Wîrane bwa gûcookanîîrua
33
1 Kiugo kîa Mwathani kîayîîra Njeremia îgiita rîa maîrî, wa aingîrîtwe agu kîaragooni ara akaria baakaraga, gîkiugaga, 2 “Ûûgû i bu Mwathani ûra aûmbire nthîgûrû, Mwathani ûra aamîûmbire amîrikithia, Mwathani i rîo riîtwa rîake, 3 ‘Mbîta na naani ngagwîtîga, na ngakwîra mantû maanene na maithe mara ûtaiyî.’ 4 N'ûntû Mwathani Ngai wa Isiraeri ariuga ûûgû îgûrû rîa nyomba cia taûni îno na nyomba cia anene ba Njunda ira ciomboraniirue kaingo itûmîrwa kwîrigîîria kîrî anthû bara batûmagîra ithûmba bia mûthetu kûbaithûkîra. 5 Bara bakaathi kûrûa na Ambabironi, bagaaciûyûria ntuungu kunthe cia antû bara nkaathiria na mûthûûro wakwa na ngoga. Nkauthatîria taûni îno mûgongo n'ûntû bwa ûthûûku bwao bunthe. 6 Îndî raitha, nkamireetera ûntû bwa thîîria na bwa kûmîoria; nkooria antû baakwa na ndeke bakeneere ûkiri bwingî na bakare mayîîga. 7 Ngaacookia Njunda na Isiraeri kuuma ûkombooni na mbaake kaîrî wa bûra baakari mbere. 8 Nkabatheria kuumania na wîyia bunthe bûra barûthîîte kîrî niû na nkabarekera meeyia maao monthe ma kûûmbûmîria kîongo. 9 Na taûni îno kîrî niû îkaagîa na îgweta, gîkeno, gûkumua na gîtîîyo mbere ya mîgongo yonthe ya nthîgûrû îra îkeegua mawega monthe mara nkûmîrûthîra. Bagaakuthûka na bainaine n'ûntû bwa wega bunthe na ûkiri bûra nkaabaa.10 “Kaîrî Mwathani ariuga ûûgû: Gûntû gûkû buugaga, ‘N'îganjo, gûtirî antû kana nyamû,’ taûniini cia Njunda na barabaraani cia Njerusaremu ira ciaûrire, itaatwîrwe n'antû kana nyamû, gûkeeguîka kaîrî 11 tûyû twa kûgwîrua na twa nkena, tûyû twa mûgûrani na mûgûrwa, na twa bara bareeteete biewa bia nkaatho nyomba ya Mwathani bakiugaga,
Cookeriani Mwathani Mwene Inya nkaatho,
n'ûntû Mwathani n'ûmwega,
n'ûntû wendo bwake bûra bûtathiraga bûtûûraga tene na tene.
“N'ûntû ngaacookanîria agwate ba nthî îno wa bûra baakari mbere, i bu Mwathani akuuga.
12 “Mwathani Mwene Inya ariuga ûûgû, ‘Bantû aaga ateetwe, gûtatwîre antû kana nyamû, na taûniini ciayo cionthe gûkeegua kûrî na ndîîthia kaîrî îra arîîthi bakaarîîthagia ng'ondu ciao. 13 Taûniini cia nthî ya irîma, Sefera na Negebu, nthîgûrû ya Benjameni, ntûûraani ira ithiûrûkîrîîte Njerusaremu na taûniini cia Njunda, ng'ondu igaakûrûkîîra njaraani cia ûra ûcitaraga,’ i bu Mwathani akuuga.
14 “Mwathani ariuga: Ntugû i ciiyîîte, rîra nkaingia wîrane bûra ndeeranire kîrî antû ba Isiraeri na kîrî antû ba Njunda.
15 Kagiitaani gaku,
ngaatûma rwong'i rwagîru ruuma kuuma rûrîîyooni rwa Ndaundi,
akaarûtha ûmma na bûra kûbatîîrue nthîgûrû.
16 Kagiitaani gaku Njunda îkeegua îrî na ûkaria
na Njerusaremu îgaatûûra mayîîga.
Na rîrî i rîo riîtwa rîra îgeetwa:
‘Mwathani n'we wagîru bwetû.’
17 “N'ûntû Mwathani ariuga ûûgû: Isiraeri ûkeegagua rîonthe kûrî na mûnene kuuma rûrîîyooni rwa Ndaundi, 18 na rîonthe ûkeegagua kûrî na athînjîri ba Ngai kuuma mwîrîgaani wa Rawi bakûndutîra biewa bia kûbîîthua na biewa bia irio na igongwana bingî.”
19 Kiugo kîa Mwathani kîayîîra Njeremia gîkiugaga, 20 “Mwathani ariuga ûûgû, ‘Ûkeegua bwaûmba kwînyangia kîrîîkanîro gîakwa kîa mûthenya na ûtugû, kaingo biteegua birî oogo kagiita kara kabatîîrue, 21 rîru kinya kîrîîkanîro gîakwa na Ndaundi mûruti ngûgî wakwa na kîa Arawi athînjîri ba Ngai bara barutaga ngûgî mbere yakwa, nwa kiunwe na Ndaundi akaaga muntû wa nciarwa ciake wa kwathana. 22 Wa ta bûra nthata cia îgûrû itatarîka kana mûthanga wa îria ûtathimîka, nwa ta bu ngaatûma nciarwa cia Ndaundi mûruti ngûgî wakwa na Arawi bara barutaga ngûgî mbere yakwa baingîa.’ ”
23 Kiugo kîa Mwathani kîayîîra Njeremia, 24 “Ûtiîgîîtue antû baba bakiuga, ‘Mwathani nameneete mîgongo îno îîrî aathuurire ya Isiraeri na Njunda?’ Kwoogu bakaameneeria antû baakwa na batibataraga ta mûgongo. 25 Mwathani ariuga ûûgû, ‘Ûkaaya kwîgua ntaarûngîka kîrîîkanîro gîakwa na ûtugû na mûthenya na ndûtha mawatho mara maigîîtwe ma kwatha îgûrû na nthîgûrû, 26 bûmenye nkaarega nciarwa cia Njakubu na Ndaundi mûruti ngûgî wakwa na ntiithuura ûmwe wa aana baao wa kwatha nciarwa cia Îburaîmu, Isaka na Njakubu. N'ûntû nkabacookia kuuma ûkombooni na mbeegîîrue kîao.’ ”