Njeremia aandîkîra atae bara baarî Mbabironi baarûa
29
1 Mama i mantû mara maarî baarûani îra kîroria Njeremia aatûmire arî Njerusaremu kîrî matigari ma akûrû kuumania na atae, athînjîri ba Ngai, iroria na antû bara bangî bonthe bara Nebukandinesa ataire kuuma Njerusaremu abaira Mbabironi. 2 (Îno i nyuma ya mûnene Njekonia, na gina na antû bara baakaraga nyomba ya mûnene, na atongoria ba Njunda na ba Njerusaremu na atea ba into bia mîtî, na aturi bagûtaîgwa kuuma Njerusaremu.) 3 Aapeere Eriasa mwana wa Safani na Ngemaria mwana wa Irikia baarûa înu, bara Sendekia mûnene wa Njunda aatûmîîte Mbabironi kîrî Nebukandinesa,4 “Ûûgû i bu Mwathani Mwene Inya, Ngai wa Isiraeri akwîra bara bonthe baatairwe kuuma Njerusaremu bairwa Mbabironi, 5 ‘Akaani nyomba bûtûûre ku, bwande mînda bûrîîyage bira bikauma ku. 6 Bûgûrane bûgîe na nthaka na aarî, bûgûranîre nthaka cienu na bûgûrîrwe aarî kinya bo, kaingo wana bo bagîa na aana baao. Bwongeereke bwingîe naagu, na bûtikaanyiie. 7 Kaîrî, bûcerie thîîrî na ûthii na mbere bwa taûni îra ndaatûmire bûtaîgwa bwirwa noogo. Bûmîrombagîre Mwathani îthi mbere bwega n'ûntû yaakara bwega wana kinya biû bûgaakara bwega.’ 8 N'ûntû ûûgû i bu Mwathani Mwene Inya Ngai wa Isiraeri akuuga, ‘Bûtikaareke iroria na ariingia bara barî gatîgatî keenu babweneeria. Bûtikaathikîîrie irooto biao bira barootaga. 9 Barîbûroreria ûrongo riîtwani rîakwa. Niû ntibatûmîîte,’ i bu Mwathani akuuga.
10 Ûûgû i bu Mwathani akuuga, ‘Nyuma ya mîanka mîrongo mûgwanja ya Mbabironi yathira i rîo nkaabûriûngîra, na mbûyûrie wîrane bûra ndeeranire naabi, mbûcookie bantû aaga kaîrî. 11 N'ûntû imbiyî mîbango îra mbûbaangîrîîte i mîbango ya gûtûma bûkara bwega na t'ya kûbûthûûkia, n'ya gûtûma bwîgua bûrî na wîrîgîîro bwa ntugû ikaaya. 12 Kwoogu bwambîtaga, na kinya bwaya kûûndomba nkabwîgagua. 13 Rîra bûgaanceria na nkoro cienu cionthe bûkambona. 14 Ngeetîgîîria bûmbona, naani mbûcookie nthîgûrû yenu na mbwîthîranie amwe kaîrî buume mîgongooni îra ndaabûnyagaariirie bûrî atae,’ i bu Mwathani akuuga.
15 Wana wegua i buugaga, ‘Mwathani n'aûkîîrîîtie iroria bia gûtûroragîria tûrî gûkû Mbabironi,’ 16 ûûgû i bu Mwathani augîîte mantûûni ma mûnene ûra akarîrîîte gîtî kîa ûnene kîa Ndaundi, na antû bonthe bara batûûraga taûni îno, antû beenu bara bataathiiyania naabi naara bwathiire bûrî atae. 17 Ûûgû i bu Mwathani Mwene Inya akuuga, ‘Mbareetereete ndûa, yûûra na mîrimo, na mbatuîkithie ta nkûyû inthûûku, inthûûku ûntû itarîîka. 18 Nkeengana nabo na ndûa, yûûra na mîrimo na ncooke mbatuîkithie gîntû gîa kûrumagwa na kîîmene gîa kûthekagîîrwa na kîrî na îgi mîgongooni yonthe îra ndaabairire. 19 N'ûntû i baaregire kûmbîgua rîra ndaabatûmîîre kîthingatano aruti ngûgî baakwa iroria. Naka wana biû bûrî atae woogu bûtaabathikîîria,’ i bu Mwathani akuuga.
