Njeremia 44

Kînyamaara n'ûntû bwa kûgonga mîbuanaano

1 Gîkî i kîo kiugo kîra kîayîîre Njeremia n'ûntû bwa antû ba kuuma Njunda bonthe bara batûûraga rûteere rwa iti rwa Miisiri taûni cia Migindori, Tapanesi na Memufisi na rûteere rwa Pathirosi. 2 “Ûûgû i bu Mwathani Mwene Inya, Ngai wa Isiraeri, akuuga: Biû bwingwa i bwoneete inyamaara bira ndeetereete Njerusaremu na taûni cionthe cia Njunda. Ta ciraithe, îmunthî i maganjo, gûtirî muntû ûtwîre ku, 3 n'ûntû bwa ûthûûku bûra barûthîîte. Baatûma nthûûra, n'ûntû bwa kûthi kûbîîthîria igongwana na kûgonga ngai ciingî ira cio biû kana biûyûûyû bienu bitaiyî. 4 Kaîrî na kaîrî Indaabûtûmîîre aruti ngûgî baakwa iroria, babwîra, ‘Bûtikaarûthe mama marî njici nthwîre!’ 5 Îndî bataanthikîîria nwa aniini kana bagarûka bauma ûthûûkuuni bwao na batiga kûbîîthîria ngai ciingî igongwana. 6 Kwoogu mûthûûro ûmûnene wakwa watûûrwa, na gwankana îgûrû rîa taûni ya Njunda na îgûrû rîa barabara cia Njerusaremu waituîkithia maganjo moombokanu wa ta bûra makari îmunthî.

7 “Îîndî ûûgû i bu Mwathani wa Njûûrî, Ngai wa Isiraeri akuuga, ‘I kî n'ûntû bweretera kînyamaara kîneneete ûûgû bwingwa na njîra ya kwîbathûra bwingwa kuuma gatîgatîîni ka Njunda, antû arûme, aka, twana na ngenke na kwoogu kwagia nwa matigari? 8 I kî n'ûntû bûkûnthûûria na ngûgî cia njara cienu, bûkîbîîthagîria ngai ciingî igongwana Miisiri, naara bûraayire gûtûûra? Bûkeebînyangia bwingwa na bwîtuîkithie gîntû kîrî îgi na kîîrume, mîgongooni yonthe ya nthîgûrû. 9 I ka bûrariganîîrue i mabîtia mara biûyûûyû na anene ba Njunda na eekûrû baao baarûthire, na mara biû na eekûrû beenu bwarûthire nthîgûrû ya Njunda na barabaraani cia Njerusaremu? 10 Mwanka îmunthî tûrî batiînyiîtie kana bantîîya kana bathingata watho bwakwa kana maathana maakwa mara mbûnenkereete biû na biûyûûyû bienu.’

11 “Kwoogu ûûgû i bu Mwathani Mwene Inya Ngai wa Isiraeri, akuuga, ‘Ndî akubî kûbûreetera kînyamaara na mbînyangie Njunda yonthe. 12 Naani nkaathûkia matigari ma Njunda monthe mara maabangire kûthi Miisiri gûtûûra noogo. Bonthe bakaathirîra Miisiri, bakaûragîrwa ndûani kana bathire i yûûra. Kuuma ûra mûniini mwanka ûra mûnene bonthe bakaathirîrua ndûani kana bathirue i yûûra. Bagaatuîka gîntû gîa kûrumagwa na kîîmene gîa kûthekagîîrwa na kîrî na îgi 13 Ngaakaanûkia bara batûûraga nthîgûrû ya Miisiri, wa ta bûra ndaakaanûkiirie Njerusaremu na ndûa, yûûra na mîrimo. 14 Na gûtirî nwa ûmwe wa matigari ma Njunda ûra aathiire gûtûûra Miisiri akoonoka kana amonyia acooka nthîgûrû ya Njunda îra beerîgîîrîîte gûcooka gûtûûra. Gûtirî nwa ûmwe agaacooka tatiga baakai bara bagaatigara.’ ”

