Sendekia aakaanua
34
1 Kiugo kîra kîayîîre Njeremia kuuma kîrî Mwathani, rîra Nebukandinesa, mûnene wa Mbabironi na njûûrî yake yonthe kuuma mooneneeni monthe na antû bonthe ba mîgongo îra aathaga, i baarûaga na Njerusaremu na taûni cionthe ira ciamîthiûrûkîrîîte. 2 Mwathani, Ngai wa Isiraeri, ariuga ûûgû, “Îthi kîrî Sendekia mûnene wa Njunda ûmwîre, ‘Mwathani ariuga ûûgû: Ndî akubî kûnenkanîra taûni îno njaraani cia mûnene wa Mbabironi, na akamîbîîthia na mwanki. 3 Na woû wengwa ûtiimonyoka kuuma njaraani ciake, îndî na mma ûkaagwatwa na ûneenkanîrwe kîrî we. Ûkoona mûnene wa Mbabironi na bwarie n'we bûcûûbeene, na ûkaathi Mbabironi.’ 4 Amwe na ûgu thikîîria kiugo kîa Mwathani, woû Sendekia mûnene wa Njunda. Mwathani ariuga ûûgû îgûrû rîaku. ‘Ûtiûragîrwa ndûani, 5 ûgaakua na ûkiri. Bakaabua mwanki wa gûgûtîîya wa ta bûra baabuîrîîre biûyûûyû bienu na anene bara baarî mbere yaku na bakûrîrîre bakiugaga, “Irû yîî mwathi wakwa!” I niû ningwa ndaiga wîrane bûbû, i bu Mwathani akuuga.’ ”6 Rîru kîroria Njeremia eera Sendekia mûnene wa Njunda mantû mama monthe, arî Njerusaremu. 7 Aarûthaga ûûgû wa njûûrî ya mûnene wa Mbabironi îkîrûaga na Njerusaremu na taûni cia Njunda ira ingî cionthe ciatigeere ta cio, Rakisi na Aseka. Ino nwa cio taûni cionka ira mbirigîre ciatigeere cia Njunda.
Kûthaûrwa gwa nkombo
8 Kiugo kîa Mwathani kîayîîra Njeremia nyuma ya mûnene Sendekia akwaiga kîrîîkanîro na antû bonthe Njerusaremu gîa kuugîîria kûthaûrwa gwa nkombo. 9 Woora muntû n'aabatîîrue arekeeria nkombo ciake cia Kîibirania, arî mûka kana muntû mûrûme, gûtirî we eetîgîîrîîtue gûkara na muntû ûra ûngî wa kuuma Njunda arî nkombo. 10 Na baathîka, atongoria bonthe na antû bonthe bara baathûngîrîîte kîrîîkanîrooni gîkî bonthe bakaarekeeria nkombo ciao, barî aka kana antû arûme, kaingo batagwatwa kaîrî, baathîka na bairekeeria. 11 Îndî nyumaani baagarûka baathûkia nkombo ira baarî bakûrekeeria baigwata kaîrî.
12 Rîru kiugo kîa Mwathani kîayîîra Njeremia gîkiugaga, 13 “Mwathani Ngai wa Isiraeri ariuga ûûgû, ‘Niû ningwa i ndaarûthire kîrîîkanîro na biûyûûyû bienu rîra ndaabarutire Miisiri, nthî ya ûkombo, ndauga, 14 “Mûthiani wa mwanka wa mûgwanja, wa kîra ûmwe wenu nwa mwanka arekeerie Mûibirania ûra wîbendeetie kîrî biû na abûrutîra ngûgî mîanka îthanthatû, nwa mwanka bûmûrekeerie.” Îndî biûyûûyû bienu bitaanthikîîria kana bambathîkîra. 15 I rua mûno bûreeririre na bwarûtha bûra kûbatîîrue mbere yakwa, wa kîra ûmwe augîîria kûthaûrwa kîrî antû ba nthîgûrû yao. Kinya bwarûtha kîrîîkanîro mbere yakwa bûrî nyomba îra îîtanîrîtue na riîtwa rîakwa. 16 Îndî îîndî i bûgarûkîîte na bwatiga gûntîîya, woora ûmwe wa cienu n'athûkîîtie nkombo ciake ya muntû mûrûme na ya mûka ira bûrarekeereetie ithi kûra i kwenda. I bûciakîîrîîtie gûtuîka nkombo cienu kaîrî.’
17 “Kwoogu Mwathani ariuga ûûgû, ‘I bûregeete kûûmbathîkîra na njîra ya kûrega kûrekeeria antû ba nthî yenu. Kwoogu îîndî nkabûrekeeria bûthirue na rûûyiû, mîrimo na yûûra, i bu Mwathani akuuga. Ngaatûma bûmakua i mîgongo yonthe ya nthîgûrû. 18 Antû bara baunîîte kîrîîkanîro gîakwa na baarega kûrûtha bûra kiugîîte kîra baarîîkanîîre mbere yakwa, nkabarûtha ta kayaû kara baagiitaniirie maita maîrî rîru baagiitanîîria gatîgatî ga icuncî biako. 19 Atongoria ba Njunda na Njerusaremu, na atongoria ba mûnene, athînjîri ba Ngai, na antû bonthe ba nthî îno bara baagiitîîre gatîgatî ga icuncî bia kayaû gaku, 20 nkabaneenkanîra kîrî anthû baao bara bacûaga kûbaûraga. Biimba biao bigaatuîka irio bia nyoni cia îgûrû na nyamû cia kîthaka.
21 “Nkaanenkanîra Sendekia mûnene wa Njunda na atongoria baake kîrî anthû baao bara beendaga kûbaûraga, njûûrî ya mûnene wa Mbabironi, îra îratigîîte kûrûa naabi. 22 Mwathani ariuga, ‘I nthiîte kûruta watho, na nkabacookia taûni îno. Bakaarûa n'yo, bamîthûkie, na bamîbîîthie. Na ngaatuîkithia taûni cia Njunda maganjo matatwîre antû.’ ”