Njeremia 35

Gwîtîgîka kwa Aarekabu

1 Gîkî i kîo kiugo kîra kîayîîre Njeremia kuuma kîrî Mwathani îgiita rîa wathani bwa Njeoyakimu mwana wa Njosia mûnene wa Njunda, gîkiugaga, 2 “Îthi mûciî wa Aarekabu warie nabo, na ûbareete nyomba ya Mwathani Ûbathûngîrie kanyomba kamwe, rîru ûbakundie ndibei.” 3 Kwoogu ndaathi ndaagîîra Njaasania mwana wa Njeremia, mwana wa Abasinia, na aruagina na nthaka ciake cionthe, mûciî unthe wa Arekabu. 4 Ndabareeta nyomba ya Mwathani, kanyomba ka athingati ba Anani mwana wa Igindaria muntû wa Ngai. Kanyomba gaku kaarî waagu mbere ya kanyomba ga atongoria, kara kaarî îgûrû ya înu ya Maaseya mwana wa Sarumu mûkaria wa mwîrîga. 5 Rîru ndaigîîra mbakûri ciûyûri ndibei na ikombe mbere ya antû ba mûciî wa Arekabu na ndabeera, “Înyuani ndibei.” 6 Îndî baacookia bauga, “Arî, tûtiinyua ndibei, n'ûntû kîûyûûyû gîetû Njonandabu mwana wa Rekabu aatwere yathana rîrî rîkuuga, ‘Biû kana nciarwa cienu gûtikaagîte we akooro anyua ndibei. 7 Kinya bûtigaake nyomba, bwanda mbeû kana bwanda mînda ya mîcabiibû, bûtikooro eegua bûrî na nwa kîmwe gîa into bibi, îndî bûtûûrage maremaani rîonthe, kaingo bûtûûra îgiita rîîraaya nthîgûrû îra bûrî ta ageni.’ 8 I twathîkîrîîte bûra bunthe kîûyûûyû gîetû Njonandabu mwana wa Rekabu aatwathire. Tiû kana eekûrû beetû kana nthaka cietû na aarî beetû gûtirî we aanyua ndibei 9 kana aaka nyomba atûûra ku kana arî na mînda ya mîcabiibû kana aanda irio. 10 Tûtûûraga maremaani na itwathîkagîra cwe mara monthe kîûyûûyû gîetû Njonandabu aatwathire. 11 Îndî rîra Nebukandinesa mûnene wa Mbabironi aithûkîîre nthî îno, twauga, ‘Ncûûni, nwa mwanka tûthi Njerusaremu tûkuthûke njûûrî ya Ambabironi na ya Aaramu.’ I ntûma tûtwîre Njerusaremu.”

12 Rîru kiugo kîa Mwathani kîayîîra Njeremia gîkiugaga, 13 “Mwathani Mwene Inya Ngai wa Isiraeri ariuga ûûgû: Îthi ûûrie antû ba Njunda na bara batwîre Njerusaremu ata rî, ‘Ka bûtaûmba kûthooma na bwathîkîra mîgambo yakwa?’ I bu Mwathani akûûria. 14 ‘Nciarwa cia Njonandabu mwana wa Rekabu iciathîkîrîîte yathana rîrî rîa kûrega kûnyua ndibei, mwanka îmunthî tûrî batinyuunyaga ndibei, n'ûntû i baathîkagîra watho bwa kîûyûûyû kîao. Îndî biû nkarîîte nkîbwîraga kaîrî na kaîrî, amwe na ûgu bûtimbathîkagîra. 15 Îgiita na îgiita intûmîîte aruti ngûgî baakwa bonthe tabo iroria kîrî biû. Babwîra, “Wa kîra ûmwe wa cienu nwa mwanka agarûke atige njîra ciake inthûûku na bûcookanîîrie mîtugo yenu. Bûtikaathingate ngai cingî bûcitûmîkîra. Rîru bûgaatûûra nthîgûrû îra mbwete amwe na biûyûûyû bienu.” Îndî bûtaanthikîîria kinya nwa aniini. 16 Nciarwa cia Njonandabu mwana wa Arekabu ibaathîkîrîîte yathana rîra kîûyûûyû kîao kîabeere, îndî antû baba batimbathîkîrîîte.’ 17 Kwoogu Mwathani wa Njûûrî, Ngai wa Isiraeri ariuga ûûgû, ‘Nkaaretera antû ba Njunda na bara bonthe batwîre Njerusaremu kînyamaara kîonthe kîra ndaugire îgûrû rîao. N'ûntû ndaariirie nabo na bataathikîîria, ndabeeta, na bataambîtîga.’ ”

18 Rîru Njeremia eera mûciî wa Arekabu ata rî, “Mwathani Mwene Inya, Ngai wa Isiraeri ariuga ûûgû, ‘I bwathîkîrîîte yathana rîa kîûyûûyû kîenu Njonandabu mwana wa Rekabu na bwathingata mawatho maake monthe na bwarûtha bunthe bûra aabwathire.’ 19 N'ûntû bwa ûgu, niû Mwathani Mwene Inya, Ngai wa Isiraeri ndiuga kwa Njonandabu mwana wa Rekabu gûtikooroaga muntû wa gûntûmîkîra.”