Mîanka mîrongo mûgwanja ya ûkombo
25
1 Kiugo kîa Mwathani kîayîîra Njeremia îgûrû rîa antû bonthe ba Njunda mwankaani wa îna wa wathani bwa Njeoyakimu mwana wa Njosia mûnene wa Njunda, na nuu warî mwanka wa mbere wa wathani bwa Nebukandinesa mûnene wa Mbabironi. 2 Kwoogu kîroria Njeremia eera antû bonthe ba Njunda na bara bonthe baatwîre Njerusaremu, 3 “Bantû a mîanka mîrongo îîrî na îthatû, kuuma mwanka wa îkûmi na îthatû wa wathani bwa Njosia mwana wa Amoni mûnene wa Njunda, mwanka îmunthî, kiugo kîa Ngai i kîîmbûyagîîra na i mbwarîrîîtie kaîrî na kaîrî, îndî bûtaathikîîria. 4 Na kinya ûkeegua Ngai n'abûtûmîrîîte aruti ngûgî baake iroria kaîrî na kaîrî, bûtaathikîîria kana bwenda kûmenya. 5 Baabwîrire, ‘Garûkaani îîndî, woora ûmwe wa cienu kuuma njîraani inthûûku, na mîkarîre îmîthûûku, naabi nwa bûkare nthîgûrû îra Mwathani aabûnenkeere amwe na biûyûûyû bienu tene na tene. 6 Bûtikaathingate ngai cingî bûcirutîra ngûgî na gûcigonga, bûtigaûkie mûthûûro wakwa na mantû mara njara cienu irûthîîte. Rîru naani ntibûrûthîra ûthûûku.’7 “Îndî bûtaanthikîîria,” i bu Mwathani akuuga, “na bwaûkia mûthûûro wakwa na mantû mara njara cienu irûthîîte, na i bwîretereete ûthûûku bwingwa.” 8 Kwoogu Mwathani Mwene Inya ariuga ûûgû, “N'ûntû bûtirathikîîria mîgambo yakwa, 9 nkeethîrania mîgongo yonthe ya kuuma bwa neegûrû, na kinya mûruti ngûgî wakwa, Nebukandinesa mûnene wa Mbabironi,” i bu Mwathani akuuga, “na nkabareeta barûe na nthîgûrû îno na antû baayo na barûe na mîgongo îra îthiûrûkîrîîte. Nkabeenyangia cwe na mbatuîkithie gîntû gîa kûmakia na kûthekeerwa na îganjo rîa tene na tene. 10 Ngaakiria tûyû twao twa nkena na kûgwîrua, tûyû twa mûgûrwa na mûgûrani, kayû ka ithii na mborie werû bwa taa. 11 Nthîgûrû îno yonthe îgaatuîka nthîgûrû întiganîrie îtaatûmîrwa, na mîgongo îno îgaatûmîkîra mûnene wa Mbabironi mîanka mîrongo mûgwanja. 12 Îndî nyuma ya mîanka mîrongo mûgwanja yathira, ngaakaanûkia mûnene wa Mbabironi amwe na mûgongo unthe wa Ambabironi n'ûntû bwa mabîtia maao,” i bu Mwathani akuuga, “na nkamîtuîkithia îganjo tene na tene. 13 Naani nkaaretera nthîgûrû înu mantû monthe mara ndaaria kîînyume kîayo, mantû monthe mara maandîkîîtwe îbukuuni rîrî na maarorua i Njeremia kîînyume kîa mîgongo yonthe. 14 Bo bongwa bagaatuîkithua nkombo i mîgongo îmiingî na kinya anene bara banene, naani nkabarea kûringana na mîrûthîre yao.”
Gîkombe kîa mûthûûro wa Ngai
15 Ûûgû i bu Mwathani, Ngai wa Isiraeri, aambîîrire, “Thûkia gîkombe gîkî kîrî njaraani ciakwa kîûyûrîîtue na ndibei ya mûthûûro wakwa na ûkanyuithie antû ba mîgongo yonthe îra ngaagûtûma kîrî yo. 16 Wona bagîkunda, bagaatarataraga na baume nkoma n'ûntû bwa rûûyiû rûra ngaatûma gatîgatî kaao.”
