Njeremia 36

Mbaruku aathooma îbuku arî Nyomba ya Ngai

1 Mwankaani wa îna wa wathani bwa Njeoyakimu mûnene wa Njunda mwana wa Njosia, kiugo gîkî kîayîîra Njeremia kuuma kîrî Mwathani gîkiugaga, 2 “Thûkia îbuku wandîke mîgambo îno yonthe ndakwîra îgûrû rîa Isiraeri, Njunda na mîgongo îra îngî yonthe kuuma rîra ndanjîîrie kwaria naawe îgiita rîa wathani bwa Njosia mwanka îîndî. 3 Nwa wîgue rîra antû ba Njunda bakeegua inyamaara bira bionthe mbangîîte kûbareetera, bonthe nwa bagarûke bagatiga njîra ciao ira nthûûku, rîru naani nkabarekera ûthûûku bwao na wîyia bwao.”

4 Kwoogu Njeremia eeta Mbaruku mwana wa Neria, na Mbaruku aandîka îbukuuni mîgambo yonthe îra Njeremia aamwîraga aarîrîîtue i Mwathani. Mbaruku aandîka îbukuuni. 5 Njeremia eera Mbaruku, “I ndigîîrîîtue kûthûngîra nyomba ya Mwathani, 6 kwoogu îthi ku ûrî woû, na ntugû înu îîngî ya gûtîîrîra kûrîa biakûrîa n'ûntû bwa maromba ûthoomere antû mîgambo ya Mwathani îra waandîkire îbukuuni ngîkwîraga. Thoomera antû ba Njunda bonthe bara baayaga baumîîte taûni ciao. 7 Nwa wîgue bakeereka Mwathani, na wa kîra ûmwe agarûke atige njîra ciake inthûûku, n'ûntû ngoga na mûthûûro ûra Mwathani aarîîtie nau îgûrû rîa antû baba n'ûmûnene.”

8 Kwoogu Mbaruku mwana wa Neria aarûtha monthe mara kîroria Njeremia aamwîrîîte arûthe, aathooma îbukuuni mîgambo ya Mwathani arî nyomba ya Mwathani. 9 Mweriini wa kenda wa mwanka wa îtaano wa wathani bwa mûnene Njeoyakimu mwana wa Njosia wa Njunda, kagiita ga gûtîîrîra biakûrîa n'ûntû bwa maromba mbere ya Mwathani ikaugîîrîîtue kîrî antû bonthe Njerusaremu na bara baumîîte taûni cia Njunda. 10 Rîru Mbaruku arî nyomba ya Mwathani, kuuma kanyomba ka Ngemaria mwana wa Safani ûra mwandîki, kara kaarî ome ya bwa îgûrû, bantû a kûthûngîîra a mwîrîga Ûmûyerû wa nyomba ya Mwathani, aathoomera antû bonthe mîgambo ya Njeremia îra yarî îbukuuni.

11 Rîra Mikaya mwana wa Ngemaria mwana wa Safani, eegiirue mîgambo înu ya Mwathani yonthe kuuma îbukuuni, 12 auma agu aathi kîrî nyomba ya mûnene, aathûngîra kanyomba ka mwandîki kûra aruti ngûgî bara bangî bonthe baakari: Erisama ûra mwandîki, Nderaya mwana wa Semaya, Erinathani mwana wa Akibori, Ngemaria mwana wa Safani, Sendekia mwana wa Anania, na aruti ngûgî bonthe. 13 Mikaya abeera mîgambo yonthe îra aarî akwîgua, rîra Mbaruku aathoomire îbuku rîru antû bathikîîrîîtie. 14 Rîru aruti ngûgî bonthe baatûma Njeundi mwana wa Nethania, Nethania ûra aarî mwana wa Seremia, mwana wa Kusi akeere Mbaruku aaye na îbuku rîra aathoomereete antû. Kwoogu Mbaruku mwana wa Neria aakamata îbuku na aathi kîrî bo. 15 Nabo bamwîra, “Kara nthî ûtûthoomere.” Mbaruku n'we akara nthî abathoomera. 16 Rîra beegiirue mîgambo înu yonthe, baûndûkanîra bamakîîte, na beera Mbaruku, “Nwa mwanka twîre mûnene mîgambo îno yonthe.” 17 Rîru baûria Mbaruku, “Tatwîre, n'ata waandîkaangire mîgambo îno yonthe? I Njeremia aakwîrire ûkîandîkaga?” 18 Mbaruku abacookeria abeera, “N'we aambîîrire mîgambo îno yonthe, naani ndamîandîka na rangi îbukuuni.” 19 Rîru atongoria babu beera Mbaruku, “Îthiini bwîbithe, bûrî na Njeremia, na bûtikaareke muntû nwa ûmwe amenya ara bûrî.”

