Ntûmwa îgûrû rîa Mbabironi
50
1 Gîkî i kiugo kîra Mwathani aariirie gûkûrûkîîra kîroria Njeremia îgûrû rîa Mbabironi na nthîgûrû ya Ambabironi.2 “Ugîîriani na bûmenyithanie kîrî mîgongo yonthe,
ûkîîriani kîonanîîria na buugîîrie bûtakwitha bûkiugaga,
‘Mbabironi îgaataîgwa
Beri îkaagîa îgi
Merondaki n'yo îkaûyûrwa i kîmako
mîbuanaano yaayo îkaagîa îgi
ngai ciake cia ûrongo ikaagîa îgi.’
3 Mbabironi îkaithûkîrwa i mûgongo wa kuuma bwa neegûrû,
na ûmîtuîkithie îganjo.
Gûtirî we agaatûûra ku,
antû na nyamû bagaakuthûka bathi bûngî.”
4 Mwathani ariuga,
“Ntugûûni inu na kagiitaani gaku,
antû ba Isiraeri amwe na antû ba Njunda
bakeethîrana amwe bakîrîraga na bacerie Mwathani Ngai wao.
5 Bakaûrithîria njîra ya Sayuuni
na bagarûke bamîerekere.
Bacooke kaîrî beegwatithanie na Mwathani
kîrîîkanîrooni gîtakîthira rî kana rî
kîra gîtakîriganîria.
6 Antû baakwa bakari ta ng'ondu ciûrîîte,
arîîthi baao i bo babateete
baatûma baruruutha irîmaani.
Baariûnga irîmaani na tûrîmaani
baariganîrua i bantû aago ara baanogokaga.
7 Wonthe ûra aaboonaga naabarîîyaga,
anthû baao baugaga, ‘Tûtirî na mabîtia,
n'ûntû antû baba i beeyiirie kîrî Mwathani ûra n'we gîkaro kîao kîa mma,
Mwathani, wîrîgîîro bwa beethe.’
8 Kuthûkaani buume Mbabironi!
Umaani nthîgûrû ya Ambabironi!
Bûkare ta nthenge ira itongoragîria mbûri.
9 N'ûntû nkeethîrania na ndeete mîgongo îmiingî îrî na inya amwe îgwatanîrîîte,
yuume rûteere rwa îgûrû iithûkîre Mbabironi.
Bakeebanga kûrûa nabo,
bathûkie nthîgûrû înu kuuma bwa rûteere rwa îgûrû.
Mîgwî yao îkari ta ya ncamba ya ndûa îrî waara
îra îtaumaga îcooka njara i ntheri.
10 Kwoogu Mbabironi îgaataîgwa,
na bara bonthe bagaataa, bagaataa mwanka baganie,”
i bu Mwathani akuuga.
11 “N'ûntû bwa bûra bûgwîragua, na bûgakeneera
biû bûtaaga into bia antû baakwa,
i kîo n'ûntû bûgûtûûba ta moori rîra îkûbûûra irio,
na bûkaania ta mbaraathi.
12 Nyûkwe akaagîa îgi mûno,
na ûra ûbûciere akaagîa îgi.
N'we akeegua arî ûmûniini kîrî mîgongo îra îîngî,
rwanda, nthî îmbûmo, na ng'aarû.
13 N'ûntû bwa mûthûûro wa Mwathani Mbabironi îtiitûûrîka,
îgaatuîka îbooru rîtheri.
Bonthe bara bagaakûrûkagîîra oogo bakaamakanagia
na kûguaya boona bûra kwînyangîîtue.
14 Rûngamaani wa muntû kaanyaani gaake bûthiûrûkîrîîte Mbabironi
bwinthe bara bûtumîîte nta.
Rathangaani Mbabironi bûtakûmakîra mîgwî,
n'ûntû nîîyîrîîtie Mwathani.
15 Mûkururîreeni mbarî cionthe!
N'îîneenkanîrîîte, na ibayo biake biagwa,
na nthingo ciake ciomorangwa.
N'ûntû i Mwathani ûkwîrîîria,
îîrîîrie kîrî we,
mûrûthîre wa bûra aarûthîîre bara bangî.
