20
1 Îîndî Pasiuri mûthînjîri wa Ngai, mwana wa Imeri, ûra aarî mûtongoria ûmûnene ndeeni ya Nyomba ya Mwathani eegua Njeremia akîroria mantû mama. 2 Rîru Pasiuri aaringa kîroria Njeremia, na auga athaîkîîrwe mbaaûni ira ciarî ndeeni ya mwîrîga wa neegûrû ûra wetagwa Mwîrîga wa Benjameni Nyomba ya Ngai. 3 Rûkîîrî rîra Pasiuri aarekeerie Njeremia kuuma ara aamwingîrîîte, Njeremia amwîra, “Mwathani auga riîtwa rîaku ûgeetawa Magorimisabibua bantû a Pasiuri. 4 N'ûntû ûûgû i bu Mwathani akuuga, ‘Ngaatûma woû wengwa ûtuîke kîmakania kîrî woû wengwa na kîrî acoore baaku bonthe. Ûkoona na meetho maaku wengwa bakîûragwa na ndûûyiû n'anthû baao. Nkaanenkanîra Njunda yonthe kîrî mûnene wa Mbabironi abatae athi nabo bwa Mbabironi, kana abaûrage na rûûyiû. 5 Nkaanenkera anthû baao ûtonga bwa taûni îno bunthe, into biayo bira birî gîtûmi, na kinya ûtonga bwa anene ba Njunda. Bagaataa bionthe bathi nabio bwa Mbabironi. 6 I woû Pasiuri, na antû ba mûciî waku bonthe, bûkaathi ûkombooni Mbabironi. I noogo bûgaakuîra na bûthikwe amwe na acoore baaku bara ûrorereetie ûrongo.’ ”Kûnung'una kwa Njeremia
7 “Mwathani, n'wambeneerie, naani ndeeneereka
ûnkîrîîtie inya wambota buru.
Ntiindaga kûthekeerwa mûthenya unthe,
antû bonthe i banyûrûntaga.
8 N'ûntû warîonthe nkîaria nwa mwanka,
nkûûmûke nainya nkiugaga,
‘Kînyamaara na kwînyangua!’
Kwoogu i kiugo kîa Ngai,
kîandeteera kûrumwa na kûthekeerwa ntugû yonthe.
9 Îndî nkaaya kuuga, ‘Ntimûgweta
kana ngweta riîtwa rîake kaîrî,’
kiugo gîake nkorooni yakwa gîkari ta mwanki,
ta mwanki wingîrîîtwe maîndîîni maakwa ndeeni.
Inogeete i gûcuûmîîria nkûrûki,
na mma ntiûmba kûûmîîria.
10 Inkwîgua bioye bia antû baingî bakiugaga,
‘Kûrî na ûguaya nteere cionthe!
Mumbûreeni! Ga tûmumbûre!’
Wana kinya acoore baakwa bonthe,
nwaka beeteereete kûgwa wakwa,
bakiugaga, ‘Kwaûmbîka akeeneerua,
rîru naati tûmwote na twîrîîrie.’
11 Îndî Mwathani arî amwe naani ta ncamba ya ndûa îrî inya,
kwoogu bara baanyamaaragia i bakaagwa batiûmbana.
Bakaagîa îgi mûno n'ûntû mîbango yao îkaaragana,
kwaga gîtîîyo kûra bakaagîa gûtikooro kûriganîria.
12 Îî Mwathani Mwene Inya, woû ûthimaga bara baagîru,
nwiyî nkoro ciao na mathûgaania,
ka mbone ûkîndîîria kîrî bo,
n'ûntû i kîrî woû nenkanîrîîte mantû maakwa.
13 Inîraani Mwathani!
Kumiani Mwathani!
N'ûntû n'atunyûkîîtie mwoyo woora mûbatu
kuuma njaraani cia antû baathûûku.
14 Îroorumwa ntugû îra ndaaciarirwe!
Ntugû îra taata anciarire îroagia kîthaarimo.
15 Aroorumwa muntû ûra wairîîre baaba ntûmwa, aatûma akena mûno,
amwîra, ‘N'ûciarîrîîtwe kaana ga kaîyî.’
16 Muntû ûyu arookara ta taûni
ira Mwathani eenyangiirie atarî na kîao.
Aroegagua irîro rûkîîrî, na ituma bia ndûa mûthenya gatî.
17 N'ûntû n'aaregire kûûmbûragîra nda
ya taata nkuîra ku atuîka nthiko yakwa
nda înu yake îkara îrî nene tene na tene.
18 I kî gîatûmire mbuuma nda ya taata,
mbûya kwonaga thîîna na kîeba,
na ûtûûro bwakwa bunthe bûûyûra îgi?”