Yûûra rîînene
14
1 Gîkî i kîo kiugo kîa Mwathani kîra kîayîîre Njeremia gîkîarîîria mantû ma yûûra rîînene:2 “Njunda n'îkûrîra,
na taûni ciayo ga i kûnyamaara;
antû baayo bamaami nthî i kîeba,
na kîrîro kuuma Njerusaremu kîrîîtia îgûrû.
3 Atongoria batûmaga aruti ngûgî baao kûgîîra rûûyî,
baathi marinyaani maaraaya ma kwaiga rûûyî bakaruagia.
Bagacooka na ikuru biao birî bitheri,
bakuîte nkoro na baarigicana,
bagîkunîkagîra biongo biao.
4 N'ûntû gûtirî mbura,
na nthîgûrû n'îmbûmo,
arîmi i bakuîte nkoro,
na bagakunîkîra biongo biao.
5 Kinya nthia îciaragîra kîthakaani,
îkarûkîra kaunga,
n'ûntû gûtirî nyaki.
6 Mang'ooi ma kîthaka marûngamaga tûthûmbîriini twa tûrîma tûra nthaata,
makabeeba ta ncûûgi,
magatiga kwona
n'ûntû bwa kwaga ndîîthia.”
Antû ba Ngai baaromba
7 Kinya ûkeegua meeyia meetû i imagûtûkûûyîîra bûra tûkari,
îî Mwathani, rûtha ûntû n'ûntû bwa riîtwa rîaku.
Gûcooka nyuma wetû i kûûnene,
Itûkwîyîrîîtie.
8 I woû wîrîgîîro bwa Isiraeri,
na i wenka ûûmba gûtwonokia îgiita rîa thîîna.
I kî n'ûntû ûkari ta mûgeni nthîgûrû yetû,
ta mûthii rûgendo ûra aathûkagîra rûteere akamaama ntugû îmwe yonka.
9 I kî n'ûntû ûkari ta muntû ûmûkirimanie,
ta ncamba ya ndûa îtarî na inya ya kwonokia?
Namma, Mwathani, ûrî amwe naati,
na twîtanîrîîtue na riîtwa rîaku
ûtigaatûtiganîrie!
10 Ûûgû i bu Mwathani akuuga mantû ma antû baba,
“Beendeete kûruruutha mûno,
batirigagîîria magûrû maao.
Kwoogu Mwathani atibeetîgagîîria,
akaaririkana ûthûûku bwao
abakaanûkie n'ûntû bwa meeyia maao.”
11 Rîru Mwathani ambîîra, “Ûtikaarombere antû baba mawega. 12 Wana kinya bagatîîrîra kûrîa biakûrîa, ntiithikîîria kîrîro kîao, wana kinya bandutîra igongwana bia kûbîîthia na bia irio, ntibiîtîgîîria, îndî i ka nkaabathiria na ndûa, yûûra na mîrimo.” 13 Rîru ndauga, “Îî Mwathani Mwene Inya, iroria bikaraga bikîbeeraga, ‘Bûtiona ndûa kana yûûra. Wana i ka nkaabwaa ûkiri bûtakîthira bantû aaga.’ ”
14 Rîru Mwathani ambîîra, “Iroria bibu birîroria ûrongo riîtwani rîakwa. Ntaabatûma kana mbathuura kana mbaria nabo. Bioneki bîra baaragia mantû ma bio bitiîgagua biumîîte kîrî niû. Barîbûroreria bioneki bia ûrongo, mantû na kûringia mbûgû, mîbuanaano na mantû ma ûtheri mara bathûgaanagia bongwa. 15 I niû Mwathani ngûkwîra bûra nkaarûthana na iroria bibu ntatûmîîte, îndî biaragia riîtwaani rîakwa bakauga gûtirî ndûa na yûûra bikaaya nthîgûrû îno. Nkabaûraga na ndûa na yûûra. 16 Na antû bara bakûroreria bakaagerwa barabaraani cia Njerusaremu n'ûntû bwa yûûra na ndûa. Gûtionara muntû wa kûbathika, bo, eekûrû baao, nthaka ciao kana aarî baao. Nkabarîia n'ûntû bwa ûthûûku bwao bongwa.”
17 Mwathani ambîîra, nthi mbîîre antû bûra ndî na kîeba kîgana na mbeere ûûgû:
“Ka meetho maakwa meetûûre meethori
ûtugû na mûthenya,
na ntikaaro ntiga kûrîra,
n'ûntû antû baakwa bara mbendeete i baagurarie naaî mûno
na baatoonywa nainya mûno.
18 Nkaaya kuumagara nkathi bieniini,
ndîona mîîrî ya antû bara bakuîrîîte ndûani,
Rîra ndaathûngîra taûniini
nkeethîra antû bagûkua i yûûra.
Iroria na athînjîri ba Ngai i bakwanga nthîgûrû
na batikûmenya n'ata bakaarûtha.”
19 Mwathani, ka ûregeete Njunda cwe?
Ka ûthwîre antû ba Sayuuni?
I kî n'ûntû ûtûringîîte nainya ûûgû
bûra tûtaûmba kworua?
Îndî twaceria thîîrî gûtirî gîntû kîega twona,
twerîgîîra kworua îndî i kînyamaara twonire.
20 Mwathani, itwîyîîtie mbere yaku,
i tûkuumbûra moothûûku meetû,
na kinya mabîtia ma biûyûûyû bietû.
21 Ririkana mawîrane maaku na ûtigaatûmene,
ûtikaire Njerusaremu îgi,
bantû ara gîtî gîaku gîa ûkumio gîkaraga.
Ûtikaunange kîrîîkanîro kîra warîîkanîîre naati.
22 Ga kûrî mûbuanaano nwa ûmwe wa mîgoongo ûtarî gîtûmi ûûmba kûreeta mbura?
Îgûrû na bwa rîo rîongwa rîaûmba gwîtûûra mathanta nthî?
Twaigîîte wîrîgîîro bwetû kîrî woû Mwathani Ngai wetû,
n'ûntû i woû ûrûthaga mantû mama monthe.