15
1 Rîru Mwathani ambîîra, “Kinya Musa na Samweri bakîrûngama mbere yakwa bakîmbereka, nkoro yakwa îtikîerekera antû baba. Beengatie baume mbere yakwa! Ka bathi! 2 Na bakûûria, ‘I kû tûkaathi?’ ûbeere, ‘Ûûgû i bu Mwathani akuuga:Bara batuîrîîtwe gûkua i mûrimo ûmûthûûku, baûragwe i mûrimo;
Bara barî ba kûûragîrwa ndûani, baûragirwe ndûani;
bara barî bakûûragwa i yûûra, baûragwe i yûûra,
na bara barî ba kûgwatwa batuîka agwate, bagwatwe.’
3 “Ngaatûma mantû mîthemba îna ma kûbeenyangia,” i bu Mwathani akuuga, “rûûyiû rwa kûûraga na kurû cia gûkururia na nyoni cia îgûrû na nyamû cia kîthaka cia kûbarîa na kûbeenyangia. 4 Ngaatûma batuîka gîntû gîa kûmakania kîrî moonene monthe ma nthîgûrû n'ûntû bwa bûra Manase mwana wa Esekia mûnene wa Njunda aarûthîîre Njerusaremu.
5 N'ûû ûkaabwîgîîrua kîao, biû Njerusaremu?
N'ûû ûkaabûrîrîra?
N'ûû akaarûngama aniini akîenda kûmenya bûra ûrî?
6 N'ûndegeete,” i bu Mwathani akuuga.
“Ûkaraga ûgîcookaga nyuma.
Kwoogu, ngaataambûrûkia njara yakwa îgûrû rîaku na nkûthirie
ntiûmba gûkwîgîîrua kîao kaîrî.
7 Nkabaûnga na gîtaararû na mbanyagaarie ta maûngû,
mîîrîgaani ya taûni cia nthîgûrû.
Nkaareeta gûkuîrwa kîrî antû baakwa,
n'ûntû i baregeete kûgarûra njîra yao.
8 Ngaatûma ntigwa ciao ciingîe
nkûrûki ya mûthanga wa îria.
Nkaareeta mwînyangia mûthenya gatî
kîrî bagina ba nthaka ciao,
nthûti îmwe nkaareeta îgûrû rîao
kîeba na kîmako.
9 Mwekûrû ûra araarî na aana mûgwanja akaagirîka,
na abeebe rîa mûthia.
Riûa rîake rîkaathûa wa kûrî mûthenya,
akaagîa îgi na eegue nthoni.
Na nkaareka anthû baao
baûrage bara bagaatigara,”
i bu Mwathani akuuga.
10 Thîîna i kîrî niû taata, n'ûntû nwanciarire,
niû muntû wa kûrûa na gûcindana na nthî yonthe!
Ntaakoobithania kana nkooba,
amwe na ûgu muntû wonthe n'aandumaga.
11 Mwathani auga,
“Na mma ngagûkûûra n'ûntû bwa gîtûmi kîega;
na mma ngaatûma anthû baaku bakwereka
îgiita rîa thîîna na îgiita rîa kînyamaara.
12 Muntû aûmba kuunanga îthaga,
mûno mûno ta îthaga rîa kuuma neegûrû, kana rûthuku?
13 Ûtonga bwaku na igîîna biaku
nkabinenkanîra bitaîgwe, gûtarî îrîi,
n'ûntû bwa meeyia meenu monthe
mara bûrûthîîte nthî yenu yonthe.
14 Nkabûtuîkithia nkombo cia anthû beenu nthîgûrû bûtaiyî,
n'ûntû mûthûûro wakwa ûkaagwatia mwanki,
ûra ûgaankana kîînyume naabi.”
15 Îî Mwathani, woû n'ûkûmenya;
ndirikana na ûmenyeere.
Ûndîîrie kîrî bara banthîînagia.
Ûtikaabaûmîîrie mwanka boona kaanya ga kûmbûraga;
ûmenye ndîgîa nthoni n'ûntû bwaku.
16 Rîra ndeegiirue biugo biaku,
indaabithikîîrie mmenyereete,
biarî kûgwîrua na gîkeno gîa nkoro yakwa,
n'ûntû inkamatîîte riîtwa rîaku, îî Mwathani wa Njûûrî.
17 Ntaaro nkara na bara beekenagia,
kana nkenanîîra nabo,
Ndaakarire ninka n'ûntû njara yaku n'yarî îgûrû rîakwa
n'ûntû n'warî ûkûmbûyûria na mûthûûro.
18 I kî n'ûntû ûrûrû bwakwa bûtakûthira,
na ironda biakwa bitakwora?
I ka ûkwenda kûûmbûraga nkoro i kî,
wata muuro wa mûgûmba, ûra ûbweyaga thaano?
19 N'ûntû bwoogu ûûgû i bu Mwathani akuuga:
“Ûkaaya kwîrira, ngagûcookanîîria
kaingo ûntûmîkîra.
Ûkaaya kwaria mîgambo îrî gîtûmi, na ti îtarî gîtûmi,
ûgaatuîka kîroria gîakwa kaîrî.
Ga antû baba bakûgarûkîre,
îndî woû ûtikaabagarûkîre.
20 Naani ngagûtuîkithia ta rûthingo kîrî antû baba,
rûthingo rwa rûthuku.
Bakaarûa naawe
îndî batikûûmba,
n'ûntû ndî amwe naawe
gûgûteethia na gûkwonokia,”
i bu Mwathani akuuga.
21 “Ngakwonokia kuuma njaraani cia bara bathûûku
na ngûtuunyane kuuma mpîîni cia antû baathûûku.”