Rwong'i rûûtheru
23
1 “Bûkoona thîîna biû arîîthi bara barekagîîria na bakanyagaaria ng'ondu cia ûrîîthi bwakwa!” I bu Mwathani akuuga. 2 Kwoogu ûûgû i bu Mwathani, Ngai wa Isiraeri, akwîra arîîthi bara barîîthagia antû baake, “N'ûntû i bûnyagaarîîtie ng'ondu ciakwa na bwaciîngatia na bwarega gûcimenyeera, nkabûkaanûkia n'ûntû bwa mabîtia mamu bûrûthîîte. 3 Niû ningwa nkeethîrania matigari ma ûrîîthi bwakwa kuuma gûntû kunthe kûra ndaabanyagariirie mbacookie ndîîthiani ciao, ara bagaaciarana na baingîe. 4 Nkabaigîra arîîthi bara bakaabamenyeera, na itiiguaya kaîrî kana imakua, na gûtirî nwa îmwe îkeegua îtarî oogo,” i bu Mwathani akuuga.5 Mwathani ariuga, “Ntugû i ciiyîîte,
rîra ngaûkîîria mûnene kuuma rûrîîyooni rwa Ndaundi,
mûnene ûra akaathana na ûûme,
na arûthage ûmma na bûra kûbatîîrue nthîgûrû.
6 Ntugûûni ciake Njunda îkeegua îrî na ûkaria,
na Isiraeri îgaatûûra mayîîga.
Na riîtwa rîrî i rîo ageetagwa:
Mwathani n'we Wagîru Bwetû.
7 “Kwoogu îîndî, ntugû i ciiyîîte,” i bu Mwathani akuuga. “Rîra antû batakiuga kaîrî, ‘Wa ta bûra Mwathani atûûraga mwoyo, ûra warutire Aisiraeri Miisiri,’ 8 îndî bakaugaga, ‘Wa ta bûra Mwathani atûûraga mwoyo, we ûra warutire rûrîîyo rwa Isiraeri nthîgûrû ya bwa n'egûrû na abeethîrania kuuma nthîgûrû cionthe kûra aabanyagaarîîtie.’ Rîru bagaatûûra nthîgûrû yao yongwa.”
Iroria bia ûrongo
9 Mantûûni ma iroria:
I ntaangîkîîte mathûgaaniani mûno,
maîndî maakwa monthe i makuinaina.
Nkari ta muntû ûmûtogoonu,
muntû ûnyuîte ncoobi yamûûmba,
n'ûntû bwa Mwathani na biugo biake biitheru.
10 N'ûntû nthîgûrû yûûyûrîîte antû batarî eetîgua kîrî Ngai,
na n'ûntû bwa kîrumi kîra kîrî ku, nthîgûrû n'îmbûmo,
na ûrîîthio rwanda bwanyaara.
Iroria birûthaga bûra gûtaagîrîîte
na bigatûmîra inya yao na njîra inthûûku.
11 “Iroria na athînjîri ba Ngai batirî na ûngai
ûthûûku bwao i mbwonaga kinya Nyomba yakwa,”
i bu Mwathani akuuga.
12 “Kwoogu njîra ciao ikaagîa matenderû,
bakaagerwa ome mwinduuni
naagu i noo bakaagwa.
Nkabaretera kînyamaara,
mwanka ûra nkaabakaanûkia,”
i bu Mwathani akuuga.
13 “Gatîgatî ka iroria bia Samaria,
indoonire waa bûbû:
Baaroragia riîtwani rîa Mbaari
na baabîtithia antû baakwa Isiraeri.
14 Na i mboneete ûntû bûûthûûku
kîrî iroria bia Njerusaremu,
bathûûngagîîra na bakathiiyagîra ûrongooni.
I beekagîra bara barûthaga ûthûûku inya,
mwanka gûgatuîka gûtirî we aûmba kuuma wîyiani bwake.
Bonthe bakari ta antû ba Sondomu kîrî niû,
na antû ba Njerusaremu bakari ta ba Ngomoora.”
15 Kwoogu, ûûgû i bu Mwathani Mwene Inya akuuga mantûûni ma iroria,
“Nkabarîîthia i rîo birî na gana
na mbanyuithie rûûyî rûrî na cûmû,
n'ûntû kuuma kîrî iroria bia Njerusaremu
kwaga ûngai watamba nthîgûrû yonthe.”
16 Ûûgû i bu Mwathani Mwene Inya akwîra antû ba Njerusaremu,
“Menyaani bûthikîîria bûra iroria bikûbûroreria,
barîbûroreria mantû ma wîrîgîîro îndî i ma ûrongo.
Bakabwîraga bioneki bia kuuma mathûgaaniani maao bongwa,
na ti bûra Mwathani augîîte.
17 Bakaraga bakîîraga bara bambûthagîîria,
‘Mwathani ariuga, bûkaagîa na thîîrî.’
Na kîrî bonthe bara bathingataga kûûma kwa biongo biao,
bakabeera, ‘Gûtirî ûthûûku bûkaabûûyîîra.’
