Ntûmwa îgûrû rîa Moabu
48
1 “Ûûgû i bu Mwathani Mwene Inya Ngai wa Isiraeri akuuga îgûrû rîa Moabu:Nebo îkoona thîîna n'ûntû îkeenyangua,
Kiriathaimu îkaagwatwa na îgîe îgi,
rûthiingo rûra rûrî inya rûkwomorangwa,
na antû baayo bagîe îgi.
2 Moabu îtiikumua kaîrî.
Esiboni antû bakamîbangîra ûthûûku.
Bakeerana, ‘Ncûûni tûthirieni mûgongo ûyû.’
Wana kinya woû taûni ya Mandimeni ûgaakirua,
rûûyiû rûgakûthiingata.
3 Thikîîria irîro bia Oronaimu,
irîro bia kînyamaara kîînene na kwînyangua.
4 Moabu îkeenyangua
na kîrîro kîa aana baake kîîguîke.
5 Kwoogu bara beetagia bwa Ruithi,
bathiyaga bakîrîraga nainya mûno,
Njîraani îra yîîndamaga bwa Oronaimu
kîrîro kîînene gîkeeguîka n'ûntû bwa kwînyangua.
6 Kuthûkaani! Bwonokie mîoyo yenu,
bûkare ta kîthaka rwanda.
7 N'ûntû bwîtîgîîtie ûtonga na inya yenu bwingwa,
wana kinya biû bûkagwatwa mîgwate.
Amwe na ngai Kemosi ngai wenu,
amwe na athînjîri na atongoria bara bangî baake bagaataîgwa na bwirwe ûkombooni.
8 Mwînyangia akeenyangia taûni cionthe
na gûtirî nwa îmwe îgaatigara.
Ira irî kîguuruuni,
na ira mbûkîîru na i mbaranîru ikeenyangua
n'ûntû i Mwathani augîîte.
9 Îkîraani antû ba Moabu mathabu babuurûûke bathi,
n'ûntû taûni ciake ikaagîa îbooru,
n'ûntû gûtirî muntû agaatûûra ku.
10 N'ûmûrume muntû ûra arutaga ngûgî ya Mwathani na ûthao!
N'ûmûrume muntû ûra agiragia rûûyiû rwake rûtûûra nthakame!
11 Moabu atwîre thîîria kuuma wîthî bwake
gûtirî rîo aataîgwa athiîgwa n'we arî mûgwate,
wa ta ndibei îgwîrîîrîîte,
akari ta ndibei îtarî mbonorie kuuma nceemaani îno kûthi îra îîngî.
Kwoogu mûcamo wake nwa woora mûkûrû,
na mûruke wake ûtaagarûka.
12 Îndî ntugû i ciiyîîte,
i bu Mwathani akuuga,
rîra ngaatûma antû bamwonorie ta ûkî kuuma nceemaani,
na bakamwonoria,
bakaanyigûkia nceema
na baikabakabe ituîke macere.
13 Rîru Moabu akaagîa îgi
n'ûntû bwa Kemosi,
wa ta bûra nyomba ya Isiraeri yagîîre îgi
rîra beetîgiirie ngai wa Betheri.
14 N'ata bûûmba kuuga, ‘Tiû tûrî ncamba,
antû baûmîîru ba kûrûa ndûa’?
15 Moabu akeenyangua na taûni ciake ikaithûkîrwa.
Nthaka ciake ira nthongi ikeendama ithi kûûragwa,
i bu Mûnene ûra eetagwa Mwathani Mwene Inya akuuga.
16 Kûthirua kwa Moabu kûrî akubî,
kînyamaara gîake kîîyîîte na mpwî mûno.
17 Bwinthe atûûri baake, mûrîrîreeni,
bara bonthe bwiyî îgweta rîake ûriani,
‘N'ata mûraagi ûyû ûraarî na inya ûûgû waunîkanga?
N'ata mûraagi ûyû waunîka ûraarî ûmûthongi?’
18 Biû antû bara batûûraga Ndiboni
îndamaani bûrûûkîre bantû eenu a ûkumio.
Bûgakare nthî nthîgûrû îmbûûmagaru
n'ûntû mwînyangia ûra wînyangagia Moabu akûbwithûkîra,
na akoomoranga nthingo cienu ira irî inya.
19 Biû bara bûtûûraga Aroeri,
rûngamaani barabaraani bûraithîîrie,
bûûrie muntû mûrûme ûyu ûtoorokeete,
na mûka ûyu ûkuthûkîîte ata rî,
‘N'ata gwakarwa?’
20 Moabu îkûgîa îgi, n'ûntû îkwînyangua cwe;
ugaani mbu bûkîrîraga!
Menyithiani ntûûra ira irî akubî na muuro wa Arinoni
atî Moabu îkwînyangua.
21 Îgamba rîkûgwata nthîgûrû îra mbûkîîru na îmbaranîru,
rîatamba bwa Oroni, Njaasa na Mefaathi
22 bwa Ndiboni, Nebo na Bethi-Ndiburataimu,
23 na Kiriathaimu, Bethi-Gamuru na Bethi-Meoni,
24 bwa Keriothi na Bosira
na taûni cionthe cia Moabu, ira irî akubî na ira irî kûraaya.
25 Rûgoci rwa Moabu rûkûgiitwa,
na njara ciake ciaunangwa,”
i bu Mwathani akuuga.
