Njeremia 42

Njeremia aatha matigari abeera batikaathaame

1 Rîru atongoria bonthe ba njûûrî na kinya Njoanani mwana wa Karea na Njesania mwana wa Osaya, na antû bonthe kwanjîîria ûra mûniini mwanka ûra mûnene baathengeera 2 kîroria Njeremia bamwîra ata rî, “Itû îgua gûkaya wetû ûtûrombere kîrî Mwathani Ngai waku, n'ûntû bwa matigari mama monthe. N'ûntû wana woû n'ûkûmenya tûrî gacuncî kaniini ka matigari tûkîringithanua na bûra tûraarî mbere. 3 Ereka Mwathani Ngai gwaku atwonie ara tûbatîîrue tûthi na bûra tûbatîîrue tûrûtha.”

4 Kîroria Njeremia abacookeria abeera, “Nkwîgua na nkaaromba Mwathani Ngai wenu wa ta bûra bwambûûria, na bunthe bûra akambîîra nkabwîra ntakûbwitha nwa mbi.” 5 Baacookeria Njeremia bamwîra, “Mwathani arootuîka mûnkûûyî wa mma na mwîtîgua kîrî tiû wegua tûtiirûtha bunthe bûra Mwathani Ngai waku agaagûtûma ûtwîra. 6 Bwega kana bûûthûûku bûra akauga, tûkaathîkîra Mwathani Ngai wetû ûra tûgûgûtûma kîrî we, kaingo mantû meetû makara bwega twathîkîra Mwathani Ngai wetû.”

7 Nyuma ya ntugû îkûmi, kiugo kîa Mwathani kîayîîra Njeremia. 8 Kwoogu eeta Njoanani mwana wa Karea na atongoria bonthe ba njûûrî bara aarî nabo na antû bonthe kwanjîîria ûra mûniini mwanka ûra mûnene, 9 abeera, “Ûûgû i bu Mwathani Ngai wa Isiraeri, ûra bûrantûmire mmwîra maromba meenu, akuuga: 10 Wegua bunka bûgaakirîîria nthîgûrû îno i rîo nkaabwaka, na ntibûtharia, mbwande na ntibûkûûra, n'ûntû i nkwîrirîra moothûûku mara ndaabûreteere. 11 Bûtigaakuthûke mûnene wa Mbabironi, ta bûra bûtwîre bûmûkuthûkîîte, i bu Mwathani akuuga, bûtikaamûkuthûke n'ûntû ndî amwe naabi kaingo mbwonokia na mbûtuunyûkia buuma njaraani ciake. 12 Nkabwîgîîrua kîao kaingo abwîgîîrua kîao abûcookia nthîgûrû yenu.

13 “Îndî wona bwathi mbere bûkiugaga, ‘Tiû tûtiikara nthîgûrû îno,’ gûku i kûrega kwathîkîra Mwathani Ngai wenu, 14 na wona bwauga, ‘Arî, tiû tûkaathi Miisiri naara gûtakîîgua kûrî na ndûa kana twîgua rûgoci kana tûbûûta i kwaga biakûrîa,’ 15 kwoogu îguani kiugo kîa Mwathani, biû matigari ma Njunda. Ûûgû i bu Mwathani Mwene Inya Ngai wa Isiraeri akuuga, ‘Wegua nwaka bûkwenda kûthi Miisiri bûgatûûre noogo, 16 ndûa înu bûgûkuthûka îkabûgwatîra naagu Miisiri, na yûûra rîru rîkûbûguayia rîbûthingate mwanka bûkuîre noogo. 17 Antû bonthe bara bakwîgua nwa bathiire Miisiri gûtûûra noogo bakaathirua i ndûa, yûûra na mîrimo na gûtirî we agaatigarua n'inyamaara bira nkaabareetera.’ 18 Ûûgû i bu Mwathani Mwene Inya Ngai wa Isiraeri akuuga, ‘Wa ta bûra ndeetûûrîîre bara baatûûraga Njerusaremu mûthûûro wakwa na marûrû, nwabu nkaabwonoreria marûrû maakwa bwathi Miisiri. Bûgaatuîka gîntû gîa kûrumagwa na kîîmene gîa kûthekagîîrwa na kîrî na îgi. Bûtikooro bwona bantû aaga kaîrî.’

19 “Yîî matigari ma Njunda, Mwathani abwîra bûtikaathi bwa Miisiri, gwataani ntheto ino bwega, indabûkaania îmunthî 20 n'ûntû i bwarûthire mabîtia maanene rîra bwantûmire kîrî Mwathani Ngai wenu na bwauga, ‘Tûrombere Mwathani Ngai wetû bantû eetû, twîre bunthe bûra Ngai akauga na tûkaarûtha bu.’ 21 Kwoogu ndabwîra îmunthî, îndî bwarega kwathîkîra Mwathani Ngai wenu mantûûni monthe mara arantûmire mbwîra. 22 Kwoogu îîndî, bûmenye naabi, bûkaûragîrwa ndûani, kana bûkue i yûûra na mîrimo gûntû kûra bûkwenda kûthi gûtûûra.”