16 Ga kwîgue gûtarî muntû wa kwanda Mbabironi,
kana mûkethi na kayiû gaake kagiita ka maketha.
N'ûntû bwa rûûyiû rwa mwinyanîîria,
ka muntû wonthe acooke kîrî antû baao,
muntû wonthe acooke nthîgûrû yao.
17 Isiraeri i ta ng'ondu inyageere
ira cimba ciîngatîîtie ikathi kûûraaya.
Wa mbere kûmûtembûranga,
i mûnene wa Asîîria,
wa mûthia kuunanga maîndî maake
i Nebukandinesa mûnene wa Mbabironi.”
18 Kwoogu ûûgû i bu Mwathani Mwene Inya, Ngai wa Isiraeri, akuuga,
“Ngaakaanûkia mûnene wa Mbabironi na nthîgûrû yake,
wa ta bûra ndaakaanûkiirie mûnene wa Asîîria.
19 Îndî ngaacookia antû ba Isiraeri nthîgûrû yao yongwa ya ûrîîthi
na bakaarîa irîmaani bia Karimeri na Mbasani,
na tûrîmaani twa Eburaimu na Ngiriandi,
mwanka rîra bakaabaa.
20 Ntugûûni inu na kagiitaani gaku.”
I bu Mwathani akuuga,
“îbîtia rîa Isiraeri rîgaacerua îndî rîtionara,
na kinya meeyia ma Njunda mationeka,
n'ûntû nkaarekera matigari mara ngaatigaria.
21 Ithûkîra nthîgûrû ya Merathaimu
na bara batûûraga Pekondi.
Înganaani nabo bûbeenyangie cwe.
Bwingie bunthe bûra mbwathîîte,”
i bu Mwathani akuuga.
22 “Gîtuma kîa ndûa i gîkwîguîka nthîgûrû,
gîtuma gîa kwînyangua kûûnene.
23 N'ata Mbabironi yunangîîtwe îkathira!
Kîria kîra kîraarî inya ya nthîgûrû yonthe.
N'ata Mbabironi îkirîîte îbooru ûgu kîrî mîgongo yonthe!
24 Mbabironi, ndaagûtegire na mûtego
nau wakûgwata mbere ûmenya.
Wagwatirwe i mûtego
n'ûntû n'wareganire na Mwathani.
25 Mwathani agûkunûra waigo bwake bwa mathaga ma ndûa
na aaruta mathaga ma ndûa ma mûthûûro wake,
n'ûntû Mwathani wa Njûûrî arî na ngûgî ya kûruta
nthîgûrû ya Ambabironi.
26 Ncûûni bûmwithûkîre kuuma nteere cionthe,
bwomboranie makûmbî maake,
bûmûtûûganîîrie ta ithûmba bia irio.
Bûmwînyangie athire cwe,
na bûtigaatigarie nwa mbi.
27 Ûragaani ncamba ciake cia ng'ombe cionthe,
ga ciîndame kîthînjîrooni!
Bakoona thîîna n'ûntû ntugû yao îgûkinya,
kagiita kaao ga gûkaanûkua.
28 Thikîîriani tûyû twa bara bamonyokeete kuuma Mbabironi.
Bakiugîîria nainya Sayuuni
bûra Mwathani Ngai wetû eerîîrîîtie
na aarîîria nyomba yake.
29 Tûmanaani bara barathanaga na mîgwî baithûkîre Mbabironi,
yîî antû bonthe bara baiyî kûgera mîgwî.
Ambaani marema bûmîthiûrûkîrîîte mbarî cionthe,
kaingo gûtagîta nwa ûmwe akaamonyoka.
Mûrîeni kûringana na ngûgî yake,
mûrûthîreeni wa bûra arûthîîte.
N'ûntû n'ekumîîtie kîrî Mwathani
Ûra Mûtheru wa Isiraeri.
30 N'ûntû bwa ûgu, nthaka ciayo ikaagwa barabaraani,
na antû baao ba ndûa bagaakirithua ntugû înu,”
i bu Mwathani akuuga.
31 “Ndî na ûthû naawe woû mwîkumia ûyû,
i bu Mwathani wa Njûûrî akuuga,
n'ûntû ntugû yaku îgûkinya,
kagiita gaaku ga gûkaanûkua.
32 Mwîkumia agaataratara na agwe
na gûtirî we akaamûûkîîria,
Nkaabua mwanki taûni ciake
nau ûkaathiria bonthe bara bamûthiûrûkîrîîte.”
33 Ûûgû i bu Mwathani Mwene Inya akuuga,
“Antû ba Isiraeri i bainyîîrie,
wana kinya antû ba Njunda.
Bonthe bara babagwete mîgwate babaraithîîrîîte mûno
i baregeete kûbarekeeria bathi.
34 Amwe na ûgu ûmma akabarigîîria,
riîtwa rîake eetagwa Mwathani Mwene Inya.
Akabatuunyûkia na mpwî
na atûme nthîgûrû yao îgîa ûkiri
îndî i kînyamaara kîrî bara batûûraga Mbabironi.
35 Gîkuû kîrî Ambabironi,”
i bu Mwathani akuuga,
“na kîrî bara batwîre Mbabironi
na kîrî atongoria na antû bara baûme.
36 Gîkuû kîrî iroria bia ûrongo!
bituîke biaa.
Gîkuû kîrî ncamba ciayo cia ndûa
bakaûyûrwa n'ûguaya.
37 Gîkuû kîrî mbaraathi na mbînyangie nkaarî ciake cia ndûa
gîkuû kîrî acikaarî ageni bara barî nabo!
bonthe bakare ta aka.
Nthirie ûtonga bwake bunthe!
na bûtaîgwe.
38 Mwathû ndûûyîîni ciake!
Nacio ibwe.
N'ûntû i nthîgûrû ya ngai cia mîbuanaano,
mîbuanaano înu yatûma antû batuîka biaa.
39 Kwoogu i nyamû cia rwanda na mbiti igaatûûraga Mbabironi,
na kinya ntundu igaatûûra ku.
Gûtikooro tûûrwa kaîrî,
kana nthuke nwa îrîkû îtûûra ku.
40 Wa ta bûra Ngai eenyangiirie Sondomu na Ngomoora
amwe na taûni ira ciamîthiûrûkîîrîîte,
nwa ta bu gûtarî we agaakara ku,
kana kûgîta muntû atûûra ku.”
I bu Mwathani akuuga.
41 “Raithaani bwone njûûrî nîîyîîte yuumîîte bwa rûteere rwa îgûrû,
mûgongo ûmûnene na anene baingî
n'ûkwîthuuranîra n'ûntû bwa ndûa kuuma mîthia ya nthî.
42 Bagwete nta na matumo,
ibaang'eentu mûno na kîao batirî.
Bathiîte na mbaraathi ciao
barîîguîka bakîgondoka ta îria,
baayîîte beebangîîte ta antû bathiîte ndûani,
baayîîte kwithûkîra mwarî wa Mbabironi.
43 Mûnene wa Mbabironi n'egîîtue nkuma ya antû babu,
na njara ciake ciathira inya kûrû,
kînyamaara kîînene mûno kîamûgwata,
ûrûrû ta bwa mûka akîgea na mwana.
44 Ta cimba yuumîîte mûthitûûni wa Njorondani
îtarîîte gûntû kûrî na ndîîthia îîndirimu,
nwa ta bu nthûti îmwe nkeengatia Mbabironi kuuma nthîgûrû yake.
N'ûû we mûthuure mbûmba kûnenkera ngûgî îno?
N'ûû ûkari ta niû aûmba kûrûngama mbere yakwa?
I mûrîîthi ûrîkû aûmba kûrûngama mbere yakwa?
45 Kwoogu, îgua bûra Mwathani abaangîrîîte Mbabironi,
na bûra athûgaanîrîîtie nthîgûrû ya Ambabironi.
Tûgondu twao tûra tûniini tûgaakururua twirwe bûngî,
na n'ûntû bwao akeenyangia ûrîîthi bwao bunthe.
46 Mûrurumo wa gûtaîgwa kwa Mbabironi ûkainainia nthîgûrû,
mayû ma kîrîro gîake makeeguîka i mîgongo îra îîngî.”