15 Rîru antû arûme bonthe bara baiyî atî eekûrû baao i baabîîthagîria ngai ciingî igongwana, amwe na gîkundi kîînene kîa eekûrû bara beegagua barî akubî, amwe na antû bonthe bara baatûûraga rûteere rwa iti na rwa îgûrû rwa Miisiri beera Njeremia, 16 “Tûtiithikîîria ntûmwa înu watwîra riîtwani rîa Mwathani! 17 Na tûkaarûtha wa bûra bungwa twaugire tûkaarûtha; tûkaabîthagîria mûnene wa mûka wa îgûrû igongwana na kûmûtûûrîria igongwana bia biakûnyua wa ta bûra tiû na ba baaba, anene beetû, na atongoria beetû baarûthire taûniini cia Njunda na barabaraani cia Njerusaremu. Kagiitani gaku itwarî na irio bia kûgana, i twakaraga bwega tûtarî na thîîna. 18 Îndî kuuma rîra twatigire kûbîîthîria mûnene wa mûka wa îgûrû igongwana, na kûmûtûûrîria igongwana bia biakûnyua i rîo twagire into bibu bionthe na twanjîîria kûthirîrua ndûani na yûûra.”

19 Eekûrû boongeera bauga, “Rîra twabîîthagîria mûnene wa mûka wa îgûrû igongwana na kûmûtûûrîria igongwana bia biakûnyua, ka arûme beetû bataamenyaga itûkûruga keki îrî na mûûmbîre ta wake na tûkamûtûûrîria igongwana bia biakûnyua?”

20 Rîru Njeremia eera antû babu bonthe, antû arûme na aka bara baamûcookagîria, 21 “Ka Mwathani ataaririkana na athûgaanîria igongwana bira biû, biûyûûyû bienu, anene na atongoria beenu na bia antû bara bangî bwabîîthagia taûniini cia Njunda na barabaraani cia Njerusaremu? 22 Rîra Mwathani aaremirwe i kûûmîîria ngûgî cienu inthûûku na mantû marî njici mara bwarûthaga, nthîgûrû yenu yatuîka întheri yagîta îbooru, yaakara ta gîntû gîa kûrumagwa wa ta bûra îkarî îmunthî. 23 N'ûntû bwa kûbîîthia igongwana na kwîyîria Mwathani na kûrega kûmwathîkîra na kûthingata mawatho na maathana maake, i kîo gîtûmîîte kînyamaara gîkî bûkwona kîbûgwata.”

24 Njeremia aarîria antû bonthe na mûno mûno eekûrû abeera, “Îguani kiugo kîa Mwathani antû bonthe ba Njunda bara baarî Miisiri. 25 Ûûgû i bu Mwathani Mwene Inya Ngai wa Isiraeri akuuga: Biû na eekûrû beenu i bwonanîîtie na ngûgî cienu atî wîrane bûra bwaigire rîra bwaugire, ‘Na mma tûkaûyûria mûthiîtio wetû ûra twaigire wa kûbîîthîria mûnene wa mûka wa îgûrû igongwana na kûmûtûûrîria igongwana bia biakûnyua.’ Îthiini na mbere ni, rûthaani bûra bweranire! Bwingie mîthiîtio yenu! 26 N'ûntû bwa ûgu, îguani kiugo kîa Mwathani antû ba kuuma Njunda bonthe bara batûûraga Miisiri. Mwathani ariuga ata rî, ‘Nkûthiîtia na riîtwa rîakwa rîînene, i bu Mwathani akuuga, atî gûtirî muntû nwa ûmwe wa kuuma Njunda ûtwîre bantû onthe Miisiri akaarogweta kana athiîtia na riîtwa rîakwa, na mma wa ta bûra Mwathani Ngai atûûraga mwoyo.’ 27 N'ûntû mbaraithîîrîîtie mbathûûkia îndî ti mbateethia; antû ba kuuma Njunda bonthe bara barî Miisiri bakaathirîrua ndûani na yûûra mwanka beenyangue cwe. 28 Bara bakamonyoka gûkua bacooke Njunda bakeegua barî baakai mûno. Rîru i rîo matigari ma Njunda monthe mara maayire gûtûûra Miisiri bakaamenya i biugo biaû bikaarûngama, i biakwa kana i biao.

29 “Gîkî i kîo gîkeegua kîrî kîonanîîria atî nkabwaa îkaanûkia bûrî bantû aaga, i bu Mwathani akuuga. Kaingo bûmenya mantû mara monthe mbugîîte ma kûbûkaanûkia i ma mma na makaarûngama. 30 Ûûgû i bu Mwathani akuuga, ‘Nkaanenkanîra Faraû Obura mûnene wa Miisiri kîrî anthû baake bara bamûceragia bamûûraga, wa ta bûra ndaanenkanîîre mûnene Sendekia wa Njunda kîrî Nebukandinesa mûnene wa Mbabironi mûnthû wake ûra aamûceragia amûûraga.’ ”