Kûgambithua kwa Miisiri
46
1 Gîkî i kiugo kîa Mwathani kîra kîayîîre kîroria Njeremia n'ûntû bwa mîgongo.2 Mantûûni ma Miisiri: Îno n'yo ntûmwa kiuthatî kîa njûûrî ya Faraû Neko wa Miisiri îra yacindîîrwe Karikemisi muurooni wa Yufîrîti i Nebukandinesa mûnene wa Mbabironi mwankaani wa îna wa wathani bwa Njeoyakimu mwana wa Njosia mûnene wa Njunda:
3 “Thuuranîraani rong'o cienu,
ira niini na ira nene,
na buumagarûke bûkarûe!
4 Ogeeraani mbaraathi nkaarîîni,
îtwani mbaraathi cia ndûa!
Îkîraani nkoobia na bûrûngame twanyaani twenu,
noorani matumo meenu,
îîbogeeni mathaga ma ndûa!
5 I mbi nkwona?
i bamakîîte,
i bacookeete nyuma,
Njûûrî yao îgûturwa,
bagûtoorooka na mpwî mûno.
Batikûûndûka bwa nyuma
kûrî na ûguaya nteere cionthe,”
I bu Mwathani akuuga.
6 “Antû bara barî rwîro mûno batiûmba gûtoorooka,
na acikaarî baao batiûmba kûmonyia,
Rûteere rwa îgûrû rwa muuro wa Yufîrîti
i noogo bagûtaratara bakîgwîyaga.
7 N'ûû ûyû ûkwîbûkîîria ta muuro wa Naero,
kana muuro ûmûnene rîra rûûyî rûrî rûûyu?
8 Miisiri yîîbûkîîrîîtie ta muuro ûmûnene wa Naero
kana miuro rîra rûûyî rûrî rûûyu.
Yugîîte, ‘Ndîîbûkîîria mwanka nkunîke nthîgûrû;
mbaraganie taûni na nthirie bara batwîre ku.’
9 Athana mbaraathi ciumagarûke,
na nkaarî cia ndûa ciûmbûkie tîîri,
ncamba cia ndûa nacio i ciumagare ome
antû arûme ba Kusi na Puti bara bakamataga rong'o,
na Arundimu bara bakamataga mîgwî na ûta.
10 Îndî ntugû înu n'ya Mwathani wa Njûûrî
ntugû ya kwîrîîria kîrî anthû baake.
Rûûyiû rûkaûragana mwanka rûganie,
mwanka rîra rûkaaringa bûûta îra rûrî n'yo ya nthakame.
N'ûntû i Mwathani wa Njûûrî, akaaruta kîgongwana
akîrutîre gîteere kîa bwa îgûrû kîa muuro wa Yufîrîti.
11 Îthi Ngiriandi ûgeecwîre ndawa,
woû mwarî wa Miisiri ataamaama na muntû mûrûme!
Ûrîtûmîra mîtheega îmiingî ya ûtheri
na ûtiora.
12 Mîgongo îkeegua mantû ma îgi rîaku,
na kîrîro gîaku îkîûyûrîîte nthîgûrû,
ncamba ya ndûa îgaakooria îra îngî,
na barî baîrî bakaagwa amwe.”
13 Îno i ntûmwa îra Mwathani eerire kîroria Njeremia, îgûrû rîa Nebukandinesa mûnene wa Mbabironi, kûthi kwithûkîra Miisiri:
14 “Ugîîriani ûûgû Miisiri, na bûmenyithie Migindori,
ugîîriani kinya Memufisi na Tapanesi, bûbeere:
‘Thûkiani twanya twenu na bwîthuuranîre,
n'ûntû ndûa îkenyangia bionthe bira bikûthiûrûkîrîte.’
15 I mbi n'ûntû Apisia yakuthûka?
I kî n'ûntû ncamba yaku îtiraarûngama?
N'ûntû Mwathani n'amîgwîthîîtie nthî.
16 Bagaataratara maita maingî:
na bakaagwîyanîra.
Rîru i rîo bakeerana, ‘Tûûkîîreeni tûcooke kîrî antû beetû
nthîgûrû yetû yongwa.
Tûkuthûke rûûyiû rwa mûnthû.’
17 Naagu bakaugîîria bakiugaga,
‘Faraû mûnene wa Miisiri i gîtuma kîînene ariingaga kîotheri,
n'arateere kaanya gaake.’
18 ‘Ûmma wa ta bûra ntûûraga mwoyo,’ Mûnene ariuga ûûgû,
ûra riîtwa rîake eetagwa Mwathani Mwene Inya,
‘ûra ayîîte, akari ta kîrîma gîa Tabori irîmaani
kana Karimeri akubî na îria.
19 Kûûnjaani nthaama bûthi ûgwateeni,
biû bûtûûraga Miisiri!
n'ûntû Memufisi îkaaraganua cwe
îtuîke îganjo rîtatwîre muntû.’
20 Miisiri i moori înthongi mûno,
îndî kîboga gîkûmîîyîîra kiumîîte bwa îgûrû.
21 Acikaarî bara yakomborire
bakari ta tûyaû tûûnoru.
Kinya bo batiûmîîria
bakaagarûka bakuthûke
n'ûntû ntugû ya kînyamaara îkabaayîîra
ntugû yao ya gûkaanûkua.
22 Miisiri akaaruta kayû ta ka njoka îkuthûkîîte
mûnthû n'we nwaka aayîîte na inya,
bakamuumîîra na mathoka
ta antû bathiîte gûtema mîtî.
23 Bagaacengia mûthitû wake cwe,
wana wegua ûtikûthûngîrîka i gwita.
I baingî mûno nkûrûki ya ngige,
batitarîka,”
i bu Mwathani akuuga.
24 “Mwarî wa Miisiri akaagîa îgi
n'ûntû akaanenkanîrwa kîrî antû ba kuuma bwa îgûrû.”
25 Mwathani Mwene Inya Ngai wa Isiraeri ariuga ata rî, “Ndî akubî kûreeta îkaanûkia kîrî Amoni ngai wa Thebesi, kîrî Faraû, kîrî Miisiri na ngai ciake na anene baake, na kîrî bonthe bara beegwatagia Faraû. 26 Nkabanenkanîra kîrî bara beendaga kûbaûraga, kîrî Nebukandinesa mûnene wa Mbabironi na atongoria baake. Îndî Nyumaani Miisiri îgaatûûrwa wa ta bûra yakari tene,” i bu Mwathani akuuga.
Mwathani akoonokia Isiraeri
27 “Ûtikaamake, Njakubu mûruti ngûgî wakwa,
woû Isiraeri, winaina.
Na mma ngakwonokia nkûrute nthîgûrû cia kûraaya.
Na aana baaku mbarute nthîgûrû
îra baathiire barî mîgwate.
Njakubu agaacooka kaîrî kwîgua arî na ûkiri na thîîria,
na gûtirî we akaamûguayia.
28 Ûtikaamake, woû Njakubu mûruti ngûgî wakwa,
n'ûntû ndî amwe naawe,”
i bu Mwathani akuuga.
“Kinya ndaathiria mîgongo îra îîngî yonthe
kûra mbûnyagaarîîtie,
ntibûthiria cwe.
Nkabûkaanûkia,
îndî na mma, ntiireka ûthi kûrû ûtarî mûkaanûkie.”