20 Bakûrîîkia kwaiga îbuku rîru kanyomba ka Erisama ûra mwandîki, baathi kîrî mûnene kîaragooni, na bamwîra mîgambo înu yonthe. 21 Mûnene aatûma Njeundi athi kûgîîra îbuku rîru, n'we arîgîîra kanyomba ka Erisama ûra mwandîki na aathoomera mûnene na atongoria bonthe rîo barûûngi rûteere rwake. 22 Kwarî mweriini wa kenda na mûnene aakari kanyomba kara gaatûmîkaga îgiita rîa mpîo, na mwanki nwankanaga ûrî riiko mbere yake. 23 Njeundi aarîîkia kûthooma icuncî bithatû kana bina ûgu, mûnene aabigiitaga na kayiû kaniini akabigera riiko. Aathi na mbere akîrûthaga woogu mwanka îbuku rîru rîonthe rîabîa i mwanki rîathira. 24 Amwe na ûgu mûnene na atongoria baake bonthe, wana bakwîgua mîgambo înu yonthe bataamaka, kana bateembûranga nguo ciao kwonania kîeba. 25 Kinya wegua Erinathani, Nderaya na Ngemaria ibeerekaga mûnene bakîmwîraga atikaabîîthie îbuku, ataabathikîîria. 26 Na mûnene aatha Njerameeri mwana wa mûnene na Seraya mwana wa Asirieri na Seremia mwana wa Abundeeri bagwate Mbaruku ûra mwandîki na kîroria Njeremia. Îndî Mwathani n'aarî akûbaitha.

27 Mûnene akûrîîkia kûbîîthia îbuku rîru rîarî na biugo bira Mbaruku aandîkîîte eerîîtwe i Njeremia, kiugo kîa Mwathani kîayîîra Njeremia gîkiugaga, 28 “Thûkia îbuku rîngî na ûrîandîke mîgambo yonthe îra yarî îbukuuni rîa mbere, rîra Njeoyakimu mûnene wa Njunda aabîîthiirie. 29 Na wîre Njeoyakimu mûnene wa Njunda, ‘Mwathani ariuga ûûgû: Wabîîthiirie îbuku ûkîûragia, “I kî n'ûntû wandîkire ku, atî na mma, mûnene wa Mbabironi akaaya na athirie nthî îno na aûrage antû na nyamû kuuma ku?” 30 N'ûntû bwa ûgu Mwathani ariuga ûûgû îgûrû rîa Njeoyakimu mûnene wa Njunda: Gûtirî we wa nciarwa ciake akooro aathana ûneneeni bwa Ndaundi, na kiimba gîake gîgaateegwa mwathûûni wa mûthenya na mpîo ya ûtugû. 31 Na nkamûkaanûkia amwe na aana baake na atongoria bara bangî n'ûntû bwa ûthûûku bwao, nkabareetera bo, na bara batwîre Njerusaremu, na antû ba Njunda, inyamaara bionthe bira ndabeerire îndî bateegua.’ ”

32 Rîru Njeremia aathûkia îbuku rîngî aaneenkera Mbaruku mwana wa Neria ûra mwandîki, aandîka ku bûra Njeremia aamwîraga, mîgambo yonthe îra yarî îbukuuni rîra Njeoyakimu mûnene wa Njunda aarî akûbîîthia na mwanki, na mîgambo îmingî îbuaneene yongeerwa kîrî yoo.