira antû bara baatigeere taûni înu ûkombooni, na atea bara baatigeere amwe na bara baarî bakwînenkanîra kîrî mûnene wa Mbabironi. 16 Îndî aatigaria antû bamwe ba bara baarî nkîa injerû ce ba nthîgûrû înu kaingo barîmagîra mîcabiibû na kûmenyeera mînda.

17 Ambabironi baunanga itugî bia rûthuku bira biarî Nyomba ya Mwathani, na ikinyithio bia îtangi rîa rûûyî rîa rûthuku biûmba kûthiyangua, îtangi rîra rîarî Nyomba ya Mwathani, na baakamata rûthuku runthe baira Mbabironi. 18 Na i baathûkiirie into bionthe bia rûthuku bira biatûmagîrwa Nyomba ya Mwathani, nyûngû, macembe, mîgwati, mbakûri, na into bia kûrîîra. 19 Mûtongoria ûyû wa akaria ba mûnene aathûkia into bionthe bira biarûthîîtwe na thaabu kana fetha ta bio, tûraî, into bia gwîkîra muu, mbakûri cia kûminca igongwana bia ndibei, nyûngû, itugî bia kûrûngîka taa na mbakûri ira ciatûmagîrwa n'ûntû bwa kîgongwana kîa biakûnyua. 20 Rûthuku kuuma itugîîni, îtangi na mîbuanaano ya ncamba cia ng'ombe cia rûthuku îkûmi na ciîrî ruungu rwa rio, amwe na ikinyithio biûmba kûthiyangua, bira mûnene Soromoni aarûthîîte n'ûntû bwa Nyomba ya Mwathani, rwarî rwingî na rûtikîthimîka. 21 Ûraaya bwa wa kîra gîtugî bwarî biiti mîrongo îîrî na mûgwanja gwîtia na biiti îkûmi na inyanya mûthiûrûûko wa ûmatu bwakîo. I biarî na îkurungu na rûthuku rwarî na ûmatu bwa inci ithatû. 22 Wa kîra gîtugî i kîarî na nkoobia ya rûthuku ya nkûrûki ya ûraaya bwa biiti mûgwanja na nucu igemeetue na rûthuku rûrûthîîtwe mbica mwanya mwanya. Mbica imwe ciarî cia nyororo na ira ingî cia matunda ma kûngûmanga kûthiûrûkîîria kunthe. 23 I kwarî na mîbuanaano îgana ya matunda ma kûngûmanga îbanganîîtue bwega îthiûrûkîrîîte wa kîra gîtugî, na mîrongo kenda na îthanthatû n'yonekanaga kuuma bwa nthî.

24 Nebusarandani aagwata Seraya mûthînjîri ûra mûnene wa Ngai, Sefania ûra aarî mûthînjîri wa Ngai ûra aarî wa akubî mûno ruungu rwa rwake, na akaria bathatû ba mûrango. 25 Kîrî bara baatigeere taûni aathûkia mûrûngamîîri wa antû ba ndûa, na antû mûgwanja eeyani ûkûrû ba mûnene. Kinya aathûkia mwandîki ûra aarî mûtongoria mûnene wa kûrûngamîîra wandîkani bwa acikaarî ba nthîgûrû na antû baake mîrongo îthanthatû bara beethîîrwe taûni. 26 Nebusarandani abathûkia bonthe abairîra mûnene wa Mbabironi naara Ribura. 27 Nebukandinesa abaûragîra bonthe naagu Ribura nthîgûrû ya Amathi.

Kwoogu antû ba Njunda baataîgwa baarutwa nthîgûrû yao. 28 Ûyû nuu mûgana wa antû bara Nebukandinesa aataire mwankaani wa mûgwanja wa wathani bwake:

antû ngiri ithatû na mîrongo îîrî na bathatû ba Njunda;

29 mwankaani wa îkûmi na înaana,

antû magana manaana ma mîrongo îthatû na baîrî kuuma Njerusaremu;

30 mwankaani wa mîrongo îîrî na îthatû, Nebukandinesa arî mûnene, Nebusarandani mûtongoria wa akaria,

airire ûkombooni antû magana mûgwanja ma mîrongo îna na bataano kuuma Njunda.

Kwoogu antû bonthe bara baatairwe baarî antû ngiri inya na magana mathanthatû.

31 Mwankaani wa mîrongo îthatû na mûgwanja mûnene Njeoyakini wa Njunda arî mûthaîke, mûnene Ebiri-Merondaki amwîgua kîao amûthaûra kuuma nceera ntugû ya mîrongo îîrî na itaano ya mweri wa îkûmi na îîrî mwankaani ûra aatuîkire mûnene. 32 Ebiri-Merondaki amwarîria na kîao, na amwaa gîtî gîa gîtîîyo nkûrûki ya anene bara bangî baarî amwe nabo Mbabironi. 33 Kwoogu Njeoyakini aaruta nguo ciake cia nceera, aatua kûrîyanagîra na mûnene ntugû cionthe cia ûtûûro bwake. 34 Mantûûni ma biakûrîa biake, n'eeyagwa biakûrîa bia kîra ntugû ûtûûrooni bwake bunthe i mûnene wa Mbabironi.