20 Kwoogu thikîîriani kiugo kîa Mwathani bwinthe biû atae bara bwaumire Njerusaremu bwairwa Mbabironi. 21 Ûûgû i bu Mwathani Mwene Inya Ngai wa Isiraeri akuuga, îgûrû rîa Aabu mwana wa Koraya na Sendekia mwana wa Maaseya, bara bakûbûroreria ûrongo riîtwani rîakwa, ‘Nkabaneenkanîra njaraani cia Nebukandinesa mûnene wa Mbabironi na akabaûragîra mbere ya meetho meenu.’ 22 N'ûntû bwao, ûntû bûbû bûgaatûmagîrwa ta njuno rîra mûtae wa kuuma Njunda akwenda kûruma muntû. Akaamwîraga, ‘Mwathani arookûrûtha bûra aarûthîîre Sendekia na Aabu, bara mûnene wa Mbabironi abîîthiirie na mwanki barî mwoyo.’ 23 N'ûntû i baarûthîîte mantû maathûûku mûno Isiraeri na baamaramara na aka ba atûûri baao, baacooka baarongoa riîtwani rîakwa ntabatûmîîte. Kwoogu imbiyî ûgu na i niû ngaatuîka mûnkûûyî ûntûûni bûbû. Ûûgû i bu Mwathani akuuga.”
Ntûmwa kîrî Semaya
24 Îra Semaya wa kuuma Neeramu, 25 “Ûûgû i bu Mwathani Mwene Inya Ngai wa Isiraeri akuuga: Na watho bwaku wengwa n'wandîkire baarûa kîrî antû bonthe ba Njerusaremu, na kîrî mûthînjîri wa Ngai Sefania mwana wa Maaseya, na kîrî athînjîri ba Ngai bonthe ûkiugaga, 26 ‘Mwathani wengwa n'akûthuurîîte ûtuîka mûthînjîri bantû a Njeoyanda kaingo kwîgua kûrî na arûngamîîri Nyomba ya Ngai kûrigîîria antû ba nkoma bara beetuîkithagia iroria ûkabeekîra mbaaûni na kûbathaîka na nyororo cia cuuma nkingo. 27 Îîndî i kî n'ûntû ûtiragondokera Njeremia wa kuuma Anathothi ûra akari ta kîroria gatîgatîîni keenu? 28 Atûmanîîte wetû Mbabironi akiugaga, “Bûgaakara kagiita kaaraaya, kwoogu akaani nyomba na bûtûûre ku, bwande mînda na bûkethe bîra bikauma ku bûrîe.” ’ ”
29 Mûthînjîri wa Ngai Sefania aathooma baarûa îno kîroria Njeremia akîîgagua. 30 Rîru kiugo kîa Mwathani kîayîîra Njeremia, 31 “Tûmana ntûmwa îno kîrî atae bonthe, ‘Ûûgû i bu Mwathani akuuga îgûrû rîa Semaya wa kuuma Neeramu, “N'ûntû Semaya akûbûroreria ntamûtûmîîte na aatûma bwîtîgia ûrongo,” 32 ûûgû i bu Mwathani akuuga, “Na mma ngaakaanûkia Semaya wa kuuma Neeramu amwe na nciarwa ciake. Gûtirî nwa ûmwe wa rûrîîyo rwao agaatigara, kana oona mantû meega mara nkaarûthîra antû baakwa n'ûntû n'erîîte antû baûmîrie Mwathani kîongo,” i bu Mwathani akuuga.’ ”