Nyomba ya mûûmbi wa nyûngû
18
1 Gîkî i kîo kiugo kîra kîayîîre Njeremia kuuma kîrî Mwathani. Kîamwîra, 2 “Îthi nyomba ya mûûmbi wa nyûngû, naagu i noo ngaakwera ntûmwa yakwa.” 3 Kwoogu ndeendama mwanka nyomba ya mûûmbi wa nyûngû, na ndoona akîrutîra ngûgî yake nthigûûni. 4 Na rîra gîntû kîra aûmbaga na yûmba kîathûûkaga kîrî njaraani ciake, aacookaga agatûmîra yûûmba rîru kûrûtha nyûngû îîngî na kûmîrûtha bûra eendaga.5 Rîru kiugo kîa Mwathani kîambûyîîra, 6 “Îî biû antû ba Isiraeri, ka niû ntaarûtha naabi ta bûra mûûmbi ûyû wa nyûngû akûrûtha?” I bu Mwathani akuuga. “Wa ta yûûmba njaraani cia mûûmbi, i bu bûkari njaraani ciakwa, biû antû ba Isiraeri. 7 Kagiita kamwe, nkaaya kuuga mûgongo kana ûnene bûgaakûûrwa, bwomboranue na bwînyangue, 8 na mûgongo ûyu nkaanîîtie ûkaaya kwîrira ûthûûku bwa uu, nkaagarûra mathûgaania maakwa îgûrû rîa gûcureetera kînyamaara kîra ndarabangîîte. 9 Kagiita kaangî nkaaya kuuga mûgongo kana ûnene bûgaakwa na bûrike, 10 na bûkaaya kûrûtha ûthûûku mbere yakwa na bûkarega kûmbathîkîra, nkaagarûra mathûgaania îgûrû rîa wega bûra ndarabangîîte gûcurûthîra.
11 “Kwoogu îîndî îra antû ba Njunda na bara batwîre Njerusaremu, ‘Mwathani ariuga, raithaani! I nkûbanga kînyamaara îgûrû rîenu, na i nkûbanga mûbango ûmûthûûku îgûrû rîenu. Kwoogu garûkaani bûtige njîra cienu inthûûku, wa kîra ûmwe wa cienu, na bûcookanîîrie njîra cienu na mîtugo yenu.’ 12 Îndî bagaacookia, ‘Gûtirî na gîtûmi. Tûkaathi na mbere na mîbango yetû, kîra ûmwe wetû akaathingata kûûma kîongo wa nkoro yake înthûûku.’ ”
13 Kwoogu Mwathani ariuga,
“Ûria gatîgatî ka mîgongo,
N'ûû aaro eegua ûntû ta bûbû?
Isiraeri ûra ataamaama na muntû ûngî
n'arûthîîte ûntû bûthûûku mûno.
14 Ka mbaraabu ya Rebanoni
yaaro yûûra kuuma mîtûndûrûkooni yayo ya njara cia maiga?
Ka rûûyî rwa mpîo rwa kuuma gûntû gûku kûûraaya,
kûrî rîo rwabwa?
15 Îndî antû baakwa i bariganîrîîtue i niû,
babîîthagîria ngai itarî gîtûmi igongwana.
Ira ciatûmire bataratara bauma njîraani ciao,
njîraani ira nkûrû.
Ngai inu ciatûmire bathi na njîra cia rûteere
na barabara itarî ndîme.
16 Nthîgûrû yao îgaatuîka îganjo,
gîntû gîa kûmenagîîrua tene na tene,
Bonthe bara bagaakûrûkagîîra agu bagaatemûkaga
na bakainainia biongo biao.
17 Nkabanyagaaria mbere ya anthû baao,
ta ruuo rwa kuuma bwa mbarî ya umîîro bwa riûa,
nkabautatîria mûgongo
ntugû yao ya kînyamaara.”
18 Rîru antû bauga, “Ga tûbîîndîre Njeremia njûri, n'ûntû ûrutani bwa watho kuuma kîrî athînjîri ba Ngai gûtirî rîo bûkaûra, kana mataaro kuuma kîrî antû baûgî, kana kiugo kuuma kîrî iroria. Kwoogu ncûûni, tûmwithûkîre na ndîme cietû, na tûtikaathikîîrie nwa mbi ya mîgambo îra akaaria.”
19 Kwoogu ndaaromba nkiugaga,
“Itû Mwathani, nthikîîria, îgua bûra bara banthitangaga bakuuga!
20 Ûthûûku i bu îrîi rîra nkaagwata n'ûntû bwa kûrûtha bwega?
Kinya i bambînjîrîîte îrinya.
Ririkana atî ndaarûngamire mbere yaku
na ndaaria mantû meega îgûrû rîao
kaingo ûgarûra mûthûûro waku uuma kîrî bo.
21 N'ûntû bwoogu rekeeria aana baao bakue i yûûra,
ûtûme bakue i mûrimo.
Rekeeria eekûrû baao beegue batarî na aana na batuîke ntigwa,
antû arûme baao ka bakue i mûrimo,
nthaka ciao ing'eerwe na rûûyiû ndûani.
22 Ga kîrîro kîîguîke nyomba ciao,
rîra ûkaabareetera njûûrî îbaithûkîre nthûti,
n'ûntû i bambînjîrîîte îrinya kaingo bangwata,
na baitha mîtego ya kûngwata magûrû maakwa.
23 Îndî woû Mwathani, n'wiyî
mîbango yao yonthe ya kûûmbûraga.
Ûtikaabarekere moothûûku maao
kana ûbuuta meeyia maao kuuma meethooni maaku.
I bagwe nthî barî bacinde,
rîîkania nabo îgiita rîru ûthûûri.”