Njunda îgaatûmîkîra Nebukandinesa
27
1 Mwanjîîrioni wa wathani bwa Sendekia mwana wa Njosia mûnene wa Njunda, kiugo gîkî kuuma kîrî Mwathani kîayîîra Njeremia. 2 Ûûgû i bu Mwathani aambîîrire, “Rûtha îcoki na ûrîîkîre nkingo yaku. 3 Rîru ûtûme ntûmwa kîrî anene ba Endomu, Moabu, Amoni, Turo na Sindoni gûkûrûkîîra kîrî atûmwa baao, baire Njerusaremu kîrî Sendekia mûnene wa Njunda. 4 Baneenkere ntûmwa îno bairîre anene baao babeere, ‘Ûûgû i bu Mwathani Mwene Inya Ngai wa Isiraeri akuuga: Îraani aathi beenu ûûgû, 5 I niû mbûûmbîîte nthîgûrû na inya yakwa îînene, antû na nyamû cionthe ira irî ku, na neenkagîra muntû wonthe ûra nkwenda. 6 Îîndî nkaanenkanîra nthîgûrû cienu kîrî mûruti ngûgî wakwa Nebukandinesa mûnene wa Mbabironi, kinya nyamû cia kîthaka agaciatha. 7 Mîgongo yonthe îkamûrutîra ngûgî we, mwana wake na ûyûûe mwanka rîra kagiita ka nthîgûrû yake gagaakinya, rîru atûmîkîre mîgongo îmiingî na anene barî inya.8 “ ‘Îndî nthîgûrû îra îtagîtûmîkîra mûnene Nebukandinesa wa Mbabironi, kana beekîra îcoki rîake nkingo ciao, nkaa mûgongo ûyu îkaanûkia rîa ndûa, yûûra na mîrimo mwanka mbathirie na njara yake, i bu Mwathani akuuga. 9 Kwoogu bûtikaathikîîrie iroria bienu, ariingia beenu, ataûri ba irooto, bara baaragia na nkoma cia booyûûe na agao beenu bara babwaragîria bakîbwîraga, “Bûtiitûmîkîra mûnene wa Mbabironi.” 10 Babûroragîria ûrongo bwa gûtûma buuma bûthi kûûraaya na nthîgûrû yenu. Nkabûruta ku na bûkaathira. 11 Mûgongo unthe ûra ûgeetîgîîria îcoki rîa mûnene wa Mbabironi ûmûtûmîkîra, ngaatûma mûgongo ûyu ûrîme na ûtûûre nthîgûrû yao yongwa, i bu Mwathani akuuga.’ ”
12 I ndeerire mûnene Sendekia wa Njunda ntûmwa wa îno. Ndamwîra, “Thûngîria nkingo yaku îcokiini rîa mûnene wa Mbabironi, ûmûtûmîkîre amwe na antû baake, naawe ûtûûre. 13 I mbi îtûma woû na antû baaku bûthirua na ndûa, yûûra na mîrimo bûra Mwathani augîîte kîrî mîgongo îra îtagîtûmîkîra mûnene wa Mbabironi? 14 Bûtikaathikîîrie iroria bira bikûbwîra, ‘Bûtikaarutîre mûnene wa Mbabironi ngûgî,’ birîbûroreria ûrongo. 15 Mwathani ariuga, ‘Ntitûmîîte iroria bibu, birîroria ûrongo riîtwani rîakwa. Bûkoona rîra nkaabwîngatia bûkaathira bwinthe amwe na iroria bibu bikûbûroreria.’ ”
16 Ndaacooka ndaarîria athînjîri ba Ngai na antû baba bonthe ndabeera, “Ûûgû i bu Mwathani akuuga: Bûtikaathikîîrie iroria bienu bira bikûbûroreria bikîbwîraga ‘Kagiita gatarî kûraaya, into bia Nyomba ya Ngai bigaacookua kuuma Mbabironi.’ N'ûntû barîbûroreria mantû ma ûrongo. 17 Bûtikaabaathikîîrie. Tûmîkîraani mûnene wa Mbabironi, naabi bûtûûre mwoyo. I mbi îtûma taûni îno îtuîka îganjo? 18 Ûkaaya kwîgua n'iroria bia mma, na birî na kiugo kîa Mwathani, i beereke Mwathani Mwene Inya kaingo into bira bitigeere bia Nyomba ya Ngai na bia nyomba ya mûnene wa Njunda na bira birî Njerusaremu bitikaathûkue bithiîgwa nabio bwa Mbabironi. 19 N'ûntû Mwathani Mwene Inya ariuga ata rî, mantûûni ma itugî, kîraî gîîtagwa îria, itugî bia gûkamata na ikona biabio na into bionthe bira bitigîîtwe taûni îno, 20 bira mûnene Nebukandinesa wa Mbabironi aatigire rîra ataire Njekoniaa mwana wa Njeoyakimu mûnene wa Njunda na atongoria bonthe kuuma Njerusaremu abaira Mbabironi. 21 Mwathani Mwene Inya, Ngai wa Isiraeri ariuga ûûgû mantû ma into bira bitigeere Nyomba ya Mwathani, nyomba ya mûnene wa Njunda na Njerusaremu. 22 ‘Bigaakamatwa bithi bwa Mbabironi na i noogo bigaakara mwanka ntugû îra nkaabiiyîra,’ i bu Mwathani akuuga. ‘I rîo nkaabicookia bantû aaga.’ ”