Kûûragwa kwa Ngendaria
41
1 Mweriini wa mûgwanja, Isumairi mwana wa Nethania, mwana wa Erisama, wa rûrîîyo rwa ûnene na n'ûmwe wa atongoria bara banene ba mûnene, aaya na antû îkûmi kîrî Ngendaria mwana wa Aikamu naara Misipa. Wa bakîrîîyaga barî agu amwe, 2 Isumairi mwana wa Nethania na antû bara îkûmi aarî nabo baûkîîra baûraga Ngendaria mwana wa Aikamu mwana wa Safani na rûûyiû. Baûraga ûra mûnene wa Mbabironi aarî akûthuura arî ngabana wa nthîgûrû înu. 3 Isumairi n'aûragire kinya antû ba kuuma Njunda bara baarî amwe na Ngendaria naagu Misipa na kinya acikaarî ba Ambabironi bara baarî noogo.4 Rûûni nyuma ya Ngendaria akûûragwa na mbere nwa muntû ûngî amenya, 5 antû mîrongo înaana baakinya baumîîte Sekemu, Siro na Samaria beenjeete ireru, baatembûranga nguo ciao na beetemanga mîîrî bareteete igongwana biao bia irio na macoco nyomba ya Mwathani. 6 Isumairi mwana wa Nethania auma Misipa aathi kûbathagaana wa akîrîraga. Agûkomana nabo abeera, “Ncûûni kîrî Ngendaria.” 7 Rîra baathûngîîre taûni, Isumairi amwe na antû bara bangî baarî nabo babaûraga, babagera kîthimaani. 8 Îndî i kwarî na antû îkûmi kîrî babu mîrongo înaana bara beerire Isumairi, “Menya ûtûûraga tûrî na ngano na sayiri, maguta na ûkî twithîîte ithakaani.” Kwoogu atigana nabo ataabaûraganîria na bara bangî.
9 Kîthimaani kîra Isumairi aagerire biimba bia antû bara aûragire amwe na Ngendaria kîarî kîînene mûno na kîenjîîtwe i mûnene Asa gîa kwîrigîîria kîrî mûnene Baasa wa Isiraeri. Isumairi mwana wa Nethania akîûyûria biimba bia antû bara aûragîîte. 10 Rîru Isumairi aacooka aagwata mîgwate antû bara bangî bonthe bara baarî Misipa, aarî ba mûnene na antû bonthe bara baatigeere Misipa, bara Nebusarandani mûtongoria wa akaria ba mûnene aarî akûneenkanîra kîrî Ngendaria mwana wa Aikamu. Isumairi abagwata mîgwate na aaringanîria bwa nthîgûrû ya Aamoni.
11 Rîra Njoanani mwana wa Karea na atongoria bonthe ba njûûrî bara aarî nabo beegiirue ûthûûku bûra Isumairi mwana wa Nethania aarûthîîte, 12 beethîrania njûûrî ciao cionthe cia antû baathi kûrûa na Isumairi mwana wa Nethania. Bamûgwatagwatîra akubî na kîria kîra kînene kîa Ngibeoni. 13 Na rîra antû bonthe bara baagwetwe mîgwate ni Isumairi boonire Njoanani mwana wa Karea amwe na atongoria ba njûûrî îra aarî n'yo baakena. 14 Kwoogu antû bonthe bara Isumairi aagwete mîgwate kuuma Misipa baagarûka baacooka kîrî Njoanani. 15 Îndî Isumairi mwana wa Nethania aamonyoka kuuma kîrî Njoanani na antû baake banaana, na aathi nabo bwa nthî ya Amoni.
Gûtoorokera Miisiri
16 Rîru Njoanani mwana wa Karea na atongoria bonthe ba njûûrî bara aarî nabo baatongoreeria matigari ma kuuma Misipa bara aatunyûkîîtie kuuma kîrî Isumairi mwana wa Nethania nyuma ya akûûraga Ngendaria mwana wa Aikamu: Baarî acikaarî, eekûrû, twana na kinya atongoria bara baarî amenyeeri ba nyomba ya mûnene bara aatunyanîîre Ngibeoni. 17 Baathiire baanogoka Geruthi Kîmuamu akubî na Bethireemu bathiîte bwa Miisiri, 18 baakuthûka Ambabironi. Baabakuthûkaga n'ûntû Isumairi mwana wa Nethania n'aarî akûûraga Ngendaria, ûra mûnene wa Mbabironi aarî akûthuura ngabana wa nthîgûrû înu.