Njeremia aagerwa îrinyaani
38
1 Sefatia mwana wa Matani, Ngendaria mwana wa Pasiuri, Njeukari mwana wa Seremia, na Pasiuri mwana wa Marikiya beegua mîgambo îra Njeremia eeraga antû bonthe rîra augire, 2 “Mwathani ariuga ûûgû, ‘Ûra wonthe akaraga taûniini îno agaakuîra ndûani, kana akue i yûûra kana mûrimo, îndî ûra wonthe akaumagara athi eenenkanîre kîrî Ambabironi agaatûûra mwoyo, akoonokia ûtûûro bwake.’ 3 Na ûûgû i bu Mwathani akuuga, ‘Na mma taûni îno îkaanenkanîrwa kîrî njûûrî ya mûnene wa Mbabironi, ûra akaamîgwata.’ ” 4 Nabo atongoria bara bangî beera mûnene atarî, “Muntû ûyû abatîîrue kûûragwa. Nakûgiita acikaarî bara batigeere taûni îno mwoyo amwe na antû bonthe na mantû mama akûbeera. N'ûntû muntû ûyû atigûcwîra antû baba mantû meega, îndî i mantû ma kûbathûûkia.” 5 Sendekia abeera, “Raithaani, arî njaraani cienu, rûthaani n'we bûra bûkwenda, ntirî na watho bwa kûbûrigîîria.” 6 Kwoogu baathûkia Njeremia na bamûgera îrinyaani rîa Marikiya, nthaka ya mûnene, rîra rîarî kîaragooni gîa akaria. Beendamiirie Njeremia ku na mîkanda. Rîarî na ntondo akî rîtaarî na rûûyî, na Njeremia oorokera gûku ntondooni.7 Îndî Ebendi-Mereki Mûkusi, mûtongoria wa nyomba ya mûnene, eegua bagwîkîra Njeremia îrinyaani. Mûnene aakari Mwîrîgaani wa Benjameni, 8 Ebendi-Mereki aumagarûka nyomba ya mûnene na amwîra, 9 “Mwathi wakwa, antû baba bakûrûtha ûntû bûûthûûku kîrî mara monthe baarûthîra kîroria Njeremia. Bakûmûgera îrinyaani akuîra ku i yûûra, n'ûntû gûtirî irio bitigeere taûni îno.” 10 Rîru mûnene aatha Ebendi-Mereki Mûkusi amwîra, “Thûkia antû mîrongo îthatû kuuma aaga, bûkarute kîroria Njeremia îrinyaani mbere akua.” 11 Kwoogu Ebendi-Mereki aathûkia antû babu baathi kanyomba kaarî rungu rwa nyomba ya kîgîîna gîkarooni kîa mûnene. Aathi agu aaruta ntaame na nguo inkûrû, acioga na mîkanda eendamîîria Njeremia cio arî îrinyaani. 12 Rîru Ebendi-Mereki eera Njeremia, “Îkîra ntaame na nguo inu nkûrû gatîgatî ga nkooa kaingo mîkanda îtakwinyîîria.” Njeremia aarûtha bu. 13 Rîru bamûkuuyia na mîkanda na bamûruta îrinyaani. Njeremia n'we aakara agu kîaragooni gîa akaria ba nceera.
Sendekia aaromba Njeremia ûkûrû
14 Mûnene Sendekia aatûmana kîroria Njeremia na auga areetwe mwîrîgaani wa îthatû wa nyomba ya Mwathani. Mûnene eera Njeremia, “Kûrî bu nkwenda gûkûûria, na ûtikaambithe nwa mbi.” 15 Njeremia aûria Sendekia, “Nkaaya gûgûcookeria rî, tika ûkambûraga? Wana kinya ngakwaa mataaro ûtinthikîîria.” 16 Îndî mûnene Sendekia aathiîtîria Njeremia kîîwitho amwîra, “Wa ta bûra Mwathani atûûraga mwoyo, ûra atûnekereete mwoyo ûyû, ntikûûraga kana nkûnenkanîra kîrî antû baba bagûcwa gûkûûraga.” 17 Rîru Njeremia eera Sendekia, “Ûûgû i bu Mwathani wa Njûûrî, Ngai wa Isiraeri, akuuga, ‘Wegua ûkeenenkanîra kîrî atongoria ba mûnene wa Mbabironi, mwoyo waku ûkoonokua, na taûni îno îtiibîîthua na mwanki, woû na mûciî waku bûgaatûûra. 18 Îndî warega kwîneenkanîra kîrî atongoria bara bangî mûnene wa Mbabironi, taûni îno îkaanenkanîrwa kîrî Ambabironi, na bakamîbîîthia na mwanki, na woû wengwa ûtiimonyoka njaraani ciao.’ ” 19 Sendekia eera Njeremia, “Ingûkuthûka antû kuuma Njunda bara baûrîîre kîrî Ambabironi, n'ûntû ndaûmba kûnenkanîrwa njaraani ciao bakambinyîîria.” 20 Njeremia amûcookeria amwîra, “Ambabironi batikûnenkanîra kîrî bo. Bunka athîkîra Mwathani ûrûthe ûgu ngûkwîra, na ûgaakara bwega, na ûtûûro bwaku bûkoonokua. 21 Îndî wegua ûregeete kûthi wîneenkanîra, ûûgû i bu Mwathani ambonia: 22 Aka bonthe bara bagaatigwa nyomba ya mûnene wa Njunda bakaarutwa bairîrwe atongoria bara bangî ba mûnene wa Mbabironi. Aka babu bakaabwîra:
Baabweneerie na babûcinda
acoore babu beenu bwetîgîîtie.
Mbayo cienu ibotereete ntondooni,
acoore beenu i babûtiganîrîîtie.
23 “Eekûrû beenu bonthe na aana beenu bakaathûkua bairîrwe Ambabironi, na woû wengwa ûtiimonyoka kuuma njaraani ciao, ûkaagwatwa i mûnene wa Mbabironi na ûtûme taûni îno îbîîthua na mwanki.”
24 Rîru Sendekia eera Njeremia, “Wegua wenda gûtûûra mwoyo, gûtirî muntû nwa ûmwe abatîîrue amenya nwa ata mantûûni ma rwaria rûrû rwetû. 25 Îndî atongoria babu bangî bakaaya kwîgua atî i ndaaragia naawe, na bakaaya bagakwîra, ‘Twîre bûra werire mûnene, na n'ata mûnene aakwîrire, ûtigaatwithe tûûya gûkûûraga,’ 26 rîru ûbeere, ‘Ga nkwerekaga mûnene atigancookie nyomba ya Njonathani nkuîra noogo.’ ”