Ntugû ya kînyamaara
16
1 Rîru kiugo kîa Mwathani kîambûyîîra gîkiugaga, 2 “Ûtikaagûrane ûgîa nthaka kana aarî gûntû gûkû.” 3 N'ûntû ûûgû i bu Mwathani akuuga îgûrû rîa nthaka na aarî bara baciarîrîîtwe gûntû gûkû na mantû ma eekûrû bara barî bagina na antû arûme bara barî beethe, 4 “Bagaakua i mûrimo ûmûthûûku. Gûtirî we akeegua arî oogo wa kûbarîrîra kana wa kûbathika. Mîîrî yao îgaatûûganîîra naagu nthîgûrû ta mai. Bakaûragîrwa ndûani kana bakue i yûûra, na biimba biao bigaatuîka irio bia nyoni na nyamû cia kîthaka.”5 N'ûntû Mwathani ariuga ata rî, “Ûtikaathûngîre mûciî ûra ûkuîrîîtwe, ûtikaathi kûbarîrîra kana ûbeegua kîao, n'ûntû i ndutarutîîte ûkiri bwakwa, wendo bwaku bûra bûtathiraga na kîao kuuma kîrî antû baba.” I bu Mwathani akuuga. 6 “Bonthe baanene na baaniini bagaakuîra nthîgûrû îno. Bationa wa kûbathika kana wa kûbarîrîra, na gûtirî we ageetemaanga kana eenja kîongo n'ûntû bwao. 7 Gûtirî we akaaruta irio bia gûkirakiria bara bakûrîrîra îthe akuîte kana gina.
8 “Na ûtikaathûngîre nyomba îra îrî na kîatho ûkara nthî kûrîa na kûnyua. 9 N'ûntû ûûgû i bu niû Mwathani Mwene Inya, Ngai wa Isiraeri nkuuga: Mbere ya meetho meenu na ntugûûni cienu, ngaakiria tûyû twa nkena na kûgwîrua na kayû ka mûgûrani na mûgûrwa gûntû gûkû.
10 “Rîra ûkeera antû baba mantû mama monthe nabo bagaakûûria, ‘I kî n'ûntû Mwathani abangîîte gûtûkaanûkia na kînyamaara kîîthûûku ûûgû? I mabîtia mabi tûrûthîîte? I wîyia bûbi tûrûthîîte mbere ya Mwathani Ngai wetû?’ 11 rîru naawe ûkaabacookia ûbeere ûûgû, ‘I bûra biûyûûyû bienu biantiganîîrie, baathingata ngai cingî, bacitûmîkîra na bacigoonga. Baantigire na bataathîkîra mawatho maakwa. 12 Naabi bwarûtha mantû maathûûku kinya nkûrûki ya biûyûûyû bienu, woora muntû athingatîîte ûthûûku na ûûmo bwa nkoro yake bantû a kûmbathîkîra. 13 Kwoogu nkabwîngatia buume nthîgûrû îno bûthi nthîgûrû biû kana biûyûûyû bienu bataiyî, na naagu bûgaatûmîkîra ngai ciingî ûtugû na mûthenya, n'ûntû ntibwîgua kîao.’
Ngai agaacookanîîria Isiraeri
14 “N'ûntû bwoogu, ntugû i ciiyîîte,” i bu Mwathani akuuga, “rîra antû batakiuga kaîrî, ‘Wa ta bûra Mwathani atûûraga mwoyo, ûra aarutire antû ba Isiraeri nthîgûrû ya Miisiri,’ 15 îndî bakaugaga, ‘Wa ta bûra Mwathani atûûraga mwoyo, ûra aarutire antû ba Isiraeri nthî ya bwa îgûrû na kuuma nthîgûrû ira ingî cionthe aabeengatîrîîtie.’ N'ûntû nkabacookia nthîgûrû yao yongwa îra ndaanenkeere biûyûûyû biao. 16 Îndî îîndî ngaatûmana ategi ba makûyû baingî,” i bu Mwathani akuuga, “na bakabagwata. Nyuma ya ûgu ngaatûma agwîmi baingî, na bakabagwîma irîmaani bionthe na tûrîmaani tunthe na mbacacîîni cia maiga. 17 Meetho maakwa i makwona njîra ciao cionthe, ti mbithe kuuma kîrî niû, kana wîyia bwao bûkunîkîrwa kuuma meethooni maakwa. 18 Mbere ya ûûgû, ngaatûma barea maita maîrî n'ûntû bwa ûthûûku bwao na wîyia bwao, n'ûntû i beekîrîîte nthî yakwa mûgiro na ngai itarî mwoyo ira nthwîre na rûgai rwakwa baruûyûria ngai ciao cia ûrongo.”
19 Îî Mwathani, i woû ûndigagîîria na ûgampa inya,
wîbitho bwakwa îgiita rîa thîîna,
Mîgongo îkaaya kîrî woû
kuuma mîthia ya nthîgûrû yuuge,
“Biûyûûyû bietû biegwatîîre ngai cia ûrongo,
mîbuanaano îtarî na gîtûmi itaabarûthîra nwa ata.
20 Antû nwa beerûthîre ngai ciao?
Yîî, îndî wana bakarûtha itiîthîrwa irî ngai!”
21 Rîru Mwathani aacookia auga,
“Kwoogu nkabarutana
îgiita rîrî ngaatûma bamenya
inya yakwa na ûûmbani bwakwa.
Rîru bakaamenya
atî riîtwa rîakwa i Mwathani.”