Njeremia gûkarania na Ngendaria
40
1 Kiugo gîkî i kîo kîayîîre Njeremia kuuma kîrî Mwathani nyuma ya Nebusarandani mûtongoria wa akaria akûmûrekeeria kuuma Rama. Eethîrîîte Njeremia arî mûthaîke na nyororo gatîgatî ka agwate bonthe ba kuuma Njerusaremu na Njunda bara baarî akubî kwirwa ûkombooni Mbabironi. 2 Rîra mûnene wa akaria oonire Njeremia, aamwîtire gataaria amwîra, “Mwathani Ngai waku n'augire ûthûûku bûbû bûgaakarîka gûntû gûkû. 3 Na îîndî Mwathani akûbureeta, ka aarûtha wa bûra augire. Mama monthe maakarîkire n'ûntû biû antû ibweyîîrie Mwathani na bûtaamwathîkîra. 4 Îndî îmunthî ingûkûtharia nyororo ira irî njara ciaku. Ncû tûthi Mbabironi wegua n'ûkwenda, na ngakûmenyeera, îndî wegua ûtikwenda, kara. Raitha, nthîgûrû yonthe îrî mbere yaku, îthi wa ara ûkeenda.” 5 Arî waagu mbere athi, Nebusarandani amwîra, “Cooka kwa Ngendaria mwana wa Aikamu, mwana wa Safani, ûra mûnene wa Mbabironi arathuurire arî ngabana wa taûni cia Njunda, na bûgakarage n'we gatîgatî ga antû, kana ûthi wa naara ûkoona i ku kwega gwa kûthi.”Kwoogu mûtongoria wa akaria amwaa irio na kîegwa, na amûrekeeria aathi. 6 Rîru Njeremia aathi kwa Ngendaria mwana wa Aikamu, Misipa, aakara n'we gatîgatî ga antû bara baatigarire nthîgûrû înu.
7 Rîra atongoria ba acikaarî bara baarî kîthakaani beegiirue atî mûnene wa Mbabironi akûthuura Ngendaria mwana wa Aikamu arî ngabana wa nthî înu, na aapeewa gûtongoria antû arûme, aka na twana, antû bara nkea mûno ba nthîgûrû înu bara bataataîgwa bairwa Mbabironi barî atae, 8 baathi kwa Ngendaria naagu Misipa. Nabo baarî: Isumairi mwana wa Nethania, Njoanani na Njonathani aana ba Karea, Seraya mwana wa Taniumethi, aana ba Efai ûra Mûnetofa na Njesania wa kuuma Maakathi, bo na ikundi biao. 9 Ngendaria mwana wa Aikamu, wa Safani abathiîtîria amwe na ikundi biao, abeera, “Bûtigaakuthûke gûtûmîkîra Ambabironi. Karaani nthîgûrû îno bûgîtûmîkagîra mûnene wa Mbabironi, na bûgaakara bwega. 10 Niû ningwa, ngaakara Misipa kûbûrûngamîîra mbere ya Ambabironi bara bakaaya kîrî tiû, îndî biû, bûgaakethaga ncabiibû na matunda mara maciaraga îgiita rîa kîathû na maguta ma mîceituuni, na bwaige makûmbîîni meenu, naabi bûtûûre ndeeni ya taûni ira bwîgwatîrîîte.”
11 Rîra antû ba kuuma Njunda bonthe bara baarî Moabu, Amoni, Endomu na nthîgûrû ira ingî cionthe beegiirue atî mûnene wa Mbabironi n'aatigîîte matigari Njunda na naathuurîîte Ngendaria, mwana wa Aikamu, mwana wa Safani, arî ngabana wao, 12 baacooka bonthe nthîgûrû ya Njunda, kîrî Ngendaria naagu aarî Misipa, baumîîte nthîgûrû cionthe ira baarî kûnyagaarîra. Na baaketha ncabiibû imbingî mûno na matunda mara maciaraga îgiita rîa kîathû.
13 Ntugû îmwe, Njoanani mwana wa Karea na atongoria bonthe ba njûûrî bara baarî kîthakaani baaya kîrî Ngendaria naagu Misipa 14 bamûûria, “Nwiyî kana Baarisi mûnene wa Aamoni n'atûmîîte Isumairi mwana wa Nethania akûruta mwoyo?” Îndî amwe na ûgu, Ngendaria mwana wa Aikamu ataabeetîgia.
15 Rîru Njoanani mwana wa Karea eera Ngendaria kîîwitho arî naagu Misipa, “Itû mbîtîgîîria nthi mbûrage Isumairi mwana wa Nethania, na gûtirî ûngî akaamenya. I kî n'ûntû agaakûûraga atûma antû ba kuuma Njunda bonthe bara bakwîthîranîrîîte banyagaara na matigari ma Njunda mathirua?” 16 Îndî Ngendaria eera Njoanani ata rî, “Ûtikaarûthe ûntû ta bûbu, mantû mamu ûkwaria ma Isumairi i ma ûrongo.”