Kîthiri gîîkuû
19
1 Mwathani ariuga, “Îthi ûgûre kîthiri kwa mûûmbi wa nyûngû. Ûthûkie akûrû bamwe ba antû na athînjîri ba Ngai 2 na uumagarûke ûthi kîbondeeni kîa mwana wa Inomu, akubî na Mwîrîga wa Rûgîo. Ûtûmîîrie noo mîgambo îno ngûkwîra, 3 ‘Thikîîriani kiugo kîa Mwathani, biû anene ba Njunda na antû ba Njerusaremu. Ûûgû i bu Mwathani Mwene Inya, Ngai wa Isiraeri akuuga, thikîîriani! I nthiîte kûreeta kînyamaara bantû aaga kîra gîgaatûma matû ma muntû wonthe ûra agaakîîgua mathaandîka. 4 N'ûntû ibantiganîrîîtie na baatuîkithia bantû aaga bantû a ngai i ngeni. I babîîthîrîîtie igongwana bantû aaga kîrî ngai ira beethe kana anene ba Njunda bataaro baimenya, na ibaûyûrîîtie bantû aaga nthakame ya antû batarî na mabîtia. 5 I baakîrîîte Mbaari gûntû kûra gûûkîîru gwa kûbîîthîria aana baao na mwanki kîrî kîgongwana kîrî Mbaari, ûntû ntaathana kana ngweta, kana bûthûngîra mathûgaaniani maakwa. 6 Kwoogu bwîmenyeere, ntugû i ciiyîîte, i bu Mwathani akuuga, rîra antû batagîîta bantû aaga Tofethi kaîrî kana kîbonde kîa mwana wa Inomu, îndî bagagîîta kîbonde gîa Kûûraganîrwa.7 “ ‘Nkeenyangîria mîbango ya antû ba Njunda na ba Njerusaremu bantû aaga. Ngaatûma baûragwa n'anthû baao na rûûyiû, njara cia bara bacwaga ûtûûro bwao, na mpeeyane biimba biao birî irio kîrî nyoni cia îgûrû na nyamû cia kîthaka. 8 Nkaareeta kwînyangua wa taûni îno na mîtuîkithie gîntû gîa kûthekeerwa, bonthe bara bagaakûrûkagîîra akubî n'yo bakaarigara na bamînyûrûûnte n'ûntû bwa wînyangia bwa yo bunthe. 9 Ngaatûma barîa nyama cia nthaka ciao na cia aarî baao, na muntû akaarîa nyama cia mwîrî wa muntû ûra ûngî îgiita rîa kûthîîna kwa mathûgaania rîra bakaathiûrûkîîrwa n'anthû baao, bara bacwaga ûtûûro bwao.’
10 “Rîru ûûrage kîthiri, bara ûthiire nabo bakîonaga, 11 na ûbeere, ‘Ûûgû i bu Mwathani Mwene Inya akuuga, nkaathithira mûgongo ûyû na taûni îno wa ta bûra kîthiri gîkî kîa mûûmbi wa nyûngû kîathithirwa kîathithirûka na gîtiitumanîka kaîrî. Bûkaathika akuû Tofethi mwanka kwage bantû angî a kûbathika. 12 Ûûgû i bu nkaarûtha bantû aaga na kîrî bara batwîre aaga, nkaarûtha taûni îno îkare ta Tofethi, i bu Mwathani akuuga. 13 Nyomba cia Njerusaremu na cia anene ba Njunda igeekîrwa mûgiro ta bantû aaga Tofethi, na îîndî i nyomba cionthe kûra babîîthagîria igongwana rûûgûrû bikîbîîthîrua njûûrî cia îgûrû na bageetûûra biewa biakûnyua kîrî ngai ira iingî.’ ”
14 Rîru Njeremia aacooka kuuma Tofethi, naara Mwathani aamûtûmîîte athi kûroria, na aarûngama kîaragooni kîa Nyomba ya Mwathani, eera antû bonthe, 15 “Mwathani Mwene Inya, Ngai wa Isiraeri, ariuga, ‘Thikîîriani! I nthiîte kûreeta kînyamaara kîonthe kîra ndaugire îgûrû rîa taûni îno na ntûûra ira imîthiûrûkîrîîte, n'ûntû i baûmiirie biongo na bataathikîîria biugo biakwa.’ ”