31
1 Mwathani ariuga ata rî, “Kagiitaani gaku nkeegua ndî Ngai wa mîîrîga yonthe ya Isiraeri, na bakeegua barî antû baakwa.”2 Ûûgû i bu Mwathani akuuga,
“Antû bara boonokire rûûyiû
i boonire ûtugi rwanda,
rîra ndaayire kwaa Isiraeri kînogoko.”
3 Mwathani nambuumîîre tene ambîîra:
“Nkwendeete na wendo bûtakîthira
kwoogu i nthiîte mbere kwîgua ndî mwîtîgua kîrî woû.
4 Ngagwaka kaîrî naawe ûgaakîka,
woû Isiraeri ûkari ta mwarî ûtaamaama na muntû mûrûme.
Ûkaathûkia tamburiini ciaku kaîrî
na uumagarûke ûkiinaga nyîmbo cia kûgwîrua.
5 Ûkaanda mînda yaku ya mîcabiibû kaîrî
irîmaani bia Samaria,
arîmi bakamîanda
na bakeneere maciaro maayo.
6 Ntugû îmwe îgaakinya îra akaria bakaugîîria nainya
barî irîmaani bia Eburaimu bakiugaga,
‘Ncûûni tûthi Sayuuni
kîrî Mwathani Ngai wetû.’ ”
7 N'ûntû ûûgû i bu Mwathani akuuga,
“Inîraani Njakubu bûkeneete.
Ûkîîriani tûyû twenu kîrî mûnene wa mîgongo,
ugîîriani na bûmûkumie bûkiugaga,
‘Mwathani, onokia antû baaku,
matigari ma Isiraeri.’
8 Ta cûûba bwone nkabaruta nthî îra îrî bwa îgûrû
na mbeethîranie kuuma mîthia ya nthî.
Gatîgatî kaao gûkeegua kûrî na ntûngi na ithua,
eekûrû barî na nda na kinya barî na ûrûrû bwa kûgîa na mwana,
bagaacooka barî gîkundi kîînene mûno.
9 Bakaaya bakîrîraga,
nkabatongoreeria bakîrombaga mbacookeetie.
Nkabatongoreeria miurooni ya ndûûyî
njîraani i mbaranîru ira batagîtûgûûga,
n'ûntû niû nkari ta îthe wa Isiraeri,
na Eburaimu i ta kîîmbere gîakwa kîa muntû mûrûme.
10 Thikîîriani kiugo kîa Mwathani, biû mîgongo,
na bûkîmenyithanie nthîgûrû cia kûraaya ira irî icîgîîriani bia maria.
‘We ûra aanyagaariirie Isiraeri akabeethîrania amwe
na amenyeere ng'ondu ciake ta mûrîîthi.’
11 N'ûntû Mwathani akaathaûra Njakubu,
na abakûûre kuuma njaraani cia bara barî na inya nkûrûki yao.
12 Bakaaya baine nainya bakeneete barî kîrîmaani gîa Sayuuni îgûrû.
Bagaakeneera into biega bia Mwathani
irio, ndibei yaimbia na maguta,
tûgondu, tûbûri na tûyaû twa ng'ombe.
Bagaakara ta mûnda ûtûûrîrîîtue rûûyî bwega
na batiîgua barî na kîeba kaîrî.
13 Rîru aarî bakaina na bagwîrue,
wana kinya nthaka na akûrû.
Nkaagarûra kîeba kîao ngîtuîkithie gîkeno.
Nkabakirakiria mbae kûgwîrua bantû a kîeba.
14 Ngaatûma athînjîri ba Ngai baganîrwe n'ûntû bwa wingî bwa into,
na antû baakwa baganîrwe n'into biega bira nkeeyana,”
i bu Mwathani akuuga.
15 Ûûgû i bu Mwathani akuuga:
“Mbu n'îkwîguîka Rama,
kîrîro na kîîthikîîro kîînene,
Raeri akîrîrîra aana baake
aarema gûkirakirîka,
n'ûntû aana baake batirî mwoyo.”
16 Ûûgû i bu Mwathani akuuga:
“Kira, tiga kûrîra
na meetho maaku matige kuuma meethori,
n'ûntû ûkaarîwa ngûgî îra ûbarutîrîîte,”
i bu Mwathani akuuga.
“Nabo bagaacooka kaîrî baume nthîgûrû ya anthû.
17 Kwoogu kûrî na wîrîgîîro kîrî nciarwa ciaku ira ikaaya,”
i bu Mwathani akuuga.
“Aana baaku bagaacooka nthîgûrû yao.
18 Na mma i mbîgîîtue Eburaimu agîîkayîra akiugaga:
‘Wankaanûkiirie ta njaû itaamenyeria îcoki,
naani i mbîgîîtue.
Ncookanîîria naani ncooke,
n'ûntû i woû Mwathani Ngai wakwa.
19 N'ûntû kuuma nkûgwa, i ndeeririre
na rîra ndaamenyire i ndaagwatirwe i kîeba.
I ndaagîîre îgi na ndaagwatwa i nthoni mûno
n'ûntû bwa mantû mara ndaarûthire wîthîîni bwakwa.’
20 Anga Eburaimu ti mwana wakwa mwendwa,
mwana ûnkenagia?
Wana kinya ûkeegua i mûgondokagîra,
nwa mûririkanaga.
