Kûgambithua kwa anene bara bathûûku
22
1 Ûûgû i bu Mwathani akuuga, “Îndama ûthi gîkarooni kîa mûnene wa Njunda ûmwîre ntûmwa îno, 2 ‘Îgua kiugo kîa Mwathani, îî mûnene wa Njunda, woû ûkarîrîîte gîtî kîa ûnene kîa Ndaundi, woû, atongoria baaku na antû baaku bara bakûrûkaga na mîîrîga îno. 3 Ûûgû i bu Mwathani akuuga, rûtha mantû mara marî ma mma na maagîru. Ûtuunyûkie muntû ûra mwiye kuuma njaraani cia mûmwinyîîria. Bûtikaarûthe ûthûûku kana bûbitina ageni, bara batarî na beethe kana ntigwa, na bûtigeetûûre nthakame îtarî na mabîtia bantû aaga. 4 Ûkaaya kwîgua bûkaamenyeera maathana mama, rîru mûnene ûra akaragîra gîtî kîa ûnene kîa Ndaundi, we, na aniini baake na antû bara aathaga bakaumagarûkaga gûkûrûkîîra mîîrîga ya gîkaro gîkî kîa mûnene barî nkaarîîni cia ndûa na îgûrû rîa mbaraathi. 5 Inkûthiîtia, bwarega kwathîkîra maathana mama gîkaro gîkî kîa mûnene gîgaatuîka îganjo,’ ” i bu Mwathani akuuga.6 Mantûûni ma nyomba ya mûnene wa Njunda Mwathani ariuga,
“Wana wegua ûrî mûthongi ta nthîgûrû ya Ngiriandi kîrî niû,
kana ta tûthûmbîri twa irîma bia Rebanoni,
amwe na ûgu, ngagûtuîkitha rwanda,
kana ta taûni itaatûûrwa n'antû.
7 Ngagûtûmîra eenyangia bakwînyangie,
wa muntû na îthoka rîake,
bagiitange itugî biaku biithongi bia mîthithinda,
babigere mwankiini.
8 “Antû ba mîgongo îmiingî bakûrûkîîrîîte taûni îno, bakaûranagia, ‘I kî n'ûntû Mwathani ararûthire ûntû ta bûbû taûni îno nene ûûgû?’ 9 Îcookio rîkeegua rîrî, ‘N'ûntû i baunîîte kîrîîkanîro kîa Mwathani Ngai wao, baagonga na baatûmîkîra ngai ciingî.’ ”
10 Bûtikaarîrîreeni mûnene ûmûkuû kana bûgwatwa i kîeba n'ûntû bwake,
îndî rîrîraani na ûrûrû bwingî mûno ûra ûtaîtwe,
n'ûntû atiicooka kaîrî
kana oona nthîgûrû îra aaciarîîrwe kaîrî.
11 Ûûgû i bu Mwathani akuuga n'ûntû bwa Sarumua mwana wa Njosia, ûra aatuîkire mûnene wa Njunda bantû a îthe, ûra athiîte auma gûntû gûkû, “Atikaaro acooka kaîrî. 12 Agaakuîra naara baamwirire arî mûgwate, ationa nthî îno kaîrî.”
13 Akoona thîîna muntû ûra aakaga nyomba yake na njîra îtaagîrîîte,
na akamîongeera ngoroba na njîra itarî cia mma,
akîrutithagia antû ba nthîgûrû yake ngûgî ya mana,
atakûbarea wîra yao.
14 Akîîbîîraga, “Nkeebakîra nyomba înene mûno
îrî na tûnyomba twa îgûrû tûûnene mûno.”
Kwoogu amîîkîre ndirica inene mûno,
amîthoongamie na mbaaû cia mûthithinda
na amîgemie na rangi întuune.
15 “Ûrîthûgaania kwîgua ûrî na nyomba înthongi ya mîthithinda,
nwa îtûme ûtuîka mûnene ûmwega?
Anga abaagu ataarî na into biiganu bia kûrîa na biakûnyua?
