Bûra Mwathani akuuga n'ûntû bwa Afirisiti
47
1 Gîkî i kîo kiugo kîa Mwathani kîra kîayîîre kîroria Njeremia n'ûntû bwa Afirisiti mbere ya mûnene wa Miisiri aithûkîra Gasa.2 “Ûûgû i bu Mwathani akuuga:
Raithaani bwone rûûyî bûra rûûyûrîîte bwa îgûrû,
rûgaatuîka îkondoria.
Rûkaaguîkîra nthîgûrû na bionthe bira birî ku,
taûni na bara batwîre ku.
Antû bakaarîra
na bonthe bara batûûraga nthîgûrû bakauga mbu
3 beegua mûrurumo wa makinya ma mbaraathi,
na gîtuma kîa magûrû ma nkaarî cia ndûa cia mûnthû.
Beethe batiûndûka gûteethia aana baao,
njara ciao itiîgua irî na inya.
4 N'ûntû ntugû îgûkinya
ya kûthiria Afirisiti bonthe.
Na kûthiria matigari monthe
mara magîteethia Turo na Sindoni.
Mwathani arî akubî kûthiria Afirisiti
matigari ma kuuma îkumbo rîa Kabutori.a
5 Antû ba Gasa bakeenjwa biongo rûkîîrî,
antû ba Asikeroni bagaakirua.
Îî biû matigari ma bara baumire kîbondeeni kîao,
bûgeetemanga mwanka rî n'ûntû bwa kîeba?
6 Nwaka bûrîraga bûkiugaga, ‘Rûûyiû rwa Mwathani,
irî rûkaanogoka?
Cooka njûraani yaku,
ûkirîîrie ûnogoke.’
7 Îndî rûûmba kûnogoka ata
rîra Mwathani ûruathîîte,
aruathîîte rwithûkîra Asikeroni na nteere cia îria rîra rînene?”