Njeremia aagûra mûnda
32
1 Gîkî i kîo kiugo kîra kîayîîre Njeremia kuuma kîrî Mwathani mwankaani wa îkûmi wa wathani bwa Sendekia mûnene wa Njunda, ûra warî mwanka wa îkûmi na înaana wa Nebukandinesa. 2 Îgiita rîru, njûûrî ya mûnene wa Mbabironi n'yathiûrûkîrîîte Njerusaremu, na Njeremia ûra kîroria aingîrîîtwe kîaragooni kîa nyomba ya mûnene wa Njunda ara akaria baakaraga, 3 kûra Sendekia mûnene wa Njunda aamûthaîkîîte. Akîûragia, “I kî n'ûntû ûroragia bûra ûroragia? Ûkiugaga, ‘Mwathani ariuga ûûgû: Ndî akubî kûnenkanîra taûni îno kîrî mûnene wa Mbabironi, na akamîthûkia. 4 Sendekia mûnene wa Njunda atiibuka kuuma njaraani cia Ambabironi îndî ûmma akaanenkanîrwa kîrî mûnene wa Mbabironi, na akaaria n'we ûthiû kwa ûthiû na amwone na meetho maake. 5 Akaira Sendekia Mbabironi, naara agaakara mwanka ndîîkanie n'we, i bu Mwathani akuuga. Gwarûa na Ambabironi, ûtiûmbana.’ ”6 Njeremia auga, “Kiugo kîa Mwathani kîambûyîîre kîauga: 7 Anameri mwana wa Sarumu mûruagina wa abaagu n'akûûya kîrî woû akwîre, ‘Gûra mûnda wakwa ûra ûrî Anathothi, n'ûntû ta ûrî muntû wa akubî wa mûciî i woû ûbatîîrue ûcugûra.’
8 “Rîru, wa ta bûra Mwathani augîîte, mwana wa mûruagina wa baaba Anameri aaya kîrî niû kîaragooni gîa akaria ambîîra, ‘Gûra mûnda wakwa ûra ûrî Anathothi nthîgûrû ya Benjameni. N'ûntû i woû ûbatîîrue gûcukûûra, îîgûrîre uu ûtwîke waku.’
“I ndaamenyire atî gîkî kîarî kiugo kîa Mwathani; 9 kwoogu ndaagûra mûnda ûra ûrî Anathothi kuuma kîrî mwana wa mûruagina wa baaba ta we Anameri na ndamûthimîra sekeri îkûmi na mûgwanja cia fetha. 10 Ndaacaina baarûa na ndaaringa mûûni, ndeeta akûûyî, na ndaathima fetha ithimiini. 11 Rîru ndaaruta baarûa înu ya ûgûri yarî ndinge mûûni wa ta bûra watho na wîthîre bwakari, amwe na îra îtaarî ndinge mûûni 12 na ndaanenkera Mbaruku mwana wa Neria mwana wa Maaseya baarûa ya ûgûri bwa mûnda, mbere ya mwana wa mûruagina wa baaba Anameri, na mbere ya ankûûyî bara baacainîîte baarûa înu, na mbere ya antû ba Njunda bonthe bara baakari kîaragooni gîa akaria.
13 “Ndaapa Mbaruku mataaro mama ndî mbere yao, 14 ‘Ndabeera Mwathani Mwene Inya, Ngai wa Isiraeri ariuga ûûgû: Ruta baarûa ino cia ûgûri, îra ndinge mûûni na îra îtarî ndinge mûûni, na ûciîkîre nyûngûûni kaingo ikara îgiita rîîraaya.’ 15 N'ûntû Mwathani Mwene Inya Ngai wa Isiraeri ariuga ûûgû, ‘Nyomba, mînda amwe na mînda ya mîcabiibû bikaagûrwa kaîrî nthîgûrû îno.’
16 “Nyuma ya kûnenkanîra baarûa ya ûgûri kîrî Mbaruku mwana wa Neria, ndaaromba Mwathani ndauga:
17 “ ‘Îî Mwathani Ngai, waûmbire îgûrû na nthî na inya yaku înene. Gûtirî bu bûkûremaga. 18 Woû wonanagia wendo bwaku bûra bûtathiraga kîrî antû magiri îndî ûgakaanûkia aana n'ûntû bwa meeyia ma beethe. Woû Ngai ûmûnene na wa inya, ûra riîtwa rîake i Mwathani Mwene Inya, 19 itûmi biaku i biinene na nûrûthaga mantû maanene. Meetho maaku i maraithîîte njîra cia antû cionthe, ûrîaga muntû wonthe kûringana na mîtugo yake na bûra ngûgî ciake ikari. 20 Waringire biama na magegania Miisiri na nwa ûthiîte na mbere kûbiringa kinya îîndî, Isiraeri na gatîgatî ga antû bonthe, na werûthîra riîtwa rîra rîrî oogo kinya îmunthî. 21 Warutire antû baaku ba Isiraeri bauma Miisiri na inya yaku înene na magegania, na inya înene na njara îrî ntambûrûkie na ya kûmakania kûûnene, 22 na wabaa nthî îno, îra wathiîtîîrie biûyûûyû biao kûbaa yoo, nthî yûûyûrîîte îria na ûkî. 23 Baathûngîîre beegwatîra yoo yatuîka yao, îndî bataakwathîkîra kana bathingata watho bwaku, bataarûtha bûra wabaathire barûthe. N'ûntû bwa ûgu wabareetera kînyamaara gîkî kîonthe.
