Mwathani aarega îromba rîa Sendekia
21
1 Kiugo gîkî i kîo kîayîîre Njeremia kuuma kîrî Mwathani rîra mûnene Sendekia aamûtûmîîre Pasiuri mwana wa Marikiya barî na mûthînjîri wa Ngai Sefania mwana wa Maaseya. Bamwîra, 2 “Wenda tûurîrie Mwathani aaye atûteethie n'ûntû Nebukandinesa mûnene wa Mbabironi agûtuithûkîra. Kwaûmbîka Mwathani agatûringîra biama wa ta magiita makûrûku agatûma agatigana naati.” 3 Rîru Njeremia abacookeria, “Îraani Sendekia, 4 ‘Ûûgû i bu Mwathani Ngai wa Isiraeri akuuga, ndî akubî kûgarûra mathaga meenu ma ndûa mara bûgwete na njara cienu mara bûgûtûmîra kûrwa na mûnene wa Mbabironi na Akarindea bara babûcîgîîrîîtie nteere cionthe na mbeethîranie ndeeni ya taûni îno. 5 Niû ningwa ngaataambûrûkia njara yakwa îra îrî inya ndûe naabi ndî na marûrû na mûthûûro ûmûnene. 6 Nkaaringa bonthe bara batwîre taûni îno, antû na nyamû bakue i mûrimo ûmûnene. 7 Mwathani ariuga, nyuma ya ûgu, nkaanenkanîra Sendekia mûnene wa Njunda na atongoria baake na antû bonthe ba taûni îno bara bagaatigarua i mûrimo, akabaûraga na rûûyiû na yûûra kîrî Nebukandinesa mûnene wa Mbabironi na kîrî anthû baao bara beendaga kûbaûraga. Akabaûraga na rûûyiû na atibeegîîrua kîao nwa aniini.’8 “Nkûrûki yoogu, îra antû Mwathani augîîte, ‘I mbaigîîte njîra ya mwoyo na njîra ya gîkuû mbere yenu. 9 Muntû wonthe ûra akaraga taûni îno agaakuîra ndûani, yûûra kana mûrimo. Îndî ûra akaumagara eenenkanîre kîrî Ambabironi bara babûcîgîîrîîtie agaatûûra mwoyo. Akaamonyoka athi na mwoyo wake.’ 10 Mwathani ariuga, ‘I mbangîîte kûrûthîra taûni îno ûthûûku na ti wega. Îkaanenkanîrwa njaraani cia mûnene wa Mbabironi, na akamîînyangia na mwanki.’
Mûciî wa mûnene wa Njunda
11 “Îra mûciî wa mûnene wa Njunda, ‘Îgua kiugo kîa Mwathani. 12 Biû antû ba mûciî wa Ndaundi, ûûgû i bu Mwathani akuuga:
Tûmîra ûmma wa kîra rûkîîrî,
ûtuunyûkie bara baiyîîtwe
kuuma kîrî mwinyanîîria,
wegua ûtiirûtha ûgu mûthûûro wakwa ûgaakana ta mwanki na ûbîîthie
na gûtirî we ûgaacuoria
n'ûntû bwa ûthûûku bûra bûrûthîîte.
13 Raitha wone, ndî na ûthû naawe, Njerusaremu,
woû ûtûûraga rûgongo rwa kîbonde gîkî
nthîgûrû îra mbaranîru na îrî maiga, i bu Mwathani akuuga,
biû buugaga, “N'ûû ûûmba gûtuithûkîra?
N'ûû ûûmba kûthûngîra gûntû gwetû wa kwîbitha?”
14 Nkabûkaanûkia kûringana na ngûgî cienu, i bu Mwathani akuuga.
Nkaabîîthia mûthitû waku na mwanki,
ûra ûkaabîîthia into bionthe bira bibûthiûrûkîrîîte.’ ”