Kûgwa kwa Njerusaremu
39
1 Mwankaani wa kenda wa Sendekia mûnene wa Njunda, mweri wa îkûmi, Nebukandinesa mûnene wa Mbabironi na njûûrî yake yonthe yaithûkîra Njerusaremu na yamîcîgîîria, 2 mwankaani wa îkûmi na ûmwe wa wathani bwa Sendekia, tarîki kenda cia mweri wa înna, rûthingo rwa taûni rwomorwa. 3 Rîru atongoria ba mûnene wa Mbabironi bonthe baathûngîra baakara nthî Mwîrîgaani wa Gatîgatî. Tabo, Nerigari-Sareseri wa kuuma Samigari-Nebo, Sari-Sekimu mûnene wa atongoria, Nerigari-Sareseri mûtongoria ûra mûnene, na atongoria bara bangî bonthe ba mûnene wa Mbabironi. 4 Rîra Sendekia mûnene wa Njunda na acikaarî baaboonire, baugia, bauma taûni ûtugû na njîra îra yaageendagîîra kamûndaani ka mûnene, bauma na mwîrîga gatîgatî ka nthingo ciîrî, na baathi bwa kîbonde kîa Njorondani.5 Îndî njûûrî ya Ambabironi yeengana nabo, na baagwatîra Sendekia mîaranthî ya Njeriko, na rîra baamûgwatire, bamûreeta kîrî Nebukandinesa mûnene wa Mbabironi, arî Ribura, nthîgûrû ya Amathi, n'we Nebukandinesa amûgiitîra îgamba noogo. 6 Mûnene wa Mbabironi aûragîra nthaka cia Sendekia naagu Ribura Sendekia akîonaga, na aacooka aûraga atongoria bonthe ba Njunda. 7 Rîru aatûra Sendekia meetho, na amwoga na nyororo cia rûthuku kaingo amwira Mbabironi. 8 Ambabironi baabîîthia nyomba ya mûnene na nyomba cia antû, na boomoranga nthingo cia Njerusaremu. 9 Rîru Nebusarandani, mûtongoria wa akaria ba mûnene, aagwata mîgwate antû bara baatigeere taûni mwanka Mbabironi, na kinya bara baumire taûni baagwatana n'we, antû bara boonokire. 10 Nebusarandani ûra mûtongoria wa akaria aatiga naagu nthîgûrû ya Njunda antû bara nkîa bataarî nwa mbi, na kagiitaani wa gaku abaa mînda ya mîcabiibû amwe na ithaka.
Kûrekeerua kwa Njeremia
11 Nebukandinesa aaruta watho îgûrû rîa Njeremia gûkûrûkîîra Nebusarandani, ûra mûtongoria wa akaria, amwîra, 12 “Thûkia Njeremia na ûmûmenyeere bwega na ûtikaamûrûthîre ûntû bûûthûûku, îndî ûmûrûthîre bûra akeenda.” 13 Kwoogu Nebusarandani mûtongoria ûyu wa akaria, Nebusasibani mûtongoria ûra mûnene, Nerigari-Sareseri mûtongoria ûra ûngî ûmûnene, na atongoria bara bangî bonthe ba mûnene wa Mbabironi baatûma 14 antû baaruta Njeremia kîaragooni gîa akaria. Bamweyana kîrî Ngendaria mwana wa Aikamu mwana wa Safani kaingo eenûkia Njeremia gwake mûciî. Kwoogu aakara na antû baao.
15 Kiugo kîa Mwathani kîayîîra Njeremia wa arî mwingîre kîaragooni gîa akaria, gîkiugaga, 16 “Îthi wîre Ebendi-Mereki Mûkusi, ‘Mwathani Mwene Inya Ngai wa Isiraeri ariuga ûûgû, “I nthiîte kûûyûria mîgambo yakwa îgûrû rîa taûni îno na ûthûûku na ti wega, na îkaûyûra bûkîonaga ntugû înu. 17 Îndî ngakwonokia ntugû înu,” i bu Mwathani akuuga, “na ûtiinenkanîrwa njaraani cia bara ûgûkuthûka. 18 N'ûntû na mma ngakwonokia, na ûtiûragwa, îndî ûkoonokia ûtûûro bwaku, n'ûntû nûmbîtîgîîtie,” i bu Mwathani akuuga.’ ”