18 Îndî n'ûû kîrî bo warûngama kîamaani kîa Mwathani
kwona kana kwîgua kiugo gîake?
N'ûû aathikîîria na eegua kiugo gîake?
19 Raithaani bwone, kîbuubani kîa Mwathani,
mûthûûro wake ûmûnene,
kîbuubani kîa mûthûûro wake,
kîîndamîîrîîte biongo bia bara bathûûku.
20 Mûthûûro wa Mwathani ûtiicooka nyuma,
mwanka rîra akaûyûria mûbango wa nkoro yake.
Ntugû ikaaya,
bûgaaciûra ûntû bûbû tarîîria.
21 Niû ntaatûma iroria bibi,
îndî i baugiirie kweyana ntûmwa ciao,
Niû ntaabiarîria,
amwe na ûgu ibaroreetie.
22 Îndî ûkeegua i baarûngamire nkiamaani yakwa,
bakîaria mîgambo yakwa kîrî antû baakwa,
na îkîbagarûra kuuma njîraani ciao inthûûku,
na kuumania na mantû maathûûku mara barûthaga.
23 Ka niû ndî Ngai ûrî akubî ninka,
i bu Mwathani akuuga,
na ti Ngai ûrî kûraaya?
24 Kûrî we ûûmba kwîbitha gûntû wa ciri
kaingo ntamwona?
Anga ntiûyûri îgûrû na nthîgûrû?”
i bu Mwathani akuuga.
25 “I mbîgîîtue bûra iroria biugaga bira biroragia mantû ma ûrongo riîtwani rîakwa. Biugaga, ‘I ndooteete kîrooto! I ndooteete kîrooto!’ 26 I mwanka rî ûntû bûbû bûkaathi mbere nkorooni cia iroria bibi bia ûrongo, bara baroragia wa bûra mathûgaania maao makûbeera? 27 Barîthûgaania irooto bibu beeranaga bo bongwa bigaatûma antû baakwa bariganîrua i niû, ta bûra beethe baandiganîîrue baatua kûgonga Mbaari? 28 Ga kîroria kîra kîrî na kîrooto kîîrane kîrooto gîakîo, na ûra arî na kiugo gîakwa n'akîîrane na gwîtîgîka. Anga rûûa rûrî gîtûmi ta ngano?” 29 Mwathani ariuga, “Kiugo gîakwa gîkari ta mwanki, kîria kîra kîûragaga maiga.”
30 Mwathani ariuga, “Niû ntikûgwatanîra na iroria bira biiyaga ntheto kuuma kîrî bira biingî bikathi gûciaria ta irî cia kuuma kîrî niû. 31 Na inthûûri n'iroria bira biaragia ntheto ciao biongwa na bikaugaga, ‘I bu Mwathani akuuga.’ 32 Na mma inthûûri kinya n'iroria bira biroragia mantû ma irooto bia ûrongo bakabîtithia antû njîra ya kwaria ûrongo woogu, na ntaabatûma kana mbathuura. Batiteethagia antû baba nwa aniini,” i bu Mwathani akuuga.
Iroria bia ûrongo na ûroria bwa ûrongo
33 Mwathani ambîîra, “Ûmwe wa antû baba kana kîroria kana mûthînjîri, akaaya gûkûûria, ‘Mûrigo wa Mwathani n'ûrîkû?’ Ûbeere, ‘I biigû mûrigo, na nkabûtiganîria, i bu Mwathani akuuga.’ 34 Kîroria kana mûthînjîri wa Ngai kana muntû ûngî akaaya akauga, ‘Ûyû nuu mûrigo wa Mwathani,’ ngaakaanûkia muntû ûyu amwe na mûciî wake. 35 Ûûgû i bu kîra ûmwe wenu akaraga akiugaga kîrî mûcoore kana mûtûûri, ‘Îcookio rîa Mwathani i rîrîkû?’ Kana ‘N'ata Mwathani auga?’ 36 Îndî bûtikauge kaîrî, ‘Ûyû nuu mûrigo wa Mwathani,’ n'ûntû mûgambo wa muntû wengwa nuu ûtwikaga mûrigo wake kwoogu bûgaakîîgamia mîgambo ya Ngai ûra atûûraga mwoyo, Mwathani Mwene Inya, Ngai wetû. 37 Ûûgû i bu bûkaraga bûkîîraga kîroria, ‘N'ata Mwathani aragûcookeerie?’ kana ‘N'ata Mwathani aarîîtie?’ 38 Kinya ûkeegua i buugaga, ‘Ûyû nuu mûrigo wa Mwathani,’ ûûgû i bu Mwathani akuuga, ‘Bwatûmîîre mîgambo, “Ûyû nuu mûrigo wa Mwathani,” kinya ûkeegua i ndaabwîrîîte bûtikauge, “Ûyû nuu mûrigo wa Mwathani.” 39 Kwoogu, namma nkabûûkîîria na mbûrutarute ûthiûni bwakwa woû amwe na taûni înu ndaabûnenkeere amwe na biûyûûyû bienu. 40 Na nkwire îgi rîa tene na tene, nthoni itakaaro iriganîria.’ ”