Aarûthaga mantû mara mabatîîrue na ma mma,
na aatûûraga bwega.
16 Naamenyagîîra mantû ma nkîa na bara barî na ûbatu,
na kwoogu mantû maake monthe i maarî meega.
Anga gûku tiku kûûmenya?”
i bu Mwathani akuuga.
17 “Îndî nkoro yaku na meetho maaku
bikwerekereetie kûgîta ûtonga na njîra îtarî ya gwîtîgîka,
gwîtûûra nthakame îtarî na îbîtia,
na kwinyanîîria na bitina.”
18 Kwoogu ûûgû i bu Mwathani akuuga îgûrû rîa Njeoyakimu mwana wa Njosia mûnene wa Njunda,
“Batimûrîrîra,
bakiugaga, ‘Itû, mûruayia! Itû, mwarayia!’
Batimûrîrîra,
bakiugaga, ‘Itû, mûnene wakwa! Itû, ûra ûrî ûkumio!’
19 Akaathikwa ta îng'ooi,
akururue ateewe naagu
ome ya mîîrîga ya Njerusaremu.”
20 “Antû ba Njerusaremu, îtiani mwanka Rebanoni bûkarîrîre ku,
mwanka kayû gaaku keeguîke nthî ya Mbasani.
Ûringe gîtuma ûrî irîmaani bia Abarimu
n'ûntû acoore baaku bonthe ba ndûa bakûthirua.
21 Ndaabûkaniirie rîra bwaugaga gûtirî na thîîna,
îndî naabi bwauga, ‘Tûtikwenda kwîgua!’
ûgu i bu bûtwîre bûkari kuuma wîthî bwenu,
n'ûntû bûtimbathîkagîra.
22 Arîîthi beenu bonthe bakaûra na ruuo,
na acoore beenu bonthe bagwatwe batuîke atae.
Naabi bûgîe îgi na bûcookerwe i nthoni
n'ûntû bwa moothûûku meenu monthe.
23 Woû ûtûûraga Rebanoni,b
ûra aakaga ntara yake mîthithindaani,
n'ata ûkeegua ûrî wa kwîguîrwa kîao bûgana,
rîra thîîna igaakûûyîîra
ta mwekûrû arî na ûrûrû bwa mwana!”
Ngai agambithia Njeoyakini
24 Mwathani ariuga, “Wa ta bûra ntûûraga mwoyo, wana woû Njeoyakinic mwana wa Njeoyakimu mûnene wa Njunda, kinya ûkeegua ûkari ta mbete ya ûnene njaraani yakwa ya ûrîo nwaka nkûruta, 25 ngakûnenkanîîria kîrî bara bagûceragia bakûûraga, bara ûkuthûkaga, kîrî Nebukandinesa mûnene wa Mbabironi na kîrî Ambabironi bongwa. 26 Ngagûkuruthûra, woû amwe na nyûkwe mwene ûra wagûciarire, mbwire nthî îîngî naara gûtarî nwa ûmwe wenu aaciarîrwa noo, na bûrî baîrî bûkuîre noogo. 27 Bûkeeriragîîria gûcooka nthîgûrû yenu îndî bûtikaaromîcooka kaîrî.”
28 Ka muntû ûyû agwîtwa Njeoyakini arî wa mana ta nyûngû înkuû,
gîntû gûtarî we arî bata nakîo?
I kî n'ûntû agaakuruthûrwa amwe na aana baake,
na bateegwe nthîgûrû bataiyî?
29 Woû nthîgûrû, nthîgûrû, nthîgûrû!
Îgua kiugo kîa Mwathani!
30 Ûûgû i bu Mwathani akuuga, “Andîkaani muntû ûyû ta muntû atarî na aana,
muntû atakîgîta gîntû ûtûûrooni bwake bunthe,
n'ûntû gûtirî muntû wa rûciaro rwake akooro agîta gantû
gûtirî we agaakarîra gîtî kîa ûnene kîa Ndaundi
kana aathana kaîrî Njunda.”