Sendekia eeta Njeremia
37
1 Sendekia mwana wa Njosia aatuîkithua mûnene wa Njunda i Nebukandinesa mûnene wa Mbabironi, aathanire kaanyaani ka Njeoyakini mwana wa Njeoyakimu. 2 Îndî we, atongoria bara bangî kana antû ba nthî înu gûtirî we aathikîîria mîgambo ya Mwathani îra aarîîtie gûkûrûkîîra kîroria Njeremia.3 Amwe na ûgu, mûnene Sendekia aatûma Njeukari mwana wa Seremia barî na mûthînjîri wa Ngai Sefania mwana wa Maaseya kîrî kîroria Njeremia na ntûmwa îno, “Itû tûrombere kîrî Mwathani Ngai wetû.”
4 Njeremia nwa aangaangaga gatîgatî ga antû, n'ûntû ataarî akwingîrwa nceera. 5 Kagiitani gaku, njûûrî ya Faraû n'yarî îkuuma Miisiri, na rîra Ambabironi bara baacîgîîrîîtie Njerusaremu beegiirue mantû maao, bauma Njerusaremu.
6 Rîru kiugo kîa Mwathani kîayîîra kîroria Njeremia, 7 “Mwathani Ngai wa Isiraeri ariuga ûûgû: Biû bûrî baîrî bwîre mûnene wa Njunda, ûra aabûtûmire kîrî niû ûûgû, ‘Njûûrî ya Faraû, îra îraumagarûkîîte îîya gûgûteethia, îgaacooka nthî yao Miisiri. 8 Na Ambabironi bacooke baithûkîre taûni îno, bamîgwate na bamîbîîthie na mwanki.’
9 “Mwathani ariuga ûûgû: Bûtikeebenie, bûkîthûgaanagia, Ambabironi batiicooka babwithûkîra, bagaacooka babwithûkîre! 10 Wana kinya ûkeegua bwaturire njûûrî ya Ambabironi yonthe îra îrwaga naabi, na ûkeegua i bara bagurarie bonka batigeere maremaani maao, baumagarûka na bakabîîthia taûni îno.”
Njeremia arî nceera
11 Nyuma ya njûûrî ya Ambabironi kuuma Njerusaremu n'ûntû bwa njûûrî ya Faraû, 12 Njeremia aanjîîria kuuma Njerusaremu athiîte bwa nthî ya Benjameni kwîgwatîra rûgai rwake rwa into gatîgatî ga antû baao naagu. 13 Îndî rîra aakinyire Mwîrîgaani wa Benjameni, mûnene wa akaria naarî oogo, ûra eetagwa Iriya mwana wa Seremia, mwana wa Anania, amûgwata auga, “Woû ûthiîte kîrî Ambabironi!” 14 Njeremia auga, “Bûbu n'ûrongo. Ntithiîte kîrî Ambabironi.” Îndî Iriya ataamûthikîîria, aamûgwatire na amwira kîrî atongoria. 15 Nabo n'ûntû i baathûûri i Njeremia, bauga aturwe na aingîrwe nceera nyomba ya Njonathani ûra mwandîki, îra baatuîkithîîtie nceera.
16 Njeremia aathûûngîrua kanyomba kamwe ga tûnyomba twa nceera tûra twarî ruungu rwa tûra tûûngî, na aakara ku îgiita rîîraaya. 17 Rîru mûnene Sendekia aatûmana areetwa nyomba ya mûnene, kûra aamûûrîîrie na witho, “Kûrî mûgambo ûrî nau kuuma kîrî Mwathani?” Njeremia amûcookeria, “Yîî, ûkaanenkanîrwa kîrî mûnene wa Mbabironi.” 18 Rîru Njeremia aûria mûnene Sendekia, “N'ûthûûku bûrîkû ndûthîîte kîrî woû kana atongoria bara bangî baaku kana antû baba, kaingo bûmbingîra nceera? 19 Birîkû iroria biaku bira biakûroreerie biakwîra, ‘Mûnene wa Mbabironi atikwithûkîra kana aithûkîra nthî îno’? 20 Îndî îîndî, nthikîîria itû, mûnene mwathi wakwa. Ka ndeete gûkaya wakwa mbere yaku: Menya ûncookia nyomba ya Njonathani ûra mwandîki, mbûya gûkuîra ku.”
21 Rîru mûnene Sendekia aaruta watho Njeremia aigwe kîaragooni gîa akaria na eeyagwe mûgaate wa kîra ntugû kuuma kîrugîrooni kîa arugi ba mîgaate, mwanka rîra mîgaate yaathirire taûni înu yonthe. Kwoogu Njeremia aakarire kîaragooni gîa akaria ba nceera.