Njeremia 28

Njeremia na kîroria Anania

1 Mweriini wa îtaano mwankaani wa ûyu, mwankaani wa îna îgiita rîîkai nyuma ya Sendekia mûnene wa Njunda akwanjîîria kwathana, kîroria Anania mwana wa Asuri wa kuuma Ngibeoni, ambîîra arî nyomba ya Mwathani, mbere ya athînjîri ba Ngai na antû bonthe ata rî, 2 “Ûûgû i bu Mwathani Mwene Inya Ngai wa Isiraeri akuuga, ‘Nkaunanga îcoki rîa mûnene wa Mbabironi. 3 Kagiitaani ka mîanka îîrî Ngaacookia into bionthe wa aaga bia nyomba ya Mwathani bira Nebukandinesa mûnene wa Mbabironi aathûkiirie kuuma aaga abiira Mbabironi. 4 Ngaacookia Njeoakini mwana wa Njeoyakimu mûnene wa Njunda kaîrî, amwe na atae bonthe bara baumire Njunda bairwa Mbabironi, n'ûntû nkaunanga îcoki rîa mûnene wa Mbabironi,’ i bu Mwathani akuuga.”

5 Rîru kîroria Njeremia aacookeria kîroria Anania mbere ya athînjîri ba Ngai na antû bonthe bara baarûngi agu nyomba ya Mwathani. 6 Auga, “Aameni! Mwathani aroûyûria mamu monthe bwaroria agacookia into bia nyomba ya Mwathani na bara bonthe baatairwe abacookie kuuma Mbabironi. 7 Amwe na ûgu tathikîîriani bûra nkûbwîra antû bakîîgagua, 8 Kuuma ntugûûni cia mbere, iroria bira biarî oogo mbere yakwa na kinya mbere yenu i biaroriirie ndûa, inyamaara na mîrimo bûra îkaagwata nthîgûrû imbingî na moonene marî na inya. 9 Îndî kîroria kîra gîkaaroria mantû ma ûkiri na ûntû bûbu bûûyûre gîkaamenyekana i kîroria kîa mma na gîtûmîîtwe i Mwathani.”

10 Rîru kîroria Anania aaruta îcoki rîra rîarî nkingo ya kîroria Njeremia aunanga. 11 Na Anania aaria arî mbere ya antû auga ûûgû, “Ûûgû i bu Mwathani akuuga, ‘Bantûûni a mîanka îîrî, ûûgû i bu nkaunanga îcoki rîa Nebukandinesa mûnene wa Mbabironi riume nkingo cia mîgongo yonthe.’ ” Njeremia eethiîra.

12 Kagiita gaakai nyuma ya kîroria Anania akuunanga îcoki rîra rîarî nkingo ya kîroria Njeremia, kiugo kîa Mwathani kîayîîra Njeremia kîamwîra, 13 “Îthi wîre Anania, ‘Mwathani ariuga ata rî, “Waunanga îcoki rîa mûtî bantû arîo ûkaarûtha rîa îthaga.” ’ 14 Ûûgû i bu Mwathani Mwene Inya Ngai wa Isiraeri akuuga: Ngeekîra îcoki rîa îthaga nkingo cia mîgongo înu yonthe ntûme îtûmîkîra Nebukandinesa mûnene wa Mbabironi nabo bakamûtûmîkîra. Ngaatûma kinya aathaga nyamû cia kîthaka.”

15 Rîru kîroria Njeremia eera kîroria Anania ata rî, “Ta thikîîria nkwîre Anania! Mwathani atigûtûmîîte, na ûgûtûma antû ba mûgongo beetîgia ûrongo. 16 Kwoogu Mwathani ariuga ûûgû, ‘I ngaakûruta îgûrû rîa nthîgûrû. Mwanka ûyû uungwa n'ûgaakua, n'ûntû n'wîrîîte antû baûmîrie Mwathani kîongo.’ ”

17 Mwankaani ûyu uungwa mweriini wa mûgwanja kîroria Anania aakua.