Wîrane bwa gûcookanîîrua gwa Isiraeri na Njunda
30
1 Gîkî i kîo kiugo kîra kîayîîre Njeremia kuuma kîrî Mwathani, 2 “Ûûgû i bu Mwathani Ngai wa Isiraeri akuuga: Andîka îbukuuni mantû monthe mara ndakwîra. 3 Ntugû i ciiyîîte rîra nkaaruta antû baakwa ba Isiraeri na Njunda kuuma ûkombooni, mbacookie nthîgûrû îra ndaanenkeere biûyûûyû biao îtuîka yao, i bu Mwathani akuuga.”4 Ûûgû i bu Mwathani aarîîtie îgûrû rîa Isiraeri na Njunda.
5 “Ûûgû i bu Mwathani akuuga:
‘Nwa tûyû twa ûguaya nkwîgua,
kûrî na imakania na gûtirî na ûkiri.
6 Ta îbûûrieni ûûgû:
Muntû mûrûme nwa agîe na mwana?
Aabu i kî n'ûntû nkwona muntû mûrûme wonthe arî na inya
agwete nda ta mwekûrû arî na ûrûrû bwa kûgîa na mwana,
na atugîîte ûthiû?
7 Irû, n'ata ntugû înu îkeegua îrî înthûûku!
Gûtirî yîîngî îkeegua îkari t'yo.
Îkeegua îrî ntugû ya kînyamaara kîrî nciarwa cia Njakubu,
îndî mûthiani bakoonokua kuuma ku.’
8 Mwathani Mwene Inya ariuga, ‘Ntugû înu,
nkaunanga îcoki rîra rîrî nkingo ciao
na ngiitaange bira bibathaîkîîte,
na ageni batibatuîkithia nkombo ciao kaîrî.
9 Bantû aabo, bakaarutîra Mwathani Ngai wao ngûgî
na mûnene wao ûra agaûkîîria kuuma mûciî wa Ndaundi.’
10 ‘Îndî woû mûruti ngûgî wakwa Njakubu ûtikaamake,
naawe Isiraeri ûtikainaine,’
i bu Mwathani akuuga.
‘Ndî akubî kûbwonokia mbûrute nthî înu ya kûraaya
na nciarwa cienu ncirute nthî ya ûkombo.
Njakubu akeegua arî na thîîrî kaîrî,
na gûtirî we akaamûmakia.
11 N'ûntû ndî amwe naawe nkwonokia,’ i bu Mwathani akuuga.
‘Nkeenyangia mîgongo yonthe cwe
kûra ndaabûnyagaariirie
îndî biû ntibûthiria cwe,
nkabûkaanûkia îndî na ûmma,
ntikûrekia ûthi wa ûgu ûtarî mûkaanûkie.’
12 “Ûûgû i bu Mwathani akwîra antû ba Sayuuni:
‘Ironda bienu bitiûmba kwora,
n'ûntû nûgurarîîtue nainya mûno.
13 Gûtirî muntû wa gûkûtheteera,
gûtirî kîoria kîa ironda biaku,
na gûtirî ndawa ya gûkworia.
14 Acoore baaku bonthe ba ndûa i bariganîrîîtue i woû,
batimakaga i bûra ûgaakara.
Ndakûringa wa ta bûra mûnthû agîkûringa
na ndagûkaanûkia wa ta bûra bara bathûûku bakîrûtha,
n'ûntû mabîtia maaku i maanene mûno
na meeyia maaku i maingî.
15 I kî n'ûntû ûkûrîra n'ûntû bwa ironda biaku?
Ûrûrû bûbu bwaku bûtirî ndawa.
I niû nkûrûthîîte mantû mama monthe
n'ûntû îbîtia rîaku i rîînene na meeyia maaku i maingî.
16 Kwoogu bara bonthe bakûrîîyaga bakaarîîgwa,
anthû baaku bonthe bakaathi ûkombooni.
Bara baataire into biaku wanabo bagaataîrwa,
na bara baagûcuumaga wanabo ngaatûma bacuumwa.
17 Ngagûcookeria thîîria ya mwîrî waku,
na mborie ironda biaku,’
i bu Mwathani akuuga,
‘n'ûntû bagwîtaga muntû ûmûte,
Sayuuni gûtirî we ûkûmakagîra.’
18 “Ûûgû i bu Mwathani akuuga,
‘Ngaacookia antû baakwa nthîgûrû yao,
na mbîgîîrue mîciî yao kîao.
Taûni îra yomboraniirue yakwe kaîrî wa ara yarî,
na nyomba ya mûnene îrûûngîkwe bantû aayo ongwa ara yarî.
19 Kîrî bo gûkauma nyîmbo cia gûcookia nkaatho
na tûyû twa kûgwîrua.
Nkabathagayia na batiîgua barî baakai
Ngaatûma batîîywa na batiimeneerua.
20 Aana baao bagaakara wa ta bûra baakari ntugû cia tene,
na kîûthûrano kîao gîkeegagua kîrî kîagîru mbere yakwa
ngaakaanûkia bonthe bara ba bainyagîîria.
21 Mûtongoria wao akeegua arî ûmwe wao,
mwathi wao akauma gatîgatî kaao.
Nkamûreeta aakubî, n'we aayange kîrî niû,
n'ûntû gûtirî we aûmba kûûya akubî naani nwanga nkamwîta,’
i bu Mwathani akuuga.
22 ‘Kwoogu bûkeegua bûrî antû baakwa,
naani nkeegua ndî Ngai wenu.’ ”
23 Raithaani bwone, kîbuubani kîa Mwathani,
mûthûûro wake ûmûnene,
kîbuubani kîa mûthûûro wake,
kîîndamîîrîîte biongo bia bara bathûûku.
24 Mûthûûro wa Mwathani ûtiicooka nyuma,
mwanka rîra akaûyûria mûbango wa nkoro yake.
Ntugû ikaaya,
bûgaaciûra ûntû bûbû tarîîria.