Kwoogu nkoro yakwa nînyamaaraga mûno n'ûntû bwake,
kwoogu nkamwîgîîrua kîao kîînene,”
i bu Mwathani akuuga.
21 “Îkîraani ndwano cia kûmenyithania njîra,
îkîraani bionanîîria.
Raithaani njîra inu bwega,
njîra inu bwathiire nacio.
Cooka, woû Isiraeri mwarî ataamaama na muntû mûrûme,
ûcooke taûniini ciaku.
22 I mwanka rî ûkaariûnga
woû mwarî ûtarî mwîtîgua?
N'ûntû Mwathani akaarûtha mantû maimbia nthîgûrû,
mûka agaakaria muntû mûrûme.”
23 Ûûgû i bu Mwathani Mwene Inya, Ngai wa Isiraeri akuuga, “Rîra ngaatûma mantû makara bwega kaîrî, antû ba nthîgûrû ya Njunda na taûni ciayo bagaacooka gûtûmagîra biugo bibi, ‘Mwathani akûthaarime, woû bantû atheru, woû kîrîma kîîtheru.’ 24 Antû bagaatûûranîra Njunda amwe na taûni ciayo cionthe, arîmi na arîîthi bara bathaamaga na nyamû ciao cia ndîîthia. 25 Naani nkaanogokia bara banogu na nyirie bara batarî na inya n'ûntû bwa yûûra.”
26 Kagiitaani gaka ndaindûkîra, ndaacûûba, toro îra ndaamaami nîarî îmbega.
27 Mwathani ariuga ata rî, “Ntugû i ciiyîîte rîra nkaûyûria nyomba ya Isiraeri na ya Njunda na nciarwa cia antû na cia nyamû. 28 Na wa ta bûra ndaabaraithagîîria bagîkûûra na kûtharia, na bakîgarûrania na kwînyangia na kûnyamaaria, nwabu nkaabaraithîîria bagîaka na kwanda,” i bu Mwathani akuuga. 29 “Ntugûûni inu antû batiuga kaîrî,
‘I beethe baarîîre ncabiibû irî na njecû,
i ntûma magego ma aana meegagua njiciûki.’
30 “Îndî wora muntû agaakuuyaga i meeyia maake wengwa, ûra akaarîa ncabiibû irî na njecû, i magego maake wengwa makaagîa njiciûki.
31 Kagiita i kaayîîte,” i bu Mwathani akuuga,
“rîra nkaiga kîrîîkanîro kîîyerû
na antû ba Isiraeri na ba Njunda.
32 Kîrîîkanîro gîku gîtîigua gîkari ta kîra
ndaarûthire na biûyûûyû biao.
Rîra ndaabagwatire na njara yakwa
ndabatongoreeria bauma Miisiri,
i baunire kîrîîkanîro gîku
kinya wegua indaabeendeete mûno ta bûra muntû mûrûme eendaga mwekûrû wake,”
i bu Mwathani akuuga.
33 “Kîrîîkanîro kîra nkaarîîkanîra na antû ba Isiraeri ntugû ciiyîîte, Mwathani ariuga, ûkeegua gîkari ûûgû, ngeekîra maathana maakwa mathûgaaniani maao, na mmaandîke nkorooni ciao
Nkeegua ndî Ngai wao,
nabo bakeegua barî antû baakwa.
34 Gûtirî muntû akaarutana muntû wa nthîgûrû yake kaîrî
kana mûruagina akiugaga, ‘Menya Mwathani,’
n'ûntû bonthe bakaamenya,
kwanjîîria ûra mûniini mwanka ûra mûnene,”
i bu Mwathani akuuga.
“Nkabarekera ûthûûku bwao
na ntiiririkana meeyia maao kaîrî.”
35 Ûûgû i bu Mwathani akuuga,
ûra weyaga antû riûa
rîbamûrîkagîra mûthenya,
ûra aathaga mweri na nthata
bimûrîkaga ûtugû,
ûra aurugaga îria kaingo
makûmbî maarîo makaaruruma,
riîtwa rîake eetagwa Mwathani Mwene Inya.
36 “Ûkaaya kwîgua mawîthîre mama makaathira,
kinya mûgongo wa Isiraeri ûkaarima
mbere yakwa tene na tene,”
i bu Mwathani akuuga.
37 Ûûgû i bu Mwathani akuuga:
“Ûkeegua îgûrû rîthimîka
na mîcingi ya nthîgûrû îkamenyeka
rîru nkaarega nciarwa cia Isiraeri
n'ûntû bwa mantû monthe mara barûthîîte,” i bu Mwathani akuuga.
38 “Ntugû i ciiyîîte, i bu Mwathani akuuga, rîra taûni îno îgaakwa kaîrî n'ûntû bwakwa kwanjîîria Mûnaaraani wa Ananeri mwanka Mwîrîgaani ûra ûrî Koonaani. 39 Kîthimi kîra gîkaathima gîgaatambûrûka kîerekereete kîrîma kîa Ngarebu rîru kîgarûke kîerekere Ngoa. 40 Kîguuru kîonthe kîra kîgeragwa biimba na muu na mînda yonthe kuuma kîbondeeni gîa Kindironi mwanka koonaani ya Mwîrîga wa Mbaraathi mbarî ya umîîro bwa riûa gûgaatuîka bantû atheru a Mwathani. Taûni înu îtikooro yomorwa kaîrî kana îînyangua.”