24 Raitha bûra ithûmba bia mûthetu biûmbîîtwe bierekereete nthingo cia taûni îno bamîthûkia. N'ûntû bwa ndûa, yûûra na mîrimo, taûni înu îkaanenkanîrwa njaraani cia Ambabironi bara bamiithûkîrîîte. Bûra waugire bûgûkarîka, wa ta bûra ûkwona îîndî. 25 Amwe na ûgu, woû Mwathani Ngai, n'ûmbîîrîîte, “Gûra mûnda na fetha na ûcerie ankûûyî,” kinya wegua ntûûra îno înenkanîrîtwe njaraani cia Ambabironi.’ ”
Ngai aapa antû wîrane bwa gûcooka
26 Kiugo kîa Mwathani kîayîîra Njeremia gîkiugaga, 27 “I niû Mwathani, Ngai wa antû bonthe. Kûrî ûntû bûûmo mûno kîrî niû? 28 N'ûntû bwoogu, Mwathani ariuga ûûgû: Imbengeerie kweyana taûni îno kîrî antû ba Mbabironi na kîrî Nebukandinesa mûnene wa Mbabironi, na amîthûkie. 29 Antû ba Mbabironi bara bakûrûa na taûni îno bakaathûûngîra na bamîmuntie mwanki, bamîbîîthie buru, amwe na nyomba kûra antû banthûûrîîrie na njîra ya kûbîîthîria Mbaari igongwana rûûgûrû na gûtûûra biewa bia biakûnyua kîrî ngai ciingî.
30 “Antû ba Isiraeri na ba Njunda batûûraga kûrûtha mantû maathûûku mbere yakwa kuuma wîthî bwao, ûmma bo gûtirî bûngî barûthaga tatiga kûnthûûria gûkûrûkîîra ngûgî cia njara ciao,” i bu Mwathani akuuga. 31 “Kuuma ntugû îra taûni îno yaakirwe mwanka îmunthî tûrî, nwaka îrurumûkagia mûthûûro wakwa na ngoga, kwoogu nwa mwanka mîrutarute mbere yakwa. 32 Antû ba Isiraeri na ba Njunda ibanthûûrîîtie n'ûthûûku bunthe bûra barûthîîte, barî bo bongwa, anene baao, atongoria baao, athînjîri ba Ngai baao na iroria, antû ba Njunda na antû ba Njerusaremu. 33 Bambuthatîria mîgongo yao bantû akûndaitha, wana wegua indaabarutanire kaîrî na kaîrî, bataathikîîria kana beetîgîîria gûcookanîîrua. 34 Baigire mîbuanaano îra nthwîre nyomba yakwa îra îgwetanîrîîtue na riîtwa rîakwa na bamîîkîra mûgiro. 35 Baakîra Mbaari gûntû gûûkîîru kîbondeeni kîa mwana wa Inomu baaruta aarî baao na nthaka ciao igongwana kîrî Moreki wana wegua ntaabaathîîte bu, kana mbwîkîra mathûgaaniani maakwa atî barûthe ûntû bûûthûûku ta bûbû, na kwoogu baatûma Njunda îîyia.
36 “Îîndî Mwathani ariuga ûûgû, Ngai wa Isiraeri, îgûrû rîa taûni îno, îra buugaga îgûrû rîayo, ‘Nîkûnenkanîrwa kîrî mûnene wa Mbabironi gûkûrûkîîra ndûa, yûûra na mîrimo.’ 37 Na mma nkabeethîrania kuuma nthîgûrû ira cionthe nkaabanyagaaria i ngoga na mûthûûro ûmûnene, nkabacookia gûntû gûkû na ndeke batûûre mayîîga. 38 Nabo bagaatuîka antû baakwa, naani ngaatuîka Ngai wao. 39 Nkabaa nkoro îmwe na yeerekeeria rîmwe, kaingo baantîîyaga rîonthe n'ûntû bwa wega bwao na nciarwa ciao. 40 Nkaarûtha kîrîîkanîro gîa gûtûûra nabo, atî ntikoorotiga kûbarûthîra mawega, ngeekîra ûntû bwa gûntîîya nkorooni ciao, kaingo batauma kîrî niû. 41 Ngaakeneera kûbarûthîra mawega na ûmma nkabaanda kaîrî nthîgûrû îno na nkoro yakwa yonthe na mwoyo wakwa unthe.
42 “Mwathani ariuga ûûgû, wa ta bûra ndarareteere antû baba kînyamaara gîkî kîneneete ûûgû, nwa ta bu nkaabareetera wega bûra bunthe ndeeranire nabo. 43 Mînda îkaagûrwa nthî îno kaîrî îra buugaga, ‘N'yateerwe, îtirî antû kana nyamû, n'ûntû n'yanenkanîîrwe kîrî antû ba Mbabironi.’ 44 Mînda îkaagûrwa na fetha, na baarûa icainwe na ciîkîrwe mûûni na gûkûûyîîrwe n'ankûûyî, nthî ya Benjameni, gûntû kûra kûthiûrûkîrîîte Njerusaremu, na taûniini cia Njunda, cia nthî ya irîma, Sefera, na Negebu, n'ûntû nkabacookeria atae baao, i bu Mwathani akuuga.”