Nkûyû imbega na inthûûku
24
1 Nyuma ya Njeoyakini mwana wa Njeoyakimu wa Njunda amwe na atongoria ba Njunda, atea ba gûcaa into bia mîtî na aturi bagûtaîgwa kuuma Njerusaremu bairwa ûkombooni i Nebukandinesa mûnene wa Mbabironi, Mwathani aambonia ikaabû biîrî birî na nkûyû biaigîîtwe mbere ya Nyomba ya Mwathani. 2 Gîkaabû kîmwe kîarî na nkûyû imbega mûno, ta cia rwîrua rwa mbere, gîkaabû kîra kîngî kîarî na nkûyû inthûûku mûno, inthûûku ûntû itarîîka.3 Rîru Mwathani aambûûria, “I mbi ûkwona, Njeremia?” Ndacookia, “I nkûyû. Ira mbega n'inthongi mûno, îndî ira itarî mbega ninthûûku na itirîîka.”
4 Kiugo kîa Mwathani kîambûyîîra, 5 “Ûûgû i bu Mwathani, Ngai wa Isiraeri, akuuga, ‘Wa ta nkûyû ino mbega, i bu mbathûkagia barî beega, atae ba kuuma Njunda, bara ndeengîîrie bauma bantû aaga baathi nthîgûrû ya Ambabironi. 6 Meetho maakwa makabacûûbîra n'ûntû bwa wega bwao, na nkabacookia nthîgûrû îno. Nkabaaka na ntibatharia, nkabaanda na ntibakûûra. 7 Nkabanenkera nkoro ya kûmenya atî i niû Mwathani. Bagaatuîka antû baakwa, naani ntuîke Ngai wao, n'ûntû bagaancookera na nkoro yao yonthe.’
8 “Mwathani ariuga, ‘îîndî wa ta nkûyû ira nthûûku, ira itarîîka, i ta bu nkaarûtha Sendekia mûnene wa Njunda, atongoria baake na matigari kuuma Njerusaremu, wana wegua kabagaakara nthîgûrû îno kana batûûre Miisiri. 9 Na n'ûntû bwa ûthûûku bwao, nkabatuîkithia antû ba kûmakia antû na athûûkia kîrî moonene monthe ma nthîgûrû, antû ba îgi na ba kwaragua, gîntû gîa gûcinûragua na ba kûrumagwa, bantû onthe ara nkaabanyagaaria. 10 Nkabatûmîra, ndûa, yûûra na mîrimo bibagwate mwanka bathirue cwe kuuma nthî îra ndaabeere bo na biûyûûyû biao.’ ”