Njeremia oonoka gîkuû
26
1 Mwanjîîrioni wa wathani bwa mûnene Njeoyakimu mwana wa Njosia mûnene wa Njunda, Mwathani aaria na Njeremia. 2 Ûûgû i bu Mwathani akuuga, “Îthi ûrûngame Kîaragooni kîa Nyomba ya Mwathani warîrie antû ba taûni cionthe cia Njunda bara baayaga kûgonga Mwathani aaga, ûbeere mantû monthe mara ngûkwatha, na ûtagûtiga kiugo nwa kîmwe. 3 Nwa wîgue baûmba kûthikîîria bakagarûka bagatigana na njîra ciao inthûûku, rîru nkaagarûra mathûgaania maakwa ntîîre kûbaretera kînyamaara kîra mbangîîte kûbaretera n'ûntû bwa moothûûku maao. 4 Ûbeere, ‘Ûûgû i bu Mwathani akuuga: Bwarega kûthikîîria na bwathîkîra mawatho maakwa mara mbûnenkereete, 5 na bwathîkîra biugo bia aruti ngûgî baakwa, iroria bira mbûtûmîrîîte rîtarî rîmwe, (kinya wegua bûtaabithikîîria,) 6 nkaarûtha nyomba îno ta Siro na taûni îno îtue kûrumagwa i mîgongo yonthe ya nthîgûrû.’ ”7 Athînjîri ba Ngai, iroria na antû bonthe baathikîîria Njeremia akîbeera mantû mamu arî Nyomba ya Mwathani. 8 Îndî warîo akûrîîkia kûbeera mantû monthe mara Mwathani aamwathîîte eere antû babu, athînjîri ba Ngai, iroria na antû bonthe bamûgwata bamwîra ata rî, “Woû n'ûgaakua. 9 I kî n'ûntû ûkûroria riîtwani rîa Mwathani ûkiugaga, ‘Nyomba îno îgaakara ta Siro, na taûni îno îgaakara ta îganjo, gûtarî muntû nwa ûmwe ûrî ku?’ ” Antû bonthe beethîrana baathîûrûkîîra Njeremia agu mbere ya nyomba ya Mwathani.
10 Rîra atongoria ba Njunda beegiirue mantû mamu, bauma gikarooni kîa mûnene baaya nyomba ya Mwathani, baakara ome Mwîrîgaani Waimbia wa nyomba ya Mwathani. 11 Rîru athînjîri ba Ngai na iroria beera atongoria na antû bonthe ata rî, “Muntû ûyû abatîîrue akua n'ûntû akûroreria taûni îno mantû maathûûku, wana biû bûkwîgua na matû meenu bwingwa.”
12 Njeremia aarîria atongoria babu na antû bonthe abeera, “I Mwathani ûntûmire ndoria îgûrû rîa taûni îno mantû mamu monthe bwegua. 13 Kwoogu îîndî, garûraani mîkarîre na mîtugo yenu, na bwathîkîre Mwathani Ngai wenu, rîru Mwathani akaagarûra mathûgaania maake atîîre kûbûretera kînyamaara kîra aaria îgûrû rîenu. 14 Îndî ûntûûni bwakwa ningwa, ndî Njaraani cienu, rûthaani naani bûra bûkwona bûrî bwega na bûbatîîrue. 15 Îndî bûmenye na mma atî, wona bwambûraga bûgwîtûûra nthakame îtarî na mabîtia na îkabûcookera biû bwingwa na taûni îno na akari baayo, n'ûntû bwa ûmma bûra Mwathani antûmîîte mbwîra, n'ûntû na mma Mwathani antûmîîte mbwîra mantû mama monthe bûkîîgagua.”
16 Rîru atongoria na antû bonthe beera Athînjîri ba Ngai na iroria, “Muntû ûyû atibatîîrue akua, n'ûntû atwarîria riîtwani rîa Mwathani Ngai wetû.” 17 Akûrû bamwe kuuma kîrî antû bara beethîreene agu baarûngama baarîria antû bara beethîreene babeera, 18 “Mika wa kuuma Moresethi aaroriirie ntugûûni cia mûnene Esekia wa Njunda, eerire antû bonthe ba Njunda ûûgû, ‘Ûûgû i bu Mwathani Mwene Inya akuuga,
“Sayuuni îkaarîmwa ta mûnda,
Njerusaremu îgaatuîka bantû a ithûmba bia nyomba imbombokanu,
Nyomba ya Ngai kagûrî kaumu matî.” ’
19 “Mûnene Esekia na antû ba Njunda bonthe i ka baûragire Mika? Tika Esekia aatîîyire Mwathani na aaceria kwenda gwake? Mwathani ataagarûkire aatîîra kûbaretera kînyamaara kîra aabagwetereete? Tûrî akubî kwîreteera kînyamaara twingwa!”
20 I kwarî na muntû ûngî aaroragia riîtwani rîa Mwathani, eetagwa Uria mwana wa Semaya wa kuuma Kiriathi-Njearimu. Aaroreerie taûni na nthîgûrû îno na biugo wata bira Njeremia aaragia. 21 Na rîra mûnene Njeoyakimu amwe na akaria baake na atongoria baake beegiirue biugo bibu, mûnene neendire kûmûûraga; îndî rîra Uria aamenyire n'atoorokeere Miisiri. 22 Mûnene Njeoyakimu aatûma Erinathani mwana wa Akibori na antû bangî Miisiri. 23 I baarutire Uria Miisiri na bamwira kîrî mûnene Njeoyakimu, amûûraga na rûûyiû na auga mwîrî wake ûgerwe nthikooni cia mwingî.
24 Îndî amwe na ûgu, Aikamu mwana wa Safani naarigîîrie Njeremia kwoogu ataanenkanîrwa kîrî antû bamûûraga.