17 Kwoogu ndaathûkia gîkombe kuuma njaraani cia Mwathani na ndaanyuithia mîgongo yonthe îra aantûmire kîrî yo: 18 Njerusaremu na taûni cia Njunda, anene na atongoria baacio, kaingo batuîka maganjo na gîntû gîa kûmakia, gîntû gîa kûthekeerwa na gîntû gia kûrumanaga nakîo wa ta bûra bakari îmunthî tûrî. 19 Kinya kîrî Faraû mûnene wa Miisiri, ateetheeria baake, atongoria baake na antû baake bonthe, 20 na ageni bonthe bara baarî ku. Anene bonthe ba Usi, na anene bonthe ba Afirisiti (bara ba Asikeroni, Gasa, Ekironi, na antû bara batigîîtwe Asindondi), 21 Endomu, Moabu na Amoni. 22 Bara bangî n'anene bonthe ba Turo na Sindoni, na anene ba nteere cia rûgongo rûra rûngî rwa îria, 23 Ndendani, Tema, Mbusi na bonthe bara beenjaga nteere cia biongo, 24 anene bonthe ba Arîbia, na anene bonthe ba antû ba kûngî bara batûûraga rwanda, 25 anene bonthe ba Simuri, Eramu na Mendia, 26 na anene bonthe ba rûteere rwa bwa îgûrû bara barî akubî na kinya bara barî kûraaya, wa ûmwe nyuma ya ûra ûngî, moonene monthe mara marî nthîgûrû îno. Na nyuma yao bonthe, mûnene wa Sesakia na kinya we agakînyua.
27 “Rîru ûbeere, ‘Ûûgû i bu Mwathani Mwene Inya, Ngai wa Isiraeri akuuga, nyuani, bûtogoone na bûtaîke, na bûgwe bûtagîûkîîra kaîrî n'ûntû bwa ndûa îra ngaatûma gatîgatî keenu.’ 28 Îndî bakarega kûthûkia gîkombe gîku kîrî njaraani ciaku banyua, ûbeere, ‘Ûûgû i bu Mwathani Mwene Inya akuuga, nwa mwanka bûkînyue! 29 Raitha, indanjîîria kûreeta kînyamaara kîrî taûni îra yîîtanagîrua na riîtwa rîakwa, nwa biû bûkaarega gûkaanûkua? Gûtiûmbîka bûrega gûkaanûkua, n'ûntû i ndeeteete ndûa kîrî bonthe bara batûûraga nthîgûrû, i bu Mwathani Mwene Inya akuuga.’
30 “Îîndî barorerie mîgambo îno ya kîînyume nabo ûbeere,
‘Mwathani akaagondoka arî bantû ara aûkîîru,
akaagondoka ta nkwa arî gîkarooni gîake kîra kîtheru.
Agondokere nthîgûrû nainya mûno.
Agaakurura ta antû bara bakinyangaga ncabiibû,
akururîre bonthe bara batûûraga nthîgûrû.
31 Gîtuma gîku gîgaakinya mwanka mîthia ya nthî,
n'ûntû Mwathani arî na îgamba na mîgongo,
akaagambithia antû bonthe
na aûrage eeyia,’ ”
i bu Mwathani akuuga.
32 Ûûgû i bu Mwathani Mwene Inya akuuga,
“Cûûbaani! Kînyamaara i gîtaambîîte
kuuma mûgongo ûmwe kûthi ûra ûngî,
kîbuubani kîrî na inya igîûkîîrîîte,
kiumîîte bwa mîthia ya nthî.”
33 Kagiitaani gaku antû bara baûragirwe i Mwathani bakeegua barî kîra bantû, kuuma mûthia ûmwe wa nthî mwanka ûra ûngî. Batiirîrîrwa kana beethîranua kana bathikwa, bakaanyagaara naagu ta mai.
34 “Arîîthi, rîraani na bûminûke,
garagaraani mûthetuuni biû atongoria ba nyamû cia ndîîthia.
N'ûntû kagiita keenu gakûûragwa i gakinyîîte,
bûkaagwa na bûnyagaare ta yûûmba rîa goro.
35 Arîîthi bationa bantû a kûûrîra
atongoria ba nyamû cia ndîîthia bationa bantû a kûmonyokera.
36 Îgua kîrîro kîa arîîthi,
na wîgue gûkaya wa atongoria ba nyamû cia ndîîthia,
n'ûntû Mwathani n'akwînyangia ndîîthia yao.
37 Na ndîîthia ira itwîre kîîndaayî ikeenyangua
n'ûntû bwa mûthûûro ûmûnene wa Mwathani.
38 Wa ta cimba, n'arûûkîrîîte gîkaro gîake,
na nthîgûrû yao yatuîka îganjo
n'ûntû bwa rûûyiû rwa mûnthû,
na n'ûntû bwa mûthûûro ûmûnene wa Mwathani.”