Njeremia 43

Rûgendo rwa kûthi Miisiri

1 Rîra Njeremia aarîkiirie kwîra antû biugo bionthe bira Mwathani Ngai wao aamûtûmîîte nabio kîrî bo, 2 Asaria mwana wa Osaya na Njoanani mwana wa Karea na antû bangî bonthe bara baarî na gwîkumia beera Njeremia, “Nûkûrongoa! Mwathani Ngai wetû atiragûtûma ûûya gûtwîra tûtikaathi Miisiri gûtûûra noogo. 3 Îndî ûrîngîîrwa i Mbaruku mwana wa Neria ûtûnenkanîra njaraani cia Ambabironi batûûraga kana batwira Mbabironi tûrî mîgwate.”

4 Kwoogu Njoanani mwana wa Karea na atongoria bonthe ba njûûrî na antû bonthe bataathîkîra Mwathani bakara nthîgûrû ya Njunda. 5 Rîru Njoanani mwana wa Karea na atongoria bonthe ba njûûrî, baatongoreeria matigari monthe ma Njunda na antû bonthe bara baarî bagûcooka gûtûûra nthîgûrû ya Njunda, kuuma mîgongooni yonthe îra baanyagaaranîîtue. 6 Baathiire na antû arûme bonthe, aka na twana na kinya aarî ba mûnene bara Nebusarandani ûra aarî mûtongoria wa akaria ba mûnene aarî agûtigîra Ngendaria mwana wa Aikamu, mwana wa Safani, kinya kîroria Njeremia na Mbaruku mwana wa Neria. 7 Kwoogu baarega kwathîkîra Mwathani bathûngîra Miisiri na baathi mwanka Tapanesi.

8 Rîru kiugo kîa Mwathani kîayîîra Njeremia arî Tapanesi kîamwîra ata rî, 9 “Tathûkia maiga maanene ûmarûmîîrie na cimiti yunganîîtue na mûthanga wa gwaka kayîraani kara gaake na matubaarî kara kathûûngagîra nyomba ya Faraû îra îrî Tapanesi. Ûmathike antû ba Njunda bakîonaga. 10 Rîru ûbeere, ‘Ûûgû i bu Mwathani Mwene Inya Ngai wa Isiraeri akuuga: Ngaatûmana mûruti ngûgî wakwa Nebukandinesa mûnene wa Mbabironi, na nkaiga gîtî gîake kîa ûnene îgûrû rîa maiga mama ndaarûmîîria aaga; na aambe marema maake îgûrû rîamo. 11 Akaaya aithûkîre Miisiri, athirie na mîrimo bara barî bakûûragwa na mîrimo agwate bara barî ba kûgwatwa, na aûrage na rûûyiû bara barî bakûûragwa naru. 12 Agaacinia mwanki nyomba cia ngai cia Miisiri, akaabîîthia nyomba inu cia ngai ciao, na agwate ngai ciao mîgwate. Akaathûkia Miisiri, na wa ta bûra mûrîîthi eebogaga nguo nwa ta bu akeeboga Miisiri na aume ku na ûkiri. 13 Nwe akaunanga itugî bia Erioporisi bira biathûre bira birî Miisiri na abîîthie nyomba cia ngai cia Miisiri na mwanki.’ ”