26 “Mûtogoonie,
n'ûntû n'eekîrithîîtie Mwathani mûgiro.
Moabu akaagaragara mataîkaani maake
na akaarigarîrwa na athekeerwe.
27 Moabu, n'ûkûririkana bûra ûrathekagîîra antû ba Isiraeri?
Ka baarî bamwe barî aamba
atî warîra bûrabagweta,
bakainainia kîongo bakabûthekeera?
28 Antû ba Moabu, thaamaani taûni cienu
bûgatûûre makurunguuni
bûkare ta macea mara maakaga ntara
mwîrîgaani wa makurungu.
29 Itwîgîîtue bûra Moabu arî wîkumia bûgana,
i mwîkumia mûno,
itwiyî kwîneneia, kwîbûkîîria,
wana kinya wîkumia bwa nkoro yake.
30 Niû ningwa imbiyî wîkumia bwake,
îndî bûtimûteethia,”
i bu Mwathani akuuga.
31 N'ûntû bwa ûgu ingûkayîra Moabu,
nkarîrîra antû bonthe ba Moabu,
na nkagwatwa i kîeba n'ûntû bwa Kiri-Aresethi.
32 Woû mûcabiibû wa Sibuma,
ngakûrîrîra na kîrîro kîînene nkûrûki ya taûni ya Njaseri.
Mpong'i ciaku itaambîîte ciakinya îriani,
ciakinya mwanka îriani rîa Njaseria
Îndî mwînyangia akwithûkîra maciaro maaku ma thaano
na kinya maketha maaku ma ncabiibû.
33 Kûgwîrua na gîkeno i birarutarutirwe oogo
kuuma mîndaani ya mîtî ya matunda na nthîgûrû înoru ya Moabu.
Na ndaatûma ndibei îtiga kuuma ibibiini;
gûtirî muntû agakinyanga ncabiibû akiugaga nkemi.
Wana kinya bakaringa gîtuma,
ti gîtuma gîa kûgwîrua.
34 “Kîrîro kîao gîkeeguîka
kuuma Esiboni mwanka Eriare na kinya Njaasi,
kuuma Soari na mwanka Oronaimu na kinya Egirathi-Serisiya,
n'ûntû kinya rûûyî rwa Nimurimu irûbwete.
35 Nkaathiria bonthe nthîgûrû ya Moabu
bara barutagîra igongwana gûntû kûra gûûkîîru
na bakabîîthîria ngai cia mîbuanaano macoco,
i bu Mwathani akuuga.
36 Kwoogu nkoro yakwa n'îkûrîrîra Moabu,
îrîrîrîra antû ba Kiri-Eresi ta mûtûûrirû,
n'ûntû ûtonga bunthe bûra baraarî nabu ibûrathirire.
37 Wa kîra kîongo i kîenje,
na kinya kîreru i kîenje.
Wa îra njara n'înteme
na wa kara kauna koogwa nkunia.
38 Kîeba kîrî gûntû kunthe,
rûûgûrû rwa nyomba cionthe cia Moabu,
na gûntû kunthe kwa mwingî
n'ûntû i mbînyangîîtie Moabu
ta nyûngû îtarî gîtûmi,”
i bu Mwathani akuuga.
39 “Ta raitha bûra Moabu yîînyangîîtue!
Ta îgua bûra antû baayo bakûrîra bûgana!
Teene, bûra îgîîte îgi.
Îtuîkîîte gîntû gîa kûthekeerwa
gîntû gîa gûkuthûkwa n'atûûri bonthe.”
40 Ûûgû i bu Mwathani akuuga:
“Cûûbaani bwone nderi yîîndamîîte,
yambaarîîtie mathabu îgûrû rîa Moabu.
41 Taûni ikaagwatwa
na nthingo ciayo ira irî inya ithûkue.
Ntugû înu nkoro cia antû arûme bara ncamba ba Moabu
igaakara ta nkoro ya mûka ûrî na ûrûrû bwa mwana.
42 Nthîgûrû ya Moabu yonthe îkaathirua cwe,
n'ûntû bwa kwîbûkîîria îkarega kwathîkîra Mwathani.
43 Marinya, mîtego na ûguaya
i bibweteerete biû antû ba Moabu,”
i bu Mwathani akuuga.
44 “Ûra akeegua ûguaya augie
akaagwa îrinyaani,
ûra akaabarata aume îrinyaani
akaagwatwa i mûtego;
n'ûntû ûyu ûkeegua ûrî mwanka wa gûkaanûkia Moabu,”
i bu Mwathani akuuga.
45 Antû bara bakuthûkîîte
barûngi mûgunyeeni batarî na inya,
n'ûntû mwanki ûraumire Esiboni,
rûrîrîmbî rwaûka gatîgatî ga taûni îra Sioni aathaga,
rwabîîthia ûthiû bwa Moabu,
na ireera bia eekumia bara baaringaga gîtuma.
46 Antû ba Moabu bûkoona thîîna!
Antû bara bagongaga Kemosi bakûthira.
Aarî na nthaka ciaku bakûgwatwa bairwa ûkombooni.
47 “Amwe na ûgu ntugû ikaaya
ngaacookeria Moabu ûtonga bwao,”
i bu Mwathani akuuga.
Ûyu nuu ûkeegua ûrî mûthia wa îgamba îgûrû rîa Moabu.