Mwathani aanenkera Njunda îkaanûkia n'ûntû bwa meeyia maao
17
1 “Wîyia bwa Njunda bwandîkîîtwe na ntemi ya cuuma,bwandîkîîtwe na mûromo wa iiga rîûmo,
ibaûûni bia nkoro ciao,
na ngociini cia ithînjîro biao.
2 Kinya aana baao i baririkanaga
ithînjîro biao na itugî bia Asera
rûteere rwa mîtî îra mîririmu
na tûrîmaani tûra tûraaya.
3 Kîrîmaani gîakwa kîra kîrî nthîgûrû, ûtonga na igîîna bionthe
nkabieyana bitaîgwe,
amwe na gûntû kwenu kûra gûûkîîru,
n'ûntû bwa wîyia bûra bûrî nthîgûrû yenu yonthe.
4 Woû wengwa ûgaata
rûgai rûra ndaakwere.
Nkabûtuîkithia nkombo kîrî anthû beenu
nthîgûrû bûtaiyî,
n'ûntû bûgwankania mûthûûro wakwa,
na ûgaatûûra wankanaga tene na tene.”
5 Mwathani ariuga ûûgû:
“N'ûmûrume ûra eerîgagîîra muntû,
ûra atuîkithagia muntû inya yake,
na ûra nkoro yake îgarûkaga îgatiga Mwathani.
6 Agaakara ta kîthaka kîa rwanda,
ationa wega rîra bûkaaya.
Agaatûûra rwanda rûûmo,
nthîgûrû ya mwonyo kûra gûtatûûragwa.
7 Îndî kîthaarimo i kîrî muntû ûra eerîgagîîra Mwathani,
ûra wîrîgîîro bwake bûrî kîrî Mwathani.
8 Agaakara ta mûtî ûra ûrî rûteere rwa rûûyî
ûra ûtaambagia mîri yau akubî na muuro.
Ûtimakaga riûa rîara;
uu ûkaraga ûrî mûririmu rîonthe.
Ûtimakaga mwankaani ûtarî mbura
ûciaraga matunda rîonthe.”
9 Nkoro ya muntû n'yeneerekaga nkûrûki ya into bionthe
na îtiûmba kworua.
N'ûû ûûmba kûmîciûra?
10 “Niû Mwathani ncûnkûûnaga nkoro
na nkathima mathûgaania,
kûrea muntû kûringana na mîtugo yake,
kûringana na kîra mîtugo yake îbatîîrue.”
11 wa ta bûra kaumbuthûki kaguîkagîra makome mara gatarekeetie
nwa ta bu muntû ûra agwataga ûtonga na njîra îtaagîrîîte akari.
Bûkaamûtiga mûtûûrîre wake waganaanîria,
na mûthiani akoonania we i kîaa.
12 Gîtî kîa mwago kîa ûnene,
kîra gîaûkîîrue kuuma kîambîrîria,
noogo bantû eetû ara atheru.
13 Îî Mwathani, woû wîrîgîîro bwa Isiraeri,
bonthe bara bagûtiganagîria bakaagîa îgi.
Bara bonthe bagûtiganagîria bakaandîkwa tîîriini,
n'ûntû i batiganîrîîtie Mwathani,
kaumo ka rûûyî rwa mwoyo.
14 Mboria, woû Mwathani, naani nkoora;
mbonokia na nkoonoka,
n'ûntû i woû nkumagia.
15 Bakaraga bakîmbûûragia,
“Birîkû imakania bira Mwathani aatûmakagia nabio?
Nabiûyûrie îîndî!”
16 Ntaakuthûka kwîgua ndî mûrîîthi ngûgîîni yaku;
kana ndîîrirîria ntugû ya thîîna.
N'wiyî bwega mara mbarîîtie na kanyua gaakwa.
17 Ûtikanguayie;
i woû wîbitho bwakwa ntugû ya thîîna.
18 Reka bara banthîînagia bagîe îgi
îndî ûmbeebûkanie na îgi,
ka bamakue,
îndî niû ûtikaareke mmakua.
Bareteere ntugû ya ûthûûkia,
beenyangie na wînyangia maita maîrî.
Kûmenyeera ntugû ya Sabatû î ntheru
19 Mwathani aambîîrîîte ûûgû, “Îthi ûrûngame mwîrîgaani wa antû, ûra anene ba Njunda bathûngagîîra na bakaumagarûka nau, rûngama kinya mîîrîgaani îra îngî yonthe ya Njerusaremu. 20 Ûbeere, ‘Îguani kiugo kîa Mwathani, biû anene ba Njunda na antû ba Njunda bonthe na muntû wonthe ûra atwîre Njerusaremu ûra akûrûkaga na mîîrîga îno. 21 Mwathani ariuga ûûgû: Îîmenyagîîreeni bûtigaakamate mûrigo ntugû ya Sabatû kana bûcukûrûkîîria mîîrîgaani ya Njerusaremu. 22 Bûtikaarute mûrigo nyomba cienu kana bûruta ngûgî nwa îrîkû ntugû ya Sabatû, îndî bwaigage ntugû ya Sabatû îrî ntheru, wa ta bûra ndaathire biûyûûyû bienu. 23 Amwe na ûgu bataathikîîria kana baathîka; ibaarî baûmo biongo na batikîûmba kûthikîîria kana baathîkîra îkaanûkia. 24 Îndî wegua bûkaamenyeera bûmbathîkîre, na bûrege gûkûrûkia mûrigo na mîîrîga ya taûni îno ntugû ya Sabatû, îndî bûmenyeere ntugû ya Sabatû întheru na njîra ya kûrega kûruta ngûgî nwa îrîkû, 25 rîru anene bara bakaragîra gîtî kîa ûnene kîa Ndaundi bagaakûrûkaga na mîîrîga ya ntûûra îno barî na anene baao baaniini. Bo na anene baao baaniini bakaaya bathiithîîtie nkaarî cia mbaraathi cia ndûa na barî îgûrû rîa mbaraathi, na antû ba Njunda na bara batwîre Njerusaremu, na taûni îno îgaatûûrwa tene na tene. 26 Na antû bakaaya kuuma taûni cia Njunda na ntûûra ira ithiûrûkîrîîte Njerusaremu, na nthîgûrû ya Benjameni, na Sefera, na mîaranthî ya irîma ya rûteere rwa ûthwîro bwa riûa, kuuma nthî ya irîma na Negebu, bareteete biewa bia kûbîîthua na igongwana, biewa bia irio, macoco na biewa bia nkaatho Nyomba ya Mwathani. 27 Îndî woona bwarega kûmbathîkîra bûmenyeera Sabatû ntugû întheru na njîra ya kûrega gûkamata mûrigo nwa ûrîkû ûgîkûrûka na mîîrîga ya Njerusaremu ntugû ya Sabatû, ngaankania mwanki ûtooreka mîîrîgaani ya Njerusaremu ûra ûkaabîîthia gûntû kwayo kûra kwirigîre na nthingo.’ ”