Ntûmwa îgûrû rîa Amoni
49
1 Ûûgû i bu Mwathani akuuga îgûrû rîa Amoni:“Ga Isiraeri gûtarî na nthaka?
Ga atarî mûrîa ûkua?
Aabu i kî n'ûntû Moreku aathûkia Ngandi?
I kî n'ûntû antû baake batûûraga taûni ciayo?
2 Îndî ntugû i ciiyîîte,
i bu Mwathani akuuga,
rîra ngaatûma mbu ya ndûa yuugwa
taûni ya Raba ya Aamoni.
Îgaatuîka îganjo
na ntûûra ira imîthiûrûkîîrîîte ikaabîîthua na mwanki.
Rîru i rîo Isiraeri îkeengatia
bara baamîîngatiirie,
i bu Mwathani akuuga.”
3 “Ugaani mbu antû ba Esiboni n'ûntû Ai îkwînyangua.
Rîraani biû bara bûtwîre Raba!
Îkîraani makunia na bûgwatwe i kîeba,
ugiani bûgîkûrûkanaga mbarî na îno îîngî, taûni ndeeni,
n'ûntû ngai wenu Moreki akaagwatwa mîgwate,
na airwe nthîgûrû ciingî, we, athînjîri baake na atongoria baake.
4 I kî n'ûntû bûgwîkumia bûrî iguuruuni,
na ûgeekumîria ibonde biaku bira binoru?
Woû mwarî ûtarî mwîtîgua,
woû wîgwatagia ûtonga bwaku na ûkauga,
‘N'ûû ûmbithûkîra?’
5 Ngakûretera kîmakania
kuuma kîrî bonthe bara bakûthiûrûkîîrîîte,
i bu Mwathani wa Njûûrî akuuga.
Bwinthe bûkaanyagaarua nteere cionthe,
na gûtirî we akeethîrania bara ûkeegua bakuthûkîîte.
6 Îndî nyumaani ngaacookia ûtonga bwa Aamoni,
i bu Mwathani akuuga.”
Ntûmwa îgûrû rîa Endomu
7 Ûûgû i bu Mwathani Mwene Inya akuuga îgûrû rîa Endomu:
“Mwanka agu ga gûtarî ûûme Temani?
Ga kweyana ûkûrû kûraûrire kuuma kîrî bara baûme?
Ka ûûme bwao bûrathirire?
8 Cookaani nyuma bûkuthûke, bwîbithe makurunguuni mara maraaya,
biû bûtûûraga Ndendani,
n'ûntû nkaareetera Esaû kînyamaara
kagiita kara nkaamûkaanûkia.
9 Akethi ba ncabiibû bagîkûûyîîra rî,
batigîtigaria nwa inkai?
Aamba bakaaya ûtugû rî,
anga twaka baiya wa bira bakwenda?
10 Îndî niû nkaaguûra Esaû mûtige mpûûri
nguûre kinya gûntû gwake kûra eebithaga,
kaingo ataûmba kwîbitha kaîrî.
Aana baake, antû ba mûciî wao, na atûûri baake bakaathira,
Na Endomu we wengwa atiitigara.
11 Tiga aana baaku barî nkîa, naani nkabamenyeera.
Na kinya ntigwa ciaku cia aka nwa i mbîtîgie.”
12 Ûûgû i bu Mwathani akuuga, “Ûkeegua bara batabatîîrue banyua gîkombe gîkî nwa bakînyuire rî, i kî n'ûntû woû ûtabatîîrue ûkaanûkua? Ûtiirega gûkaanûkua, nwa mwanka ûkînyuire.” 13 Mwathani ariuga, “Inkûthiîtia ningwa atî taûni ya Bosira îgaatuîka îganjo, gîntû gîa kûrumagwa na kîîmene gîa kûthekagîîrwa na taûni ciake cionthe ira imîthiûrûkîîrîîte igaatûûra irî maganjo tene na tene.”
14 Itwîgîîtue ntûmwa kuuma kîrî Mwathani,
mûtûmwa n'atûmîîtwe kîrî antû ba mîgongo abeera,
“Îthîranaani amwe bûkaithûke!
Umagarûkaani bûthi ndûani!
15 Îndî ngagûtuîkithia ûmûniini kîrî mîgongo yonthe,
na ûrumangawe n'antû.
16 N'ûntû bwa ûguaya bûra wîkagîra bara bangî
wîkumia bwa nkoro yaku i bûkweneetie,
woû ûtûûraga makurunguuni ma maiga,
na ûkeegwatîra kîrîmaani kûra îgûrû.
Na kinya ûkeebakîra ntara kûra îgûrû ta ndiiû,
n'waku ngaagûtûûgûrûkia,”
i bu Mwathani akuuga.
17 “Endomu îgaatuîka gîntû gîa kûmakanithia,
bonthe bara bagaakûrûkagîîra oogo bakaarigara na bamînyûrûûnte
n'ûntû bwa bûra îrî mbaraganie.
18 Wa ta bûra Sondomu na Ngomoora ciaraganiirue,
amwe na atûûri baacio,
nwabu gûtarî we agaatûûra aaga,
kana kûgîta muntû akara ku,”
i bu Mwathani akuuga.
19 “Wa ta cimba yumîîte mûthitûûni wa Njorondani
îtarîîte gûntû kûrî na ndîîthia îîndirimu,
nwa ta bu nthûti îmwe nkeengatia Endomu kuuma nthîgûrû yake.
N'ûû we mûthuure mbûmba kûnenkera ngûgî îno?
N'ûû ûkari ta niû aûmba kûrûngama mbere yakwa?
I mûrîîthi ûrîkû aûmba kûrûngama mbere yakwa?”
20 Kwoogu, ta îgua bûra Mwathani abaangîrîîte Endomu,
na bûra athûgaanîîtie kûrûtha bara batûûraga Temani.
Tûgondu twao tûra tûniini tûgaakururua twirwe bûngî,
na n'ûntû bwa bûra barûthîîte akeenyangia ûrîîthi bwao bunthe.
21 Mûrurumo wa kûgwa kwao n'ûkainainia nthîgûrû,
mayû ma kîrîro kîao makeeguîka Îria Rîtuune.
22 Cûûbaani bwone nderi îkaûmbûka na yîîndame,
yambaarîîtie mathabu îgûrû rîa Bosira.
Ntugû înu nkoro cia antû arûme bara ncamba ba Endomu,
igaakara ta nkoro ya mûka arî na ûrûrû bwa mwana.
Ntûmwa îgûrû rîa Ndamasiki
23 Ûûgû i bu Mwathani akuuga îgûrû rîa Ndamasiki:
“Antû ba taûni cia Amathi na Aripandi i bakuîte nkoro,
n'ûntû bwa ntheto inthûûku ira beegîîtue.
I baagîîte wîrîgîîro,
barînyamaara ta îria rîra rîrî na mîkumbîîrî,
rîtagûkira.
24 Antû ba Ndamasiki i barathirire inya,
i baratuire gûkuthûka
i baragwatirwe n'ûguaya,
Ûrûrû na kînyamaara i bibagwete,
mûrimo ta wa mwekûrû arî akubî kûgîa na mwana.
25 N'ata gwakarwa taûni îrî îgweta ûûgû yarûûkîrwa,
taûni îra nkenagîîra?
26 Na mma nthaka ciake ikaagwa barabaraani
na antû baake bonthe bara baarûaga ndûa bagaakirua ntugû înu,”
i bu Mwathani Mwene Inya akuuga.
27 “Nkaamuntia nthingo cia Ndamasiki mwanki,
na ûbîîthie nyomba cia ûnene cia Mbeni-Andandi.”
Ntûmwa îgûrû rîa Kendari na Asori
28 Ûûgû i bu Mwathani akuuga îgûrû rîa Kendari na moonene ma Asori, mara Nebukandinesa mûnene wa Mbabironi aithûkîîre.
Ûûgû i bu Mwathani akuuga:
“Umaani bûkaithûkîre Kendari
bûkathirie antû ba mbarî ya uumîîro bwa riûa.
29 Bûthûkie marema maao na nyamû ciao cia ndîîthia,
iguîkîri biao bia marema na into bionthe,
na kinya nkamîîra ciao.
Nabo bakaugîîria bakiugaga,
‘Kûrî na ûguaya nteere cionthe!’
30 Biû bûtûûraga Asori,
kuthûkaani bûthi bûkeebithe makurunguuni mara maraaya!”
I bu Mwathani akuuga.
“N'ûntû Nebukandinesa mûnene wa Mbabironi n'abûbîndîrîîte njûri,
arî na mûbango îgûrû rîenu.
31 Umagarûkaani bûkaithûkîre mûgongo ûtûûraga ûgwîrîîtue,
ûra wîbîtîgîîtie,
mûgongo ûtarî mûrango kana nwa gîkongoro gîa kwinga mwîrîga wayo.”
I bu Mwathani akuuga.
“Antû baayo batûûraga bonka. I bu Mwathani akuuga
32 Bûtae nkamîîra ciao,
na bûtae ndîîthia ciao inu mbiingî bûthi nacio.
Nkabanyagaaria ruuoni bonthe bara beenjaga nteere cia biongo,
Na mbareetere kînyamaara kuuma nteere cionthe,”
i bu Mwathani akuuga.
33 “Asori îgaatuîka ûtûûro bwa mbwe,
îgaatuîka îganjo tene na tene.
Gûtirî we agatûûra ku
kana muntû atûûra oogo.”
Ntûmwa îgûrû rîa Eramu
34 Gîkî i kîo kiugo kîa Mwathani kîra kîayîîre kîroria Njeremia mwanjîîrioni wa ûnene bwa Sendekia mûnene wa Njunda, mantûûni meegiî Eramu, 35 “Ûûgû i bu Mwathani Mwene Inya akuuga:
Nkaunanga ûta bwa Eramu,
kaumo ka inya yao.
36 Nkaareetera Eramu kîbuubani,
kiumîîte nteere cionthe inya cia îgûrû,
nyagaarie antû ba noogo gûntû kunthe
na gûtirî nthîgûrû nwa îmwe
îtakîîgua îrî na atae ba kuuma Eramu.
37 Ngaatûma antû ba Eramu bakuthûka anthû baao,
anthû baao bara beendaga kûbaûraga,
nkabareetera kînyamaara,
na kinya mûthûûro wakwa ûmûnene,
nkabatûmîra njûûrî ya ndûa
mwanka mbakinyie mûthia,”
i bu Mwathani akuuga.
38 “Nkaarûngîka gîtî gîakwa kîa ûnene Eramu
kaingo mbagaambithia
nthirie anene baao na atongoria baao kûrû,”
i bu Mwathani akuuga.
39 “Amwe na ûgu, ntugû ikaaya,
ngaacookeria Eramu ûtonga bwao,”
i bu